भांगरभूंय | प्रतिनिधी
नोकर भरती भानगडीन आतां वेग घेतला. दोशी व्यक्तींक ख्यास्त मेळूंक जाय जाल्यार सरकारी नोकरे खातीर पयशे दिवप्यांनी मुखार येवपाक जाय. तशे कायद्यान, तेय गुन्यांवकारुच. तांणी दिल्ली 20, 30, 40, 50 लाख ही ल्हान रक्कम न्हय. ताच्या व्याजाचेरूच उण्यो गरजो आशिल्लें तिगांचें कुटुंब सहज जगपाक शकता. इतले रकमेचेर धाकटुलोसो वेवसायूय करुं येता. मात, तो करतना कश्ट, जिद्द, शिस्त, कुशळटाय जाय. अपमान, अपेस सोंसपाक जाय. देखून भरपूर पगार- सुटयो आनी कमी काम आशिल्ली नोकरी दरेकाक जाय आसता. ते खातीर ते खंयच्याय थराक वचपाक शकतात. अर्थांत परिस्थिती तशीच आसता! फकत पयशे दिल्लेच न्हय, तर उरिल्ल्यो दोन चौकड्योय (आठ जाण) पुलिसांच्या रडाराचेर येवपाक जाय. पयशे दिवन नोकरी मेळयिल्लेय बी!!
नोकरे खातीर पयशे दिल्ल्या कांय जाणांनी काल सांखळे मुख्यमंत्र्यांची भेट घेतली. तांणी पुरावे पुलिशेंत दिवन कागाळ करपाची सुचोवणी केली. सध्या गुन्यांव फांटो चवकशी करता. तो निकाल रोखडोच येतलो. मागीर सगलीं आडमेळीं पयस जातलीं, अशेंय तांणी सांगलें. सोशल मिडियाचेर आरती- परती चर्चा चल्ल्या. ह्या प्रकरणांक एकलोय राजकारणी ना अशें थोडे म्हणटात. कांय जाणांक मंत्री, एक सरकारी अधिकारी भ्रश्टाचार करचोच ना, अशेंय दिसता. मागीर पूजा (आनी आतां उमेदवार) सांगता ते 17 कोटी 68 लाख रुपया गेले खंय? बरेच प्रस्न उबे जाल्यात. आमदार वकील म्हणटा, त्या काळांत संबंदीत मंत्री पदारुच नाशिल्लो. आपली बदनामी केली म्हूण जाहीर माफी मागपाची मागणी आतां एका अधिकाऱ्यान केल्या. नाजाल्यार फौजदारी कारवाय करतलो खंय. पूजानूय, ही नोटीस आपणाक मेळूंक ना, असो व्हिडियो केला. आपूण नार्को टेस्ट करपाक तयार आसा, आपूण खंयच्याच राजकी पक्षांत ना, फक्त मजत मागपाक आपा कडेन गेल्लें, अशें ताणें म्हणलां. नार्को टेस्ट करताच जाल्यार ह्या प्रकरणांत घुस्पल्ल्याचो आरोप जाला, त्या सगल्यांचीच कित्याक करची न्हय? उमेदवारांचीय जांवक जाय. हे पयशे तांणी कशे दिल्ले? कॅश जाल्यार कितल्याच्यो नोटी? दितना कोणे मागल्यात तें पूजाक विचारिल्लें? खंयच्या – खंयच्या खात्यांतल्या नोकऱ्यांचीं हीं पदां आशिल्लीं. आनीक एक फोन परत व्हायरल जाला. तातूंत एक बायल कोणें, कितले पयशे मागल्यात, तें सगलें नांव, गांव घेवन सांगता. फाटीं कांय ‘समाजसेवकां’चोय असलोच फोन व्हायरल जाल्लो. सध्याचे हे नोकरी भरती भानगडीचीं पाळामुळां नवें वर्स लागचे पयलीं सरकारी यंत्रणेक भायर काडचीं पडटलीं.
आपल्याचेर संकश्ट आयलें काय मनीस देवाचे पांय धरता. कुळदेव, गणपती फाटोफाट गोंयकारांचो कोणाचेर विस्वास आसा जाल्यार तो राखणदारांचेर! हाचो अर्थ परत- परत तांचे मुखार वचून गाराणें घालप, रडगाणें गावप योग्य न्हय. मनशांनी भानगडी, गैरप्रकार करपाचे आनी ते निस्तरपाचे कोणें, तर राखणदारांनी? तो तांचो अपमान. पक्षांतर (हो मतदारांचो अपमान) करपाक आपूण देवाची परवानगी घेतिल्ली, देवान आपल्याक त्या पक्षांत वच म्हूण सांगलें, अशें फाटीं एकल्यान सांगिल्लें. देवाक दुसरीं कामां नात कितें? काल कटमगाळ दादा कडेन गाराणें जालें. कांय वर्सां पयलीं बोडगेश्वर, महालक्ष्मी, फुलांच्या खुरसा मुखार हेंच जाल्लें. देवाक सांगिल्लें तें सगले रोखडेच विसरले. देव हें विसरूंक नासतलो! नोकर भरती प्रकरणाचें घुस्पल्लें जानवें सोडोवपाची जापसालदारकी मनशांनीच घेतल्यार बरी! कारण ही मनशांनी, मनशां खातीर केल्ली पयशांची भानगड!!
आतां ह्या प्रकरणांत आरोप, प्रत्यारोप, कागाळी, केशी, व्हिडियो, खबरो येत रावतल्यो. पूण, ताचो सोक्षमोक्ष लागतलो काय ना, तें पुलिसूच सांगपाक शकतले! तांणीच आतां दोशींक ख्यास्त दिवपाची!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
