भांगरभूंय | प्रतिनिधी
संसद हें देशांतलें सर्वोच्च सभाघर. बुधवारा प्रेक्षक गॅलरींतल्यान दोन तरणाटे भितर उडक्यो मारून आयले. तांणी भितर
येतकूच आपल्या बुटांतल्यान एक प्रकारचो हळडुवो स्प्रे (स्मोक क्रॅकर) हाडिल्लो. ताचो धुंवर तांणी सभाघरांत केलो. नेमकें 13 डिसेंबर ह्याच दिसा सुमार 22 वर्सां पयलीं संसदेचेर हल्लो जाल्लो, आनी तातूंत खूबश्या सुरक्षा रक्षकांक मरण आयिल्लें. तांकां आर्गां ओंपून जाले उपरांत कांय वेळांतच दोगां तरणाट्यांचो लोकसभा सभाघरांत प्रवेश अजापीत करपी थारलो. एखाद्या मॉलांत लेगीत प्रवेश करतना खर तपासणी करतात. लोकसभेंतूय प्रवेश करपा खातीर खर बंदोबस्त आसता. अशें आसून लेगीत घुसखोर आपले बरोबर स्मोक क्रॅकर कशे घेवन आयले. हो प्रस्न सर्वसामान्यांक पडप सभावीक आसा.
संसदेच्या सभाघरांत जशे दोन तरणाटे भितर सरले तेच प्रमाण भायर लेगीत कांय तरणाटे घोशणा दिताले. एकूणच हल्लो कित्या खातीर केलो हें अजून स्पश्ट जाल्लें ना. सरकारा आड घोशणा दिवपा खातीर ही घुसखोरी केल्या अशें म्हणटात. ह्या हल्ल्यांत फरारी आशिल्ल्या एकल्याक अटक केल्या. एकूणच ही घडणूक गंभीर आसा. आपल्या बुटांत ते स्मोक क्रकॅर द्रव्य कशें घेवन आयले? हो लेगीत एक प्रस्न आसा. हाचो अर्थ तांच्या बुटाची तपासणी सुरक्षा रक्षकांनी केली ना. दुसरें, एका खासदारान तांकां पास दिल्ले. ते पास दितना त्या खासदारान त्या लोकांची फाटभूंय तपाशिल्ली? जे दोग तरणाटे संसदेच्या सभाघरांत घुसले तांकां जो टायम दिल्लो, ताचे परस चड टायम ते भितर आशिल्ले. ते लेगीत सुरक्षा रक्षकांच्या लक्षांत कित्याक आयले ना? जंय मंत्रीमंडळांतले मंत्री थंय आसात. तशेंच देशांतल्या खूबशा मतदारसंघांनी वेंचून आयिल्ले विवीध पक्षांचे खासदार आसतात त्या संसदेची सुरक्षा अक्षरशा वाऱ्यार आसा. आतां हाची चवकशी सुरू आसा.
विशेश म्हणल्यार नव्या संसदेच्या सभाघरांत प्रेक्षक गॅलरींतल्यान सहजतायेन भितर येवंक मेळटा. पयलींचे संसदेंत ही प्रेक्षक गॅलरी उंच आशिल्ली ताका लागून भितर येवप कठीण जातालें. तरणाट्यांनी लोकसभेंत सभाघरांत उडक्यो मारल्यो. त्यो नव्यो प्रेक्षक गॅलऱ्यो सुमार पांच ते स फूट उंचायेर आसात. प्रेक्षक, पत्रकार आनी विशेश अभ्यागतांच्यो गॅलऱ्यो आनी प्रत्यक्ष सभाघर हांचे मदीं सुमार स फुटांचे अंतर आशिल्ल्यान थंय कोणूय मनीस सभाघरांत सहजतायेन उडी मारूंक शकता. खूबश्या खासदारांच्या मतान पोरणें संसदेची रचणूक चड सुरक्षीत आशिल्ली. थंयच्यो प्रेक्षक गॅलऱ्यो इतल्यो उंचायेर आशिल्ल्यो की कोणूय सभाघरांत उडी मारली जाल्यार तो रोखडोच सांपडटलो अशे नदरेन रचणूक आशिल्ली. ह्या गॅलरीचे पयले रांगेंत सुरक्षा रक्षक बसताले आनी तांची दरेक प्रेक्षका कडेन बाराकायेन नदर आसताली. कोणेंय सादी हालचाल केली वा पांयार पांय दवरून बसलो जाल्यार हे सुरक्षा रक्षाक रोखडेच तांकां ताकीद दिताले. नवे संसदेंत ही वेवस्थाच काडून उडयल्या अशें कांय खासदारांचें म्हणणें आसा. नवी संसद बांदतना सभाघराचो विचार कित्याक जालो ना? असोय खासदारांचो प्रस्न आसा. आंतां सुरक्षा रक्षकां मदले आठ रक्षक निलंबीत केल्यात.
तशें पळोवंक गेल्यार संसदेचें कामकाज आतां आमी टीव्ही चॅनलांचेर पळोवंक शकतात. ताका लागून ही प्रेक्षकांची सवलत बंद करची? हो लेगीत एक विचार जावंक शकता. जे हल्लेखोर ह्या कटांत वांटेकार आशिल्ले ते वेगळ्यावेगळ्या राज्यांतले आसात. संसद वाठारांत खूबश्यो संवेदनशील इमारती आसात. तो पुराय वाठार जमावबंदी खाला आसता. तरी लेगीत ह्या दोगांनी जो बोवाळ घालो हें कृत्य खरेंच गंभीर आसा. तांणी कांय घोशणा लेगीत भायर दिल्यो. एखाद्या प्रस्नाचेर निशेध करपाचो हक्क दरेकाक आसा. पूण संसदे सारक्या सर्वोच्च सभाघरांत आनी ताचे लागीं हो हक्क बजावूंक येवचो ना. संसद वाठारा कुशीक सुमार देड हजार पुलिसांचो बंदोबस्त आसता. इतलें आसून लेगीत अशी घडणूक घडची ही खरेंच अजाप करपा सारकी गजाल आसा. आतां तरी सरकारान हातूंत खंयच्यो त्रुटी आसात? हाचो अभ्यास करून ते प्रमाण खर सुरक्षा वेवस्था करची हीच अपेक्षा.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
