भांगरभूंय | प्रतिनिधी
नां वांत कितें आसा? अशें सगलेच म्हणटात. पूण सारकें बरें लक्ष दिवन पळयल्यार सगलें कितें नांवांतूच आसा म्हणपाचें कळटा. देख म्हणून राजकी पक्षाचें उदाहरण दिवं येता. भारतीय जनता पक्ष हो जातीय वादी, धर्मवादी पक्ष अशें ताचे विरोधक सांगतात. सामके हड्ड्यार हात मारून म्हणटात तशे ते सांगतात. ते संविधानाची वाट लायतले म्हणपाचेंय ते सांगतात. काँग्रेसीन तर तेच खातीर संमेलन बचाव आंदोलन लेगीत केलें. पूण ह्याच लोकांक जेन्ना सत्तेचेर वच्चें आसता तेन्ना तांकां भाजपाची मजत चलता. त्या पक्षांतलो कोणूय फुटून येता जाल्यार ताका ते वेंग मारतात. पक्षाची तिकेट दिवन ताचो प्रचारूय ते करतात. जशें कितें तो गंगेंत बुडी मारून पवित्र जाला. आपूण कालूच हाचे आड उलयतालों तें लेगीत ते विसरायेर घालतात.
काँग्रेसीचे लोक भाजपांत उडी मारतात तेन्ना तांकां भाजपा जातीय वादी दिसना. काल आपूण त्या पक्षा आड उलयतालों हाची याद आसना ताका. इतलेंच न्हय तर कोणाय कडेन ताच्या उलोवपाचो व्हिडियो आसलो आनी ताणें तो सोशल मिडियाचेर घालो तरी तो ताचे कडेन दुर्लक्ष करता. सामको तो आपूण न्हयच जावन वावुरता. हें पळयतकूच पक्ष वायट, पक्षांतले लोक वायट न्हय अशेंच दिसपाचें. तो त्या पक्षांत आससरूच वायट आशिल्लो, करप्ट आशिल्लो, संविधाना आड वावुरतालो आनी आयज तो सामको पवित्र जाला असोच ताचो अर्थ जावं येता. हाचोच अर्थ फाल्यां जर राहुल गांधी भाजपांत आयलो जाल्यार तो पप्पू आसचो ना. ताच्या नॅशनालिटीचेर कोण बोट दाखोवचो ना. घडये तो मंत्री लेगीत जायत. आनी तोय मोदीक तोखेतलो.
आयज अंबानी सरकारा कडेन बरो आसा म्हणून काँग्रेसवाले ताका खेपतात. सरकाराकूय बेठोच दोश दितात. जशें कितें अंबानी हो हें सरकार सत्तेर येतकूच धंद्यांत पडला. एका काळार अंबानीक काँग्रेस सरकार वेगळे वेगळे तरेन मजत करतालें हें आतांचे काँग्रेसीक खबरूच ना काय दिसता. तेन्ना अंबानीक जाय तशे कायदे, नेम सरकार बदलतालें. फक्त अंबानीच्या फायद्याक लागून. फक्त व्ही. पी. सींग तांचेर बेजार आसलो. व्हीपी सींग सरकार आयलें तेन्नाच अंबानीक मात्शी घरघर लागली. तें सरकार चड तेंप उरलें ना आनी व्हीपी सींग सरकाराचो मोरया जालो म्हूण अंबानी तगलो. आयज तेच काँग्रेसीचे लोक अंबानी आनी सरकाराक खेपतात. म्हणजेच काँग्रेसी वांगडा आसलो तेन्ना तो बरो आसलो आनी भाजपाक लागीं गेलो म्हूण वायट? निमाणें तो धंदेकार आनी ताका धंदो चलयतलो जाल्यार सरकाराचें बरेपण जायच हें कशें विसरूंक जातलें?
सरकारा आड गेल्यार कितें जाता तें आमी नकळो तर? ग्लोबल ट्रस्ट बँक नांवांची एक बँक आसली. बरी चलताली. फक्त विरोधी पक्षांतल्या लोकांची म्हूण तेन्नाच्या सरकारान ती नाच्च केली. वाट फक्त विरोधकांची न्हय तर सामान्य लोकांची लायली. खंयचीय बँक बंद जावप म्हणल्यार ते बँकेच्या गिरायकाक कितले त्रास जातात तें सांगपाची गरज आसा? सरकाराच्यान जाय तर बँक वाटावंक येताली. पूण विरोधकांची बँक वाटावप? पिशेपणां जावची ना? नासल्यार यस बँक, पंजाब-महाराष्ट्र बँक हांची उदाहरणां घेयात. वाटयल्यो मूं ह्यो बँको. सरकाराक जाय जाल्यार कितेंय जाता.
अशे वेळार म्हाका याद जाता, कॉर्पोरेशन बँक. गिरायकांक बरी सेवा दिवपी ही बँक. कर्नाटकांतल्या मंगळूरांत जल्मल्ली ही बँक. वचन दिसतालें हे बँकेंत. मोवाळ भास आनी मोगाळ लोक. मुखावेल्याक कसो खोशी दवरचो तें ह्या लोकां कडल्यान शिकचें. बरी चलताली ही बँक पूण कशी कोण जाणा लुकसाणेंत गेली. आतां ही बँक दुसरे बँकेंत विलीन जाली. नांव बदल्लें आनी सेवाय बदल्ली. हांसऱ्या तोंडान सेवा दिवपी वचून तकलेर आंटयो आशिल्ले बँकेंत दिसूंक लागले. तांकां कोणाचेंय काम करूंक वेळूच मेळना. खूब दबाव आसता खंय तांचेर. आतां बँकेंत गेल्यार वरांची वरां एसीचें वारें मेळटा. स्टॅट बँकेंत असली सेवा मेळटा म्हूण आयकल्लें. आतां हांगाय तसलीच सेवा मेळूंक लागल्या. नांव बदल्लें म्हणून हें घडटा अशें म्हाका दिसूंक लागलां. तरी आमी म्हणटले नांवांत कांय ना म्हूण!
हालीं तेंपार सगल्यांक बरें पडचें, मुखार त्रास जावचे न्हय म्हणून कांय नवे नेम केल्यात. पूण हे नेम केन्ना केन्ना लोकांक त्रासदायक थारतात. केवायसी – तुमच्या गिरायकाक वळखात. आतां सदांच बँकेंत येवपी मनशाक वेगळो वळखूंक जाय? हय तर. नेम आसा न्हय तसो. म्हणटकूच दर दोन वर्सांनी कांय कागदां बँकेक दिवंक जाय. आनी त्या मनशान स्वता थंय हजर आसूंक जाय. ज्योयंट अकावंट आसलो तर दोगांयनीय हजर जावंक जाय. मागीर एखादो जाणटो आसलो तरीय. आनी हजर जाता तेन्ना तांकां वेळ आसूंक जाय. तांकां वेळ आसच ना. मागीर फाल्यां यो, परवां यो आनी मागीर तुजेर उपकार म्हणून थंय बसून राव. ते बेकार जातात तेन्ना पळोवपाचें.
एक गजाल कळप कठीण जाता ती म्हणल्यार जेन्ना अकावंट चालू आसा, ताचेर दुडू घालप काडप चालू आसा. म्हयन्याक एकदां तरी तो मनीस बँकेक भेट दिता तेन्ना ताची वेगळी वळख आनी कसली घेवपाची? जर खातें चलच ना, वर्स दोन वर्सां ताचेर कांयच वेव्हार जायना तर ताका वळख दिवंक आपाेवप समजूं येता. तातूंत पत्तो तोच, मनीस तोच, कसलोच बदल ना तरी परत परत कागदां कित्याक म्हूण दिवपाचीं काय? आधार दी, पॅन दी, म्हाका तरी ही सतावणूक दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
