भांगरभूंय | प्रतिनिधी
पणजी : भेसळ केल्लें, सकयल्या दर्जाच्या आनी भलायकेक माल थारपी खावपाच्या जिनसांची विक्री करून बोल्स भरपी वेवसायीकांचेर एफडीएन खर नदर दवरल्या. खंयचेर नेम मोडिल्ले दिसल्यार तांचेर कारवाय करतले. आतां उण्या दर्जाचे आलें- लसूण पेस्टीची विक्री केल्ल्या प्रकरणांत निर्माते-घाऊक विक्रेते-किरकोळ विक्रेते ह्या तिगांकूय दरेकी ५० हजार रुपयांचो दंड दितले.
एफडीएन जारी केल्ले म्हायती प्रमाण, कर्नाटक- पणजी- बार्देसांत कार्यरत आशिल्ले निर्माते-घाऊक-किरकोळ विक्रेत्यांचेर ही कारवाय कारवाय केली. आलें-लसूण पेस्टीची चाचणी केले उपरांत तातूंत ऍसिटीक ऍसीड (०.५५ टक्के)ची पातळी निर्धारीत मानकां परस उणी आशिल्ल्याचें दिसून आयिल्लें. एफडीएची अधिकारी सुजाता शेटगांवकार हांणी नोंद केल्ले कागाळीचेर कायदेशीर सोपस्कार केले उपरांत उत्तर गोंयच्या अतिरिक्त जिल्लो दंडाधिकार्यांनी तिगांक दरेकी ५० हजार रुपयांचो दंड दिलो.
मजगतीं, कांय दिसां पयलीं पर्वरी आनी सांगोल्डा भागांत कार्यरत आशिल्ल्या रेस्टॉरंटांची पळोवणी केली तेन्ना, एफडीएक तांचे रांदचे कुडींत निर्धारीत मानकां कडेन आडनदर करतना दिसले. उपरांत तीन रेस्टॉरंटां बंद करपाचे निर्देश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
