भांगरभूंय | प्रतिनिधी
पयसुल्ल्या देशाचो एक अर्दवट तकलेचो राजा येता आनी वांगड्याक घेवन गांवांतल्या एका वेपाऱ्याचेर कांय आरोप दवरून हल्लो करता. तोय प्रतिहल्लो करता. तो वेपारी मरता, पूण ताचीं घरचीं प्रतिकार करतात. राजा आनी ताच्या वांगड्याक वेपाऱ्याचो म्हाल फुडाराक मेळतूय बी, पूण सध्या त्या आनी आशिकुशीच्या लोकांक दीसपट्टो म्हाल हाडपाक पयस वच्चें पडटा. म्हाल वेळार मेळनाशिल्ल्यान लोकांचे हालूय जातात. हे काणयेचो अमेरिका, इझ्रायल, इराणा कडेन संबंद जोडूं येता. लोक म्हणल्यार इराणाचो म्हाल विकत घेवपी देश. तातूंत आमचो भारतूय येता. सध्या देशांत ‘अत्यावश्यक वस्तू कायदो 1955’ लागू केला. कारण हाॅर्मुझ उदका मार्गांतल्यान जावपी गॅसाची पुरवण बंद जाल्या. ताका लागून कांय राज्यांनी वेवसायीक गॅस पुरवणेचेर निर्बंध घाल्यात. कांय रेस्टाॅरंण्ट, हाॅटेलां बंद करपाचो वेळ आयला. हाचे मुखार घरांतलो रांदपाचो गॅस, गाडयांनी वापरतात तो गॅस पयली भशेन मेळटलो. साऱ्यांच्या कारखान्यांक फक्त 70 टक्के गॅस दितले. नॅशनल ग्रिडा कडेन जोडिल्ल्या च्यावेचे कारखाने, व्हडले उद्देग हांकां 80 टक्के तर शारांतल्या गॅस नेटवर्का कडेन जोडिल्ले ल्हान कारखाने, हाॅटेलांक वापराच्या हिशोबान 80 टक्के गॅस दितले. झुजाचे परिणाम कितें तें थोड्यांक खबर नासतात. पयस दोग जाण झगडटात आनी ताचो परिणाम भलत्यांचेरूच जाता!
गॅस टंचाय जावपाचीं कारणां म्हणल्यार स्ट्रेट आॅफ होर्मुज ह्या 167 किलोमिटर दर्या मार्गान जावपी टँकर बोटींची येरादारी उणी जाल्या. ताका लागून पुरवण नेमान जायना. आखाती देशांतल्यान भारताक जावपी तेलाची 50 टक्के तर गॅसाची 54 टक्के पुरवण होर्मुजांतल्यान जाता. संवसाराक जावपी तेलाची 20 टक्के पुरवण जाता. क्षेपणास्त्र हल्ल्याच्या भंयान बोटी आतां थंयच्यान वचनात. गॅस नाशिल्ल्यान एके मुंबयंत सध्या 20 टक्के हाॅटेलां बंद जाल्यांत. बुधवार मेरेन ही टक्केवारी वाडूं येता.
अमेरिका – इझ्रायल हल्ल्या उपरांत इराणान युएई, कतार, कुवेत, सावदींतल्या अमेरिकन थळांचेर ड्रोन हल्लो केलो. भारताक 40 टक्के गॅस दिवपी कतारान आपलें एलएनजीचें उत्पादन बंद केलां. केंद्र सरकारान घरगुती गॅसाचें मोल कांय राज्यांनी 60 रुपया वाडयलां. झूज चालू उरल्यार पेत्रोल, डिझेलाचें मोल वाडपाक शकता. तशें सरकार दुसऱ्या देशां कडल्यान तेल विकतें घेता. इंधनाची बचत हो एक बरो उपाय. पूण तो भारतीयांनी आपूण जावन करपाक जाय. राष्ट्रप्रेमी भारतीयांनी हे खातीर फुडाकार घेवं येता. आमच्या गोंयांत गाडयांचो चड वापर. हें इंधन टंचाय जावपाक कारण थारूं येता. एलपीजी उत्पादन वाडोवप, शक्य तितल्या चड देशां कडल्यान तेल आयात करपाचो यत्न करप, सीएनजी, पीएनजीचो (पायप गॅस) वापर वाडोवप गरजेचें. इलेक्ट्रीक, सौर उर्जा, बायोगॅस वापरून रांदप फायद्याचें थारुं येता. फर्नेस आॅयल बर्नर वापरप, चड गॅस लागता ते मेन्यू मर्यादीत करप होय बरो उपाय.
फक्त हाॅटेलांच न्हय, तर शिक्षणीक संस्था, हाॅस्पिटलांकूय गॅस लागता. पर्यटन राज्यांक तर गॅस चड लागता. म्हणटकच एका झुजाचो रोजगार, वेवसाय, पर्यटनाचेरूय परिणाम जातलो. पुण्यां गॅसाचेर चलपी एक मसंडभूंय तात्पुरती बंद दवरल्या. लोकांनी आबूज, काचाबूल जावचें न्हय, असो उलो केंद्र सरकारान मारला. आतां केंद्र सरकार अमेरिके सारक्या देशांतल्यान इंधन हाडपाचो विचार करता. म्हणटकच टंचाय जातलीच म्हूण भियेवपाची गरज ना. झूज, अणूबाॅम्ब, हवाई हल्लो हांची आवड आशिल्ल्यांक ते जाले म्हणटकच कितें जावं येता, हाची प्रचिती ह्या निमतान आयल्याच आसतली. झुजाचो हुलोप पयस मेरेन मारता आनी ताची खरसाण शांत देशांक पसून बसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
