संसदेच्या वाणिज्य स्थायी समितीचे वांगडी सदानंद शेट तानावडे जाल्यार संरक्षण समितींत कॅ. विरियातो हांची नेमणूक

भांगरभूंय | प्रतिनिधी

पणजी ः वेगवेगळे प्रस्न हाताळपा खातीर संसदेन स्थायी समिती तयार केल्या. तातूंत राज्यसभेचे खासदार सदानंद शेट तानावडे हांची संसदेच्या वाणिज्य स्थायी समितीचे वांगडी म्हणून नेमणूक केल्या जाल्यार दक्षीण गोंयचे खासदार कॅप्टन विरियातो फर्नांडीस हांची देशाचे संरक्षण समितींत नेमणूक केल्या.
स्थायी समितीचेर काम करपाची संद मेळिल्ल्यान राज्याच्या उदरगती खातीर जें काम करप शक्य आसा तें करतलों अशें तानावडे हांणी सांगलें. तानावडे पयलेच खेपे राज्यसभेंत वेंचून आयल्यात. डोला सेन ही वाणिज्य स्थायी समितीची अध्यक्ष आसा.
खासदार कॅप्टन विरियातो फर्नांडीस हांची देशाचे संरक्षण समितींत नेमणूक जाल्या. मजगतीं, संरक्षण क्षेत्रांतल्या 25 वर्सांच्या प्रभावी कारकिर्दी खातीर कॅप्टन विरियातोची हे समिती खातीर निवड जाला.