सगलेच जागृत जावंया

भांगरभूंय | प्रतिनिधी

लश्कर, पुलिसांचेर सगलें सोडून समाजान ओगी रावंक उपकारना.

लाल किल्ल्या सामकार गाडयेंतल्यान स्फोटकां हाडून आतंकवाद्यान जें कितें केलें तें मनीसपणाक खत लावपी आशिल्लें. हो व्हायट काॅलर आतंकवाद. अशिक्षीत आनी गरीब लोक पयशां खातीर तो करताले. मात आतां उच्च शिक्षीत पसून थंड तकलेन हल्ले करपाक लागल्यात. अमेरिकेच्या संवसारीक वेपार केंद्राक विमानांचो धपको दिवन 2996 लोकांक मारपी 19 आतंकवाद्यांतले भोवतेक उच्च शिक्षीत आशिल्ले. दिल्लींत बाॅम्बस्फोट करपीय दोतोर खंय. ताचे पयलीं कांय दोतोरांक स्फोटकां सयत धरिल्ले. ह्या हल्ल्या फाटल्यान पाकिस्तानाच्या जैश ए मुहंमद संघटनेचो हात आसा, अशें पुलीस म्हणटात. हीं स्फोटकां अयोध्येंतले राममंदीर, काशी विश्वनाथ, भाजपाचें आनी लश्कराचें मुख्यालय उध्वस्त करपाक व्हरताले, अशी खबर एका चॅनलान दिल्या. ते नदरेनूय तपास करपाक जाय.
आतंकवादी हल्ले, दंगली भारतांत नव्यो न्हय. 1947 त फाळणी जाली तेन्ना धर्मीक हिंसाचारांत दोनूय वटेन मेळून अदमासान 10 लाखां वयर लोक मेले. कांय इतिहास तज्ञांच्या मतान हो आंकडो 50 लाखां मेरेन वता. सुमार देड कोटी लोकांनी घरदार, धंदो, भाटां -बेसां सोडून स्थलांतर केलें. सुरक्षे खातीर एकट्या जम्मू- काश्मीरांत फाटल्या 77 वर्सांत कितले खर्च केल्यात? 370 वें कलम रद्द केल्लें, तेन्ना आॅगस्ट 2019 ते एप्रील 2022 ह्या 28 म्हयन्यांच्या काळांत केंद्र सरकारान 9000 कोटी रुपया सुरक्षेचेर मोडल्यात!! आतंकवादाक लागून देशांत लाखभर तरी निष्पाप लोकांक जीव वगडावचो पडला आसतलो. अब्जांनी रुपयांची मालमत्ता नश्ट जाल्या. आतंकवादाक, हिंसाचाराक पोसवण दिवपी लोकांनी हाचो शांत तकलेन विचार करचो.
लाल किल्लो हो भारताचो मान. हें संवसारीक दायज थळ पर्यटनाच्या मळाक वर्साक 40 कोटीं वयर येणावळ दिता. स्वातंत्र्यदिसाची कार्यावळ हांगाच जाता. दिल्ली ही आमची राजधानी. अशा संवेदनशील थळाचेर भर गर्देंत हो दोतोर गाडी घेवन येता आनी बरोच वेळ वाट पळोवन स्फोट घडोवन हाडटा, हाचे वयल्यान आमची सुरक्षा वेवस्था आनीक सुदारुंक जाय हें मानून घेवचेंच पडटलें. ‘ही घडणूक आतंकवादाचीच’ अशें केंद्र सरकारान काल जाहीर केलां. दोशी व्यक्तींक बेगोबेग कडक ख्यास्त करची, असो थारावूय जाला. लश्कर, पुलिसांचेर सगलें सोडून समाजान ओगी रावंक उपकारना. दुबावीत हालचाली दिसल्यार पुलिशेक शिटूक करपाक जाय. आतंकवादी संघटना तंत्रज्ञानांत सुरक्षा वेवस्थेच्या मुखार गेल्यात. आमीय आनीक आधुनिकीकरण करपाची गरज आसा. दुसरे वटेन धर्मांधते कडेन आकर्शित जावपी मानसिकताय. हातूंत सगल्या पिरायेचे, जाती, धर्मांचे तरणाटे आसात. आतंकवाद हें हाचेंच एक आंग. कांय तरणाट्यांक स्वताची वळख जाय, थोड्यांक पयसो जाय. कांय देवभोळे. तांच्या भावनांचो गैरफायदो घेवपी आतंकवादी मानसिकताय समाजांत आसा. बेरोजगारी हें एक कारण. ‘खून का बदला खून’ हें चक्रूय घुंवता. बळिश्ट देश कोणाची तरी कुरापत काडटा आनी मागीर संद मेळटकच दुबळ्या देशांतले लोक आतंकवादा कडेन वळटात. तांकां आपल्या नादाक लावपी संघटना संवसारभर आसात. ‘म्हजेर अन्याय जाला, म्हाका दुय्यम लेखतात, दुस्वास करतात’ हे भावनेक सारें उदक घालपाचेय प्रकार घडटात. तरणाट्यांक उजू मार्गाचेर हाडपाक धर्मगुरूंची मजत घेवन शालेय पांवड्यार संवाद वाडोवपाक जाय. अर्थांत पयलीं धर्मगुरूची मानसिकताय, विचारधारा ‘जगात आनी जगूंक दियात’ अशी आसची पडटली. फेक न्यूजाच्या ह्या काळांत डिजीटल साक्षरताय वाडूंक जाय. विद्यार्थ्यांक स्वताच्या पांयांचेर उबे करपाक जाय. तांचे मुखार सदांच आदर्श व्यक्तीमत्वां येतली हे खातीर यत्न केल्यार बरें. समुपदेशनूय करचें. सहअस्तित्व, मनीसपण, विवेकवाद हांची आयज चड गरज आसा. पूण तेच बराबर समाज सुरक्षीत उरतलो, अशी अत्याधुनिक सुरक्षा वेवस्था जाय.