भांगरभूंय | प्रतिनिधी
लोकसभा वेंचणुके उपरांत संसदेचें दुसरें अधिवेशन काल सोमारा सुरू जालें. प्रधानमंत्री नरेंद्र मोदी हांच्या तिसऱ्या कार्यकाळांतलें हें दुसरें अधिवेशन आसलें तरी केंद्रीय अर्थसंकल्प आयज दुसऱ्या दिसा सादर जावपाचो आशिल्ल्यान सत्ताधारी आनी विरोधकां खातीरुय हें सत्र खूबच म्हत्वाचें. सगल्या भारतीयांचें लक्ष ह्या वेळार संसद कामकाजा कडेन लागून रावप सभाविकूच आसा. अर्थमंत्री निर्मला सीतारमण फाटोफाट सातव्या वर्सा केंद्रीय अर्थसंकल्प सादर करतात. ताका लागून तांची संसदेच्या इतिहासांत निश्चितूच नोंद जातली. मोदींच्या तिसऱ्या कार्यकाळांतल्या पयल्या अर्थसंकल्पांत नेमकें कितें आसतलें, हाची देशाक जशी उमळशीक लागून उरल्या तशीच विरोधी पक्ष फुडारी राहुल गांधी हांच्या फुडारपणा खालच्या ‘इंडी’ आघाडेची सभाघरांतली वागणूक कशी आसतली हाचे कडेनूय मुखेलपणान लक्ष आसतलें. विरोधकांनी फाटल्या सत्रांतलें धोरण चालूच दवरपाचो निर्धार केल्लो आसा जाल्यार ह्या सत्राचें कामकाजूय मान्सूनाच्या उदकांत व्हांवून वचूं शकता.
विरोधक आनी खास करून राहुल गांधी, अखिलेश यादव आदी फुडाऱ्यांची नरेंद्र मोदी हांच्या फुडारपणा सकयली राष्ट्रीय लोकशाय आघाडी भोवमत मेळोवन अधिकाराचेर आयल्या हे वास्तव मान्य करपाची अजूनय तयारी दिसना आनी तीच तांची मानसिकताय कायम उरल्यार ह्या सत्रांतूय सरकार पक्षाक आपल्या वाडिल्ल्या बळग्याच्या आदारान सातत्यान घेरपाचो विरोधकांचो यत्न आसतलो, हातूंत दुबाव ना. देशाचे जनतेन दिल्लो कौल आमचे खातीर विरोधी बाकड्यांचेर बसपा खातीरुच आशिल्ल्याचें मनाचेर कोरांतूनच विरोधी इंडी आघाडीन सभाघरांत सरकाराक सहकार्य करपाचें थारायलें जाल्यारुच हे खेप वेगळें चित्र दिसपाक शकता.
लोकसभेच्या वेंचणुकेंत विरोधी वांगड्यांचे संख्येंत जाल्ली घसघशीत वाड हेंच राहुल गांधी हांच्या इंडी आघाडेन मोदी सरकारा आड घेतिल्ल्या आक्रमक पवित्र्या फाटलें कारण आसलें तरी एकूण आक्रमकतायेकूय ज्यो कितें मर्यादां आसपाक जाय आशिल्ल्यो त्यो फाटल्या सत्रांत दिसूंक नात आनी ह्या अधिवेशनांतूय मणिपूरा सावन नीट परिक्षा आनी दिल्ली सावन उत्तरप्रदेशा मेरेन साबार मुद्द्यांचेर सरकाराचें लक्ष वेधपाक सभाघराक वेठीक धरपाचो विरोधकां कडल्यान यत्न जालो तर ताचें अजाप दिवपाचें कारण ना. काल पयल्याच दिसा नीट पेपर लीक प्रकरणांत विरोधकांनी केल्लो बोवाळ पळयल्यार फुडल्या कांय दिसांनी कितें चित्र आसतलें ताची कल्पना करपाक मेळटली. न्हयकारात्मक राजकारणूच
जर करपाचें आसा तर तें राजकी मैदानाचेर करून सरकार पक्षाक आव्हान दिवप शक्य आसतना संसदेचीं सभाघरांक ते खातीर वेठीक धरप कितलें योग्य, हाचो विचार जावपाक जाय. ताकाच लागून संसदेच्या चालू अधिवेशनांत निदान विरोधकांनी सकारात्मक भुमिका घेवन सरकाराक लक्ष्य करचें अशी अपेक्षा कोणे बाळगली तर तें चुकीचें थारचें ना. फाटल्या सत्रांत राष्ट्रपतींच्या अभिभाशणा वयले चर्चेक प्रधानमंत्री नरेंद्र मोदी जाप दितना सेगीत बोवाळ, गोंदळ करून तांकां आडावपाचो जो यत्न विरोधकांनी केलो तो खंयचेच परिस्थितींत स्वीकारपा सारको नासलो. अशे परिस्थितींत दुसऱ्या सत्रांत विरोधक सभाघराचें कामकाज गोंदळा बगर कितलें चलपाक दितलें, हाचो दुबावूच आसा.
विरोधी पक्ष फुडाऱ्याची घटनात्मक जापसालदारकी स्विकारले उपरांत राहुल गांधी हांची जापसालदारकी खूबच वाडल्या आनी सभाघराचें कामकाज सुरळीत चलपाक दिवपाक तांचीय भुमिका म्हत्वाची थारता हाचें भान जो मेरेन ते दवरिनात, तोमेरेन निदान तांचे कडल्यान सकारात्मक राजकारणाची अपेक्षा बाळगुपाक येवची ना. संसदेच्या फाटल्या अधिवेशनांतल्यान कामकाजाचो विचार केल्यार हे खेपेय जनहिताच्या जायत्या मुद्द्यां वयल्यान सरकाराचेर हल्लो चडोवपाची संद विरोधक सोडचे नात, हें स्पश्ट आसा, पूण हें सगलें गोंदळ, बोवाळ करिनासतनाय जावपाक शकता, हाचें भान विरोधकांक आसपाक जाय. अर्थांत विरोधकांच्या हल्ल्याक जशाक तशी जाप दिवपाची, तशें पळोवंक गेल्यार इल्लें चडून बळगें सरकार पक्षा कडेन आसा, सत्ताधारीय लेचेपेचे नात हें वळखून विरोधकांनी शितिदान पावलां घालीं जाल्यार सभाघरांत संघर्श जावपाचो ना. काल सोमारा अधिवेशन सुरू जावचे पयलीं प्रधानमंत्री नरेंद्र मोदी हांणी देशवासियां मुखार व्यक्त केल्ल्यो भावना खूब म्हत्वाच्यो थारपा सारक्यो आसात. आपापल्या पक्षांच्या मर्यादे भायर पडूनच दरेका राजकी पक्षाच्या फुडाऱ्यांनी देशाचो विचार करून सभाघरांत सकारात्मक भुमिका घेवपाचें आवाहन तांणी केलें. आपले राजकी अपेसाचेर, निराशेचेर पड्डो घालपाक न्हयकारात्मक राजकारण करपाचो यत्न जे कांय पक्ष करपाक लागल्यात, ताचे कडेनूय प्रधानमंत्र्यान लक्ष ओडलें आनी वेंचणुकेंत लोकांनी दिल्लो कौल मान्य करून लोकशायेच्या ह्या देवळांत देशहित दोळ्यां सामकार दवरून सरकाराक सहकार्य करपांतूच सगल्यांचें बरें आसा, असो जो सल्लो दिला, ताका लागून निदान विरोधकांचे दोळे उक्ते जाले तरी खूब जालें, अशें म्हणू येता.
फुडल्या कांय म्हयन्यांनी महाराष्ट्रा वांगडाच पांच राज्यांनी विधानसभा वेंचणुको जावपाच्यो आशिल्ल्यान सत्ताधारी आनी विरोधी आघाडे खातीर संसदेचें हें तीन- साडेतीन सप्तकां चडली अधिवेशन खूब म्हत्वाचें आसा. काँग्रेस आनी हेर विरोधी पक्षांक फक्त न्हयकारात्मक राजकारण करून मतां खातीर लोकां मुखार हात पातळपाक मेळचे नात, देखून तांकां संसदेंत प्रभावी कामगिरी करची पडटली आनी फक्त कामकाज बंद उडोवपाचेर भर दिवप विरोधकांक परवडपाचें ना. प्रधानमंत्री नरेंद्र मोदी आनी तांच्या पक्षा खातीर पांच राज्यांतली फुडली विधानसभा वेंचणुकांचो विचार केल्यार अर्थसंकल्प खूब म्हत्वाचो आसा. महाराष्ट्रा वांगडाच उत्तर प्रदेश, बंगाल आदी तीन- चार राज्यांत भाजपाक लोकसभा वेंचणुकेंत जो धक्को बसलो ताची विधानसभा वेंचणुकेंत भरपाय करपाचो तांचो यत्न आसतलो. केंद्रीय अर्थसंकल्पांतल्यान आतां मोदी सरकाराक निश्चितूच अशीं कांय पावलां उखलचीं पडटलीं कीं ताका लागून ह्या पांच राज्यांनी तांकां कांयशी थाकाय मेळटली. उत्तर प्रदेशांतूय धा विधानसभा मतदारसंघांत पोटवेंचणूक जाता. हे फाटभूंयेर आयज सभाघरांत सादर जावची अर्थसंकल्पांतल्यान लोकप्रीय अशा घोशणांचो पावसूय पडपाची शक्यताय आसा. महाराष्ट्र सरकारान हाचे आदींच लाडकी बहिण, लाडका भाऊ अश्यो कांय लोकप्रीय घोशणा करून त्यो येवजण्यो चालीक लायल्यात. उत्तर प्रदेश आनी महाराष्ट्र हीं राज्यां भाजपा खातीर खूब म्हत्वाचीं, हें खरें आसलें तरी विरोधकांकूय लोकसभा वेंचणुकेंतल्यान तांची शेणिल्ली वाट मेळ्ळ्या, अशें दिसता. संसद अधिवेशनांत विरोधकाचें ‘ये रे माझ्या मागल्या….’ हे म्हणी सारकें जावचें न्हय, हेंच तांचे खातीर हिताचें थारतलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
