भांगरभूंय | प्रतिनिधी
सुदिन ढवळीकारः दिवचले भुंयगत वीज केबल घालपाच्या कामाचें उक्तावण
भांगरभूंय । प्रतिनिधी
दिवचलः सकारात्मक नदर आसल्यारूच उदरगत जाता. तोक्ते वादळाक लागून भुंयगत वीज केबल घालपाची मागणी वाडल्या. शिस्त आसल्यार खंयचेच काम अडचें ना. फुडल्या एका वर्सां भितर वीज खात्यांत दोळ्यांत भरपा सारकी सुदारणा जातली. मुख्यमंत्री डॉ. प्रमोद सावंत हांच्या आदारान फाटल्या णव म्हयन्यांत 350 कोटींचीं वीज खात्याचीं कामां चालू केल्यांत, अशी म्हायती वीज मंत्री सुदिन ढवळीकार हांणी सांगलें.
दिवचल शारांत भुंयगत वीज केबल घालपाच्या उक्तावण सुवाळ्यांत मंत्री ढवळीकार उलयताले. ह्या वेळार आमदार डॉ. चंद्रकांत शेट्ये, नगराध्यक्ष कुंदन फळारी, सुखदा तेली, सतीश गांवकार, अनिकेत चणेंकार, विजयकुमार नाटेकार, दीपा पळ, दीपा शिरगांवकार, निलेश टोपले, रियाज बेग, प्रदीप रेवोडकार, अभियंते स्टिफन फर्नांडीस, रामचंद्र मुद्रस, तृप्ती गाड आनी हेर मानेस्त हाजीर आशिल्ले.
ग्रीन एनर्जी घराघरांनी सुरू करचे खातीर आदार करचो. सोलर पंप, सोलर एनर्जी खातीर फुडाकार घेवचो, असो मंत्री ढवळीकार हांणी ह्या वेळार उलो मारलो.
वीज वेवस्थेंत सेगीत येवपी आडखळी, तशेंच कांय वाठारांनी घातक स्थितींत आशिल्ले लायटीचे खांबे, एके सुवाते वयल्यान दुसरे सुवातेचेर हालोवचे पडपी लायटीचे खांबे, ह्यो सगळ्यो समस्या सुटाव्यो करचे खातीर दिवचल शारांत 11 केव्हीची भुंयत वीज केबल घातल्या, अशें आमदार डॉ. चंद्रकांत शेट्ये हांणी सांगलें. तशेंच 31 कोटींची ही येवजण खऱ्या अर्थान नवो बदल घडयतली, अशेंय तांणी म्हणलें.
वट्ट 45 किलोमिटर वाठारांत भुंयगत वीज केबल घालपा खातीर सुमार 32 कोटी रुपया मंजूर केल्यात. ही येवजण पुराय जाताच, दिवचलची वीज समस्या पुराय सुटावी जातली, अशें डॉ. शेट्ये हांणी सांगलें. स्टिफन फर्नांडीस हांणी येवकार दिलो. ऐश्वर्या च्यारी हांणी सुत्रसंचालन केलें जाल्यार रामचंद्र मुद्रस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
