भांगरभूंय | प्रतिनिधी
मुख्यमंत्री डॉ. प्रमोद सावंतः सांखळे शिगम्याचे कार्यावळींचें उक्तावण
भांगरभूंय । प्रतिनिधी
दिवचलः शिगमो उत्सवाच्या माध्यमांतल्यान गोंयची सांस्कृतीक गिरेस्तकाय, सर्व धर्म समभाव सांबाळटनाच गोंयचो सैम, पर्यावरण, रानां, सुकणीं- सावजां हांचेंय रक्षण करपाची जापसालदारकी दरेकल्यान घेवपाची गरज आसा. उज्याचो तांडव आडावपा खातीर दरेकल्यान सादुरसाण बाळगुची, अशें मुख्यमंत्री डॉ. प्रमोद सावंत हांणी सांगलें.
सांखळी शिगमो उत्सव कार्यावळींचें उक्तावण सुवाळ्यांत मुख्यमंत्री डॉ. सावंत उलयताले. ह्या वेळार माचयेर हेमा सरदेसया, नगराध्यक्ष राजेश सावळ, प्रियेश डांगी, रियाज खान, सिद्धी प्रभू, नगरसेवक आनंद काणेकार, दयानंद बोर्येकार, शुभदा सावयकार, यशवंत माडकार आनी हेर नगरसेवक हाजीर आशिल्ले.
सांखळेची उदरगत करचे खातीर भोवतेक येवजण्यो चालीक लागल्यात. काँग्रेसीच्या काळांत सुरू जाल्ले प्रकल्प आमी पुराय केल्यात आनी उदरगतीक व्हड दिशा दिल्या. आयज सांखळी गोंयांतलें दोन नंबराचें आदर्श शार जालां, रोखडेंच तें पयल्या नंबराचेर आसतलें, अशे तरेच्यो येवजण्यो आंखल्यात. नितळ, हरीत आनी विकासात्मक सांखळेचें सपन पुराय करपाचो ध्यास आमी घेतला, अशें मुख्यमंत्री डॉ. सावंत हांणी सांगलें.
हेमा सरदेसाय हांणी सांगलें, गोंयांतले सांस्कृतीक गिरेस्ततायेंत बायलो योगदान दितात. तांणी आनीक नेटान वांटेकार जावचे. मुख्यमंत्री डॉ. सावंत हे आदर्श असो वावर करतात. तांकां गोंयकारांचो पुराय तेंको मेळटा.
नगराध्यक्ष सावळ हांणी सांगलें, सांखळेचे उदरगतीक दिशा दिवचे खातीर आदाराची गरज आसा. उदरगत आडावची ना हाची जतनाय घेयात, असो तांणी उलो मारलो. मानेस्तां हस्तुकीं उत्सवाचें उक्तावण जालें. ह्या वेळार शिगमो मिरवणुकेक व्हड प्रतिसाद मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
