भांगरभूंय | प्रतिनिधी
3 काटांदर, 2 रान मांजरांक मरण
भांगरभूंय । प्रतिनिधी
पणजी : संसर्गजन्य दुयेंसाक लागून 3 काटांदर (सिवेट कॅट) आनी 2 रान मांजराक (वायल्ड कॅट) मरण आयिल्ल्यान बोंडला झू (प्राणीसंग्रहालय) लोकां खातीर बंद दवरलां. दुयेंसाची लागण जावची न्हय म्हूण राना खात्यान हें पावल उखल्लां. जनावरांचे दोतोर आनी राना खात्याचे अधिकारी दर दिसा परिस्थितीचो नियाळ घेतात. संसर्गजन्य दुयेंसाचो जंतू (विशाणू) पयस जाले उपरांत झू उक्तें जातलें, अशी म्हायती राना खात्याच्या अधिकाऱ्यांनी दिली.
मरण आयिल्ल्या जनावरांचे कुडीचे नमुने भोपाळचे प्रयोगशाळेंत धाडल्यात. अहवाल आयले उपरांत जंतू सयत दुयेंसा विशींची म्हायती स्पश्ट जातली. जंतू कसो तयार जालो? लागण कशी जाली? हे विशींचीं कारणां अजून राना खात्याक कळूंक ना. प्रयोगशाळेंतल्यान अहवाल आयले उपरांत दुयेंसाचें कारण स्पश्ट जातलें, अशी म्हायती राना खात्याच्या अधिकाऱ्यांनी दिली.
रान मांजरांक मरण आयले उपरांत 1 एप्रील सावन झू बंद आसा. झूच्या परीघांत जंतू नाशिल्ल्याची खातरजमा जाले उपरांत झू उक्तें जातलें. हाका कांय दीस वतले, अशी म्हायती अधिकाऱ्यांनी दिली.
हाचे पयली लेगीत बोंडला अभयारण्यांतल्या झू मदल्या जनावरांक मरण आयलां. पिराय जाले उपरांत जनावरांक मरण येता. नेमान जनावरांची तपासणी जाता, तरी सगळ्या दुयेंसांचेर उपाय जाय नात. रानमांजरांच्या मरणाक लागून झू बंद दवरपा विशींची म्हायती सरकाराक कळयल्या. बोंडला झू मदलें वातावरण तशेंच जंतूच्या संसर्गा विशींचो नियाळ दर दिसा घेवप सुरू आसा. स्थितींत सुदारणा जाले उपरांत पयली भशेन झू उक्तें जातलें, अशी म्हायती अधिकाऱ्यांनी दिली. इतले मजगतीं झू बंद दवरपा विशीं सरकाराक योग्य ती म्हायती राना खात्याच्या अधिकाऱ्यांनी दिवंक ना. संबंदीत अधिकाऱ्यांचेर योग्य ती कारवाय जातली, अशें राना खात्याचे मंत्री विश्वजीत राणे हांणी म्हणलां. बोंडला झूचे स्थितीचो नियाळ बसके वरवीं जातलो, अशें ताणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
