भांगरभूंय | प्रतिनिधी
भांगरभूंय । प्रतिनिधी
म्हापशेंः संस्था स्थापन करप सोपे मात ती तिगोवन दवोरप हे एक कठीण काम आसता. संस्था तिगपाक जाय जाल्यार तिच्या वांगड्यां मदी समजिकाय आसपाक जाय तशेंच आनी एकमेकाचे विचार आयकून घेवन म्हत्वाचें आसता अशें प्रा. सुभाष नायक हांणी सांगलें. बार्देश कोंकणी अस्मिताय केंद्राच्या रुप्या महोत्सवी वर्सा निमतान काडिल्ल्या बार्देश ह्या दिवाळी अंकाचें प्रकाशन केल्या उपरांत ते उलयताले. म्हापशेंच्या इंद्रधनुष्य सभाघरांत ही कार्यावळ जाली.
ह्या वेळार उद्देजक आनी लेखक डॉ गुरुदास नाटेकार, अनघा कामत, सोनाली चोडणकार, केंद्राची अध्यक्ष अपर्णा गारुडी, नूतन साखरदाडें, कुसुम अग्रवाल आनी हरिष कामत माचयेर आशिल्ले.
सामाजीक, सांस्कृतीक आनी शिक्षणीक मळार बार्देश कोंकणी अस्मिताय केंद्र फाटल्या 25 वर्सां सावन उल्लेखनीय वावर करीत आसा. सुरवेक दिवाळी अंक काडिल्लो. उपरांत कांय कारणांक लागून तो काडप शक्य जालें ना. नवे समितीन केंद्राचो कारबार पळोवपाक सुरवात केल्या उपरांत दिवाळी अंक काडपाचें थारायले. सगल्यांच्या सहकार्यान अंकाची निर्मणी जाली अशें अपर्णा गारुडीन सांगलें.
गुरुदास नाटेकारान केंद्राच्या वावपाची तुस्त केली. फुडाराक येवपी दिवाळी अंकात आपणे बरयल्ली कथा वा कवितेचो आसपाव आसतलो अशें तांणी सांगलें. दिवाळी अंक प्रकाशीत करपा खातीर अपर्णा गारूडी, नूतन साखरदांडे, गोविंद मोपकार, मानसी धावस्कार, अनघा कामत, सुभाष नायक, कुसुम अग्रवाल, हरीष कामत, सुचेता पै, सोनाली चोडणकार आनी समितीच्या वांगड्यांनी काडाओडी काडल्यो. निमाणे सोनाली चोडणकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
