भांगरभूंय | प्रतिनिधी
आमच्या देशांत शेंकड्यांनी भाशा, बोली आसात, सगल्योच संविधानाचे आठवे अनुसूचिंत गेल्ल्यो नात. हिंदी, कोंकणी, तेलगू, मराठी, तामिळ, कन्नड, गुजराती सारक्या कांय भाशांत तें वळेरेत स्थान मेळ्लां. खरेच नवी भाशा शिकप हे जरी कठीण काम आसले तरी करियराक खूब बरें पडटा. म्हज्या एका इश्टान सांगिल्ली गजाल म्हणल्यार, एक दोतोर जंय प्रॅक्टिस करता थंय ती बरी चलतलीच अशे ना. पूण आतां पळयत जाल्यार ताका वेळ ना. कित्याक तर तो कन्नड भाशा शिकलो. कारण ताचे चडशे दुयेंती कन्नडभाशक. दोतोराक भाशा शिकपाची आवड आशिल्ली. तो कन्नड शिकलो आनी कांय तेंपार सगले कन्नडभाशक दुयेंती हाचेच कडेन येवंक लागले. आचार्य विनोबा भावेन सांगलां, ते ज्या राज्यांत वताले थंय त्या राज्याची भाशा शिकताले. वेळांत वेळ काडून. तांकां बऱ्योच भाशा येताल्यो. ताका लागून तांकां उपरांत खंयुय गेल्यार बऱ्याक पडलें.
गोवा विद्यापीठ हें आमचे एकसुरे सरकारी विद्यापीठ. थंय गुजरातांतल्या एका खाजगी विद्यापीठाची भर पडल्या. ह्या विद्यापीठान पत्रा वरवीं अभ्यासक्रम सुरू करूंक नासले तरी म्हत्वाचे अभ्यासक्रम आसात, ते तुमकां गोवा विद्यापीठात वचूनच शिकचे पडटात. हातूंतलो एक अभ्यासक्रम म्हणल्यार संस्कृत. एका काळार ही भाशा देववाणी म्हूण वळखताले. देवांची ती मायभाशाच. ही भाशा ना जावपाचे वाटेर आशिल्ली. पूण केंद्र सरकार बदल्लें, भोवमानादीक नरेंद्रजी मोदी हांच्या फुडारपणा खाला सरकार सत्तेर आयलें आनी हे भाशेक बरे दीस आयले. सध्या गोंयांतल्या सगल्या शाळांनी बारवे मेरेन संस्कृत शिकपाची सुविधा आसा. फुडल्या वर्सा जे उमेदवार ही भाशा घेतले, तांणी ह्या फांट्यातली सौ. छत्रे हांकां जरुर मेळचें. ही भाशा शिकोवपाची आसूं वा अनुवाद करपाचें आसूं तुमी हातूंत करियर करपाक शकतात. एकूच जरी अणकार हातांत घेतलो जाल्यार तुमी कितलेंशेंच काम करपाक जाता.
सगल्यांनी संस्कृत भाशा शिकची म्हूण सौ. छत्रे खूब यत्न करतात. ती सांगता, ‘विद्यार्थ्यां खातीर आमी साबार विशयांच्यो कार्याशाळा घेतल्यो. संस्कृत पुस्तकांचें प्रदर्शन दवरलें. हैदराबादांतलो वक्तो हाडून ताचें व्याख्यान आयोजीत केलें. संस्कृत भाशे संबंदीच्यो सगल्यो कार्यावळी आमी घेतात. हे भाशेंत लेगीत करियराच्यो खूब संदी आसात. शिकोवपाचें काम करूं येता. शाळा, काॅलेज, विद्यापीठ पांवड्यारुय तुमकां शिकोवपाक मेळटा. तुमी आयुर्वेद काॅलेजींत शिकोवपाक शकतात. गोंयांत धारगळे आयुर्वेदीक महाविद्यालय आसा. आमच्या सगल्या भाशांतलें गिन्यान हे संस्कृत भाशेंत आसा, ताका लागून ती शिकप खूब म्हत्वाचें.’
संस्कृतांतलें गिन्यान शिकप हें संशोधनाचें काम म्हणू येता. ते खातीर ती पयलीं तुमकां शिकची पडली. तातूंतलीं पुस्तकां वाच्चीं पडलीं. प्रोजेक्ट सहायक, संशोधक, दुभाशी अशे जागे आसात. केंद्रीय परराष्ट्र खात्या कडेन ताचो संबंद येता. जे राजदूत वा हेर अधिकारी आसात, तांकां भाशेचो अणकार करून तो सांगचो पडटा. हें कटकटीचें काम आसलें तरी तें करचें पडटा. इंग्लीश वा हेर विदेशीं भाशांचीं मूळ पुस्तकां सोदपाक तुमकां विदेशांत वच्चें पडटा. पूण, संस्कृताचीं पुस्तकां वा हातबरपां सोदपाक तुमकां देशा भायर वचपाची गरज ना. हांगाच तीं मेळटात. कंटेन्ट डेव्हेलोपर, धर्मगुरू हे पद तर लश्करांतूय आसा. हाची जायरात लेगीत राष्ट्रीय दिसाळ्यांनी येता. पत्रकार, पर्यटक, निवेदक हांकां लेगीत हांगा संद मेळूं शकता. गोंय सोडून हेर सगल्या राज्यांनी तुमकां संस्कृत खबरा टिव्हीचेर आयकूंक मेळटा. थंय बातम्यो बरोवपाक, वाचपाक तुमकां संद मेळूं शकता.
पणजी आकाशवाणीचेर संस्कृत भाशेंतली कार्यावळ जाता. तातूंत पसून तुमकां संस्कृत साहित्याचेर उलोवपाक आपोवणें येवं शकता. संस्कृत नोकरे खातीर खंयच्याय फांट्यांतलो पदवीधर अर्ज करपाक शकता. जर तुमकां कितें कठीण लागता जाल्यार विद्यापीठाच्या संस्कृत विभागांत थेट वचून विचारूं येता. अशी प्रत्यक्ष भेट घेवप सदांच बरें. तांचे करियरा विशीं पुराय म्हायती दिवपी फ्लायर आसात. तांचे वेबसायटीचेरुय तुमी वचूं शकतात. कोणाक फोन करून विचारूं शकतात. संस्कृत भाशा शिकिल्ले कितलेशेच लोक गोंयांत आसात, तांकां तुमी विचारूं शकतात. भारतीय तत्वज्ञान, संस्कृती, व्याकरण, आमचें दायज कितें, हें जर तुमकां जाणून घेवपाचें आसा, जाल्यार ह्या संस्कृत अभ्यासक्रमाची गरज आसा. तेन्ना सगल्या पदवीधरांनी हाचो लाव घेवचो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
