भांगरभूंय | प्रतिनिधी
मंत्री रोहन खंवटेः सारस्वत समाजाचो अन्न आनी सांस्कृतीक महोत्सवाचो समारोप
भांगरभूंय । प्रतिनिधी
मडगांवः सारस्वत समाजान समाजाचे उदरगती खातीर एकवट दाखोवपाची गरज आसा. आपल्या कडेन आशिल्लें गिन्यान दुसऱ्यांक दिवन समाजाक गिरेस्त करीत रावचें. सारस्वत भवन ही काळाची गरज आसा. तशेंच आपली संस्कृती आनी पुर्वजांचें दायज सांबाळपाचे यत्न सगळ्यांनी करचे, अशें मंत्री रोहन खंवटे हांणी सांगलें.
मडगांवच्या बीपीएस क्लबांत तीन दिसांच्या सारस्वत अन्न आनी सांस्कृतीक महोत्सव 2024 ह्या सुवाळ्याचें आयोजन केल्लें. सारस्वत समाजाचे अध्यक्ष देश प्रभुदेसाय, आमदार विजय सरदेसाय, राजेश प्रभू ह्या वेळार हाजीर आशिल्ले.
आयतारा सकाळच्या सत्रांत गुणेस्त विद्यार्थ्यांचो सत्कार सुवाळो जालो. ह्या सुवाळ्याच्या समारोपा वेळार मंत्री खंवटे उलयताले.
सारस्वत समाजांतले खूबशे जाण विवीध मळार वावर करतात. सारस्वत समाजाची संस्कृती आनी खाद्यपदार्थाची रूच ह्या महोत्सवांतल्यान पळोवपाक मेळटा. आपली संस्कृती तिगची हे खातीरचे हे यत्न तोखणाय करपा सारके आसात. सगळ्यांनी ह्या यत्नांक तेंको दिवपाची गरज आसा. सारस्वत समाजांतल्या भावांचे उदरगती खातीर समाजान एकवटीत रावचे. आपले कडलें गिन्यान दुसऱ्यांक दिवन दुसऱ्यांक लेगीत गिन्यानाच्या प्रवाहांत हाडचे, अशें मंत्री खंवटे हांणी सांगलें.
सारस्वत समाजान एकठांय येवचे हे खातीर सारस्वत भवन ही काळाची गरज आसा. विजय सरदेसाय आनी आपूण विरोधी पक्षांत तशेंच सत्तेंत आसतनाय लेगीत एकवटींत काम केलें. आतां आपूण सत्तेंत आसा आनी तो विरोधी पक्षांत आसात. फुडें कितें जातलें, खबर ना. पूण आमकां दोगांगूय गोंया विशीं मोग आसा, गोंयचे उदरगती खातीर यत्न केल्यात. प्रधानमंत्री मोदी हांणीय लेगीत जातपातधर्म कुशीक दवरून युवा, गरीब, महिला, शेतकार ह्या चार आदारांचेर उदरगत करपाचें सूत्र दिलां. ते प्रमाण सारस्वत समाजान हेर समाजांक वांगडा घेवन उदरगत केल्यार गोंयचीय उदरगत शक्य जातली, अशेंय खंवटे हांणी सांगलें.
आमदार सरदेसाय हांणी सांगलें, सारस्वत समाजान अन्न आनी संस्कृतीचें दायज सांबाळून दवरलां. नव्या भुरग्यांक कला सादर करपाची संद दिल्या. सारस्वत समाजांतले मनीस हे हुशार आनी बुदवंत तशेंच दूरदिश्टी आशिल्लो समाज आसा. समाजान एकठांय येवन सारस्वत भवनाचें सपन पुराय करचे खातीर यत्न करचे, अशें तांणी सांगलें. सारस्वत समाजाचें सारस्वत भवन मडगांवां जावचें, असो विचार आसा. तातूंतल्यान फक्त हॉल न्हय जाल्यार कला, संगीत आनी विवीध विभागाचें शिक्षण समाजांतल्या भुरग्यांक दिवचें, हे खातीर यत्न करचे, अशी संकल्पना आसा. ते खातीर समाजांतल्या सगळ्यांनी जाता तितली मजत करपाची गरज आसा, अशें सारस्वत समाजाचे अध्यक्ष देश प्रभुदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
