भांगरभूंय | प्रतिनिधी
सदानंद तानावडे: हरमल पंचक्रोशी संस्थेंत आंतरराष्ट्रीय परिशदेचें उक्तावण
हरमल: पेडणें म्हालांतली सगल्यांत व्हड संस्था म्हणल्यार हरमल पंचक्रोशी शिक्षण संस्था गोंयच्या तोंकाक ज्ञानदानाचें कार्य करीत आसा. पूण संस्थेचो विस्तार आनी कारभार उंचेल्या पांवड्याचो आसून गोंयांतल्या पालकांचो विस्वास सार्थ थारायिल्ल्यान संस्थेची वाटचाल यादींत उरपा सारकी जायत आसा अशें राज्यसभेचे खासदार आनी गोंय भाजप प्रदेशाध्यक्ष सदानंद शेट तानावडे हांणी म्हणलें.
गणपत पार्सेकार शिक्षणशास्त्र म्हाविद्यालय आनी उच्च शिक्षण संचालनालय हांच्या जोड पालवान आयोजीत केल्ल्या दोन दिसांच्या आंतरराष्ट्रीय परिशदेच्या उक्तावण सुवाळ्यांत ते उलयताले. ह्या वेळार माचयेर सावित्रीबाई फुले विद्यापीठ, पुणेंच्यो आदल्यो प्रा. श्रीमती मेघा उपलाने, संस्थेचे चेअरमन लक्ष्मीकांत पार्सेकार, प्राचार्य डॉ. पांडुरंग पंडीत, प्रा. कविता नायर हाजीर आशिल्ले.
संस्थेन फाटल्या वर्सा राष्ट्रीय परिशदेचें आयोजन केल्लें. ग्रामीण वाठार आसलो तरी संस्थेचे संस्थापक सर्गेस्त गणपत पार्सेकार हांणी ल्हानशें रोंप लायिल्लें आनी ताचो रूख करपाक आदले मुख्यमंत्री लक्ष्मीकांत पार्सेकार तशेंच मुख्याध्यापिका स्मिता पार्सेकार हांचें खूब मोटें योगदान आसा. दूरदिश्टी आशिल्ले लक्ष्मीकांत पार्सेकार सारक्या व्यक्तीमत्वान ह्या गांवांत शिक्षणीक क्रांती केली. ह्या परिशदेचें आयोजन शारी संस्थे परस उंचेलें आसा हें दिसून येता. ते खातीर आयोजकांचें अभिनंदन आशिल्ल्याचें तानावडे हांणी म्हणलें.
संस्थेचे चेअरमन लक्ष्मीकांत पार्सेकार हांचें व्हिजन आनी हेर पदाधिकाऱ्यांचे सहकार्य आशिल्ल्यान संस्थेचे येस लक्षांत येता. गोंयची धुरा सांबाळ्ळी आनी ती सांबाळटनाच ते पालक शिक्षक संघाचे बसकेंत लेगीत हाजीर रावताले. हो तांचो ध्यास खूब सांगून वता.
केजी ते पीजी मेरेनचो अभ्यासक्रम सुविधा आसा. नर्सींग आनी शिक्षणशास्त्र कॉलेजी उबारल्यो. विद्यार्थ्यांक राष्ट्रीय आनी आंतरराष्ट्रीय शिक्षण तज्ञांचें मार्गदर्शनाचो लाव मेळचो हे खातीर खूबशे उपक्रम चालू आसात. हे परिशदेंत विचारांचें दिवप-घेवप जालें तरूच परिशदेचो हेत फळादीक जातलो. ताचो लाव सगल्यांनी घेवचो आनी ज्ञानांत भर घालची अशें आवाहन खासदार तानावडे हांणी केलें.
पार्सेकर शिक्षणशास्त्र म्हाविद्यालयाच्या प्रांगणात आयोजीत केल्ली दोन दिसांची आंतरराष्ट्रीय परिशद हो एक वाटचिरो थारला. हे परिशदेंत शास्वत विकास ह्या भागांतलें चौथें कलम म्हणल्यार गुणवत्ता शिक्षण. हाचे खाला खूबशा पर्यायांचो अवलंब करप गरजेचें आसता. पर्यावरणीय, समाजीक आनी अर्थीक अशा भागांत शास्वत विकासाची बुन्याद घटमूट आसा. एकाचो परिणाम हेर घटकांचेर जायत आसता तो जावचो न्हय हे खातीर अशे उपक्रम राबोवंक जाय अशें मत प्रा. मेघा उपलाने हांणी उक्तायलें.
पार्सेकार शिक्षणशास्त्र म्हाविद्यालय आनी नर्सींग कॉलेज तशेंच नर्सरी ते उच्च माध्यमीक विद्यालय ही हरमल पंचक्रोशी संस्थे कडेन संलग्नीत आसात. ह्या आंतरराष्ट्रीय परिशदेचो लाव वेगळेवेगळे भाग आनी गोंयच्यान आयिल्ल्यांक खूब फायदेशीर थारतलो आनी ह्या परिशदेचें उद्दिश्ट फळादीक जातलो असो विस्वास लक्ष्मीकांत पार्सेकार हांणी उक्तायलो.
सुरवेक खासदार सदानंद तानावडे हांणी दिवली पेटोवन आनी सरस्वतीचे मुर्तीक फुलांहार घालून परिशदेचें उक्तावण केलें. म्हाविद्यालयाच्या विद्यार्थ्यांनी येवकार गीत सादर केलें. प्रा. सावियो डिसोझा हांणी सुत्रसंचालन केलें. प्रा. बर्था पिंटो हांणी मानेस्तांची वळख करून दिली. जाल्यार मोपकार हांणी उपकार मानले.
ह्या वेळार चेअरमन लक्ष्मीकांत पार्सेकार हांणी खासदार सदानंद तानावडे हांणी प्रा. मेघा उपलाने हांकां यदस्तीक भेटोवन तांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
