भांगरभूंय | प्रतिनिधी
पणजी : सक्षम आंगणवाडी तयार करपा खातीर शुन्य निधी येवपी गोंय हें देशांतलें एकसुरें राज्य आसा. हेर सगल्या राज्यांनी निधी येवन सक्षम आंगणवाडी तयार लेगीत जाल्यात. हे येवजणे खातीर 14 लाख मंजूर जाल्ले, पूण एकूय पयसो गोंयाक मेळूंक ना, अशी म्हायती केंद्रीय बायल आनी भुरगीं उदरगत मंत्रालयान दिल्या.
सक्षम आंगणवाडी हें केंद्राचे येवजणे खाला अत्याधुनीक साधन सुविधा आंगणवाडींत उपलब्ध जातात. सामान्य आंगणवाडीचे तुळेंत सक्षम आंगणवाडीक उत्कृश्ट दर्जाच्यो सुविधा देखीक एलईडी स्क्रीन, उदकाचे फिल्टर, पोशण वाटिका, पुस्तकां हे सारिकिल्ल्या गजालींचो लाव मेळटा.
केंद्रान 1261 आंगणवाडी मदल्यो फक्त 24 आंगणवाडींची सक्षम आंगणवाडी येवजणे खाला निवड केल्ली आनी हे खातीर केंद्रान 14.4 लाखांचो निधी मंजूर केल्लो. पूण मंजूर केल्ल्या निधी मधलो एकूय पयसो राज्यांक फावो जावंक ना देखून ह्यो 24 आंगणवाडी सक्षम जावचे सोडून तश्योच उरल्यात.
हेर सगल्या राज्यांनी निधी मंजूर जावन तातूंतलो कांय निधी त्यांचे तिजोरींत पावला आनी कांय आंगणवाडी सक्षम करपाक सुरवात केल्या. जाल्यार पंजाब आनी मध्यप्रदेश ह्या राज्यांक निधी फावो जाला, पूण तांणी अजून सक्षम आंगणवाडी तयार करूंक ना. गोंय हें एकसुरें राज्य आसा जाका निधी मंजूर जाला, पूण त्यो तयार करपा खातीर निधी अजूनय हातांत पडूंक ना.
मजगतीं फाटल्या दोन वर्सांत उण्यांत उणें 80 टक्के कामाच्या दिसांनी उक्त्यो आसपी आंगणवाडींनी उणाव जाला. फक्त एकूच आंगणवाडी उण्यांत उणें 20 टक्के कामाच्या दिसांनी उक्ती आसता. 2024 त 1,244 आंगणवाडी उण्यांत उणें 80 टक्के कामाच्या दिसांनी उक्त्यो आसतल्यो. पूण वर्स 2025 त हातूंत उणाव जावन 1239 आंगणवाडी उण्यांत उणें 80 टक्के कामाच्या दिसांनी उक्त्यो आसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
