भांगरभूंय | प्रतिनिधी
सभापती रमेश तवडकारः फुगडी, धालो महोत्सवाचें उक्तावण
भांगरभूंय । प्रतिनिधी
काणकोणः संस्कृती तिगली जाल्यारूच फुडली पिळगी तिगतली. संस्कृती संवर्धना खातीर बायलांचें योगदान म्हत्वाचें आसा. तांचे खातीर कायम स्वरुपी माची निर्माण जावपाक जाय, अशें मत काणकोणचे आमदार तशेंच सभापती रमेश तवडकार हांणी मांडलें. काणकोणच्या लता मंगेशकार कलांगणांतल्या सर्गेस्त संजय बांदेकार सभाघरांत कला आनी संस्कृती खात्यान आयोजीत केल्ल्या दीसभर चलपी फुगडी आनी धालो महोत्सवाचें उक्तावण केले उपरांत तवडकार उलयताले.
उक्तावण सुवाळ्याक काणकोणचे ज्येश्ठ साहित्यीक कमलाकर म्हाळशी, ज्येश्ठ पत्रकार आनी लोककलाकार अजीत पैंगीणकार, कला आनी संस्कृती खात्याचे संचालक सगूण वेळीप, सहाय्यक संचालक मिलिंद माटे, उपसंचालक आनंद कवठणकार हाजीर आशिल्ले.
कला आनी संस्कृती खात्यान एकाच वेळार बाराय म्हालांनी ह्या महोत्सवाचें आयोजन केल्लें. ह्या फुगडी, धालो महोत्सवांत काणकोण आनी केपें म्हालांतल्या 90 परस अदीक बायलांच्या पंगडांनी वांटो घेतलो. कांय पंगडांत मांय, सून, आवय आनी तिची धूव फुगडी, धालो घालताली. बायलोच खऱ्या अर्थान संस्कृती सांबाळपाचो वावर करतात. हे खातीर सगूण वेळीप हांणी येवकाराच्या उलोवपांत बायलांचें कवतूक केलें. प्रियांका गायक हांणी सुत्रसंचालन केलें. आकांक्षा हांणी सोयऱ्याक फुलांतुरे भेटयले. रामनाथ पै, शुभम नायक, हिरा महाले, रेश्मा सतरकार आनी हेर कर्मचाऱ्यांनी कार्यावळीक आदार केलो. मिलिंद माटे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
