सके, चवक्यांचो पावस पडुये

भांगरभूंय | प्रतिनिधी

इंडीयन प्रिमीयर लिगेची (आयपीएल) पयली क्वॉलिफायर मॅच कोलकाता नायट रायडर्स आनी सनरायझर्स हैदराबाद ह्या पंगडां मदीं हांगाच्या नरेंद्र मोदी स्टेडीयमाचेर जातली. ही मॅच जिखपी पंगड थेट फायनलीक पात्र जातलो, जाल्यार हारपी पंगडाक फायनलींत सुवात मेळोवपा खातीर आनीक एक संद फावो जातली.

दोनूय पंगडां मदीं अजून मेरेन 26 मॅची जाल्यात. हातूंतल्यो कोलकाता नायट रायडर्सान 16 जैतां जोडल्यात, जाल्यार सनरायझर्स हैदराबादान 9 मॅची जिखल्यात. हाचे आदीं दोनूय पंगड एकामेका आड दोन खेपे प्ले ऑफांत खेळ्ळ्यात. आनी स्कोर 1-1 असो आसा.

हैदराबादाचो दावखुरो फास्ट बॉलर जयदेव उनाडकटा खातीर अंदूंचो हंगाम मिश्र थारला. ताणें णव मॅचींनी 10.45चे इकॉनोमीन धांवड्यो दीत 8 विकेटी घेतल्यात. फॉर्मांत सातत्य नाशिल्ल्यान निमाणे लीग मॅची खातीर ताका निमाण्या इकरांतल्यान भायर बसयिल्लो. पूण, सुनील नरेनाचो फॉर्म पळयलो आनी जयदेवा आडचो ताचो रॅकॉर्ड पळयलो जाल्यार हैदराबादाचो पंगड वेवस्थापन ताका खेळोवपा विशीं विचार करपाक शकता. जयदेवान सुनीलाक दोन खेपे बाद केला. जाल्यार सुनीलान जयदेवा आड फकत 86चे स्ट्रायक रेटीन धांवड्यो केल्यात. भुवनेश्वर कुमारान लेगीत सुनीलाक दोन खेपे बाद केला.

आंद्रे रसेलान अंदूंच्या हंगामांत बॅट आनी बॉल दोनूय विभागांनी जबरदस्त कामगिरी केल्या. हो फॉर्म आयचे मॅचींत लेगीत कायम उरपाक शकता. ताणें हैदराबादाचे येसस्वी बॉलर टी नटराजन आनी भुवनेश्वर हांच्या आड वळेरेन 165.38 आनी 246.51चे स्ट्रायक रेटीन धांवड्यो केल्यात. ताची सरासरी लेगीत तांच्या आड वळेरेन 38 आनी 53ची आसा. नटराजनान रसेलाक फकत एकदा आनी भुवनेश्वरान दोन खेपे बाद केला. लेग स्पिनर मयंक मार्कंडेन रसेलाक दोन खेपे बाद केला आसलो तरी मयंकाक सध्यातरी हैदराबादाच्या पंगडांत सुवात ना. रसेलान मयंका आड 145.45चे स्ट्रायक रेटीन धांवड्यो केल्यात.

बॉलिंगेचो विचार केलो जाल्यार अभिषेक शर्माक रसेल आडावपाक शकता. ताणें अभिषेकाक दोन खेपे बाद केला. जाल्यार अभिषेक 122.22चे स्ट्रायक रेटीन रसेला आड धांवड्यो केल्यात.

फाटले मॅची वरवीं फॉर्मांत येवपी राहुल त्रिपाठीक लेगीत रसेलान चार खेपे बाद केला. जाल्यार त्रिपाठी ताच्या आड 165.21चे स्ट्रायक रेटीन धांवड्यो केल्यात.

अंदूंच्या हंगामांत 13 मॅचींनी फकत 11 विकेटी घेवपी भुवनेश्वरा खातीर ही व्हड मॅच थारुये. वेंकटेश अय्यराक सोडलो जाल्यार ताणें कोलकाताच्या दरेक बॅट्समनाक नाकापुरो केला. सुनील नरे, आंद्रे रसेल आनी नितीश राणा हांकां ताणें दरेकी दोन खेपे बाद केल्यात. श्रेयस अय्यराक तीन खेपे आनी मनीष पांडेक चार खेपे बाद केला. रसेलाक सोडलो जाल्यार हेर बॅट्समनांक भुवनेश्वरा आड 111चे स्ट्रायक रेटी परस चड धांवड्यो करपाक जमूंक ना.

टी नटराजन 17 विकेटी सयत हैदराबादाचो मुखेल बॉलर थारला. ताणें रिंकू सिंग आनी नितीश हांकां दरेकी तीन खेपे, वेंकटेश आनी रसेलाक एकदा बाद केला. पूण, डॅथ ओव्हरींनी आपल्यो चडश्यो ओव्हरी घालपी नटराजना आड हे सगले बॅट्समन किमान 160चे स्ट्रायक रेटीन धांवड्यो करतात.

ट्रॅव्हिस हेड, हॅन्रिक क्लासेन, अभिषेक, रसेल आनी सुनील ह्या बॅट्समनांक पळयले जाल्यार आयचे मॅचींत सक्यांचो पावस पडपाची शक्यताय आसा. अंदूंच्या हंगामांतले पावर प्ले, मदल्यो ओव्हरी आनी डॅथ ओव्हरींनी सगल्यांत चड सके आनी चवके ह्याच पंगडांनी मारल्यात.

हैदराबादान अंदूंच्या हंगामांत 160 जाल्यार कोलकातान 125 सके मारल्यात. कोलकाताक आयचे मॅचींत फिल सॉल्टाची गैर हाजेरी जाणावपाक शकता. ताणें पावर प्लेंत सगल्यांत चड 17 सके मारल्यात. इंग्लंडा वतीन खेळपाक तो घरा परतला.