भांगरभूंय | प्रतिनिधी
संसदेंत, विधानसभेंत हेतपूर्ण पद्दतीन विरोध नाका: ओम बिर्ला
पणजी: प्रत्येक पक्षाची विचारधारा वेगळी आसता. ताका लागून विधानसभा वा संसदेंत एखाद्या विशया विशीं मतभेद आसूंक शकतात. अशें आसलें तरी ताचेर सभाघरांत चर्चा, संवाद जावंक जाय. संसदेंत सगल्यांक आपलीं मतां मांडूंक मेळचीं हीच आमची भुमिका उरल्या. पूण नियोजीत आनी हेतपूर्ण पद्दतीन फक्त विरोध करप योग्य न्हय. हें संसदीय लोकशाये खातीर योग्य नाशिल्ल्याचें मत लोकसभा अध्यक्ष ओम बिर्ला हांणी उक्तायलें. शुक्रारा पणजेंत जाल्ले पत्रकार परिशदेंत ते उलयताले. ह्या वेळार सभापती गणेश गांवकार हाजीर आशिल्ले.
ओम बिर्ला हांणी म्हणलें, संसद वा विधानसभा ह्यो संस्था चर्चा, संवाद, सहमती, असहमती खातीरच आसात. आमी संसदेंत एखाद्या विशयाचेर उलोवपा खातीर सगल्यांक संद दिल्या. कांय वेळार थारिल्ल्या वेळा परस चड काळ चर्चा जाल्यात. कांय विधेयकांचेर रातीं उसरां मेरेन चर्चा जाल्यात. विचारसरणी, मतां वेगळीं वेगळीं आसूंक शकतात. पूण चर्चेंत सगल्यांचीं मतां, दृश्टीकोन येवंक जाय, हीच आमची भुमिका उरल्या. एक पिठासीन अधिकारी म्हूण निश्पक्ष रावप हें आमचें कर्तव्य आसा. ताका पाळो दिवपाचो आमी यत्न करतात.
तांणी म्हणलें, संसदेच्या सभाघरांत वा वाठारांत असंसदीय भाशेचो वापर करचो न्हय हे खातीर आमी आग्रही आसात. हालींच हे विशीं सगल्या पक्षांक कळीत केलां. संसदेंत अयोग्य भाशा, घोशणाबाजी नाका अशें स्पश्टपणान सांगलां. गोंयांत जाल्ल्या राष्ट्रकूल संसदीय संघाचे परिशदेंत अस्तंत विभागांतल्या राज्यांनी भायले भायर संवाद जालो. ह्या वेळार उद्देग, वेपार, पर्यटन, दर्या येरादारी ह्या विशयांचेर चर्चा जाली. विकसीत भारत 2047 चें सपन पुराय करपा खातीर तरणाट्या लोकप्रतिनिधींची भुमिका हे विशींय मार्गदर्शन केलां.
हे परिशदेंत गोंय, महाराष्ट्र आनी हेर राज्यांतले लोकप्रतिनिधी, विधानसभा सभापतींनी आपले अणभव मांडले. तांच्या मतदारसंघांतल्या बर्या पद्दतींची म्हायती दिली. अस्तंत विभागांतल्या राज्यांक ही म्हायती, अणभव नक्कीच उपेगी थारतली. लोकांच्या सहभागांतल्यान नवीं धोरणां आंखप गरजेचें आसा. विकासा सयत पर्यावरणाचो समतोल राखप गरजेचें आसा. परिशदे वरवीं संसदीय लोकशाय घटमूट करप, कामांत पारदर्शकताय आनी उत्तरदायित्व हाडपाचो आमचो यत्न आशिल्ल्याचें बिर्ला हांणी सांगलें.
पंचायत पांवड्या सावन ते दिल्ली मेरेन धोरणां, कायदे करपाक बायलांचें प्रतिनिधित्व वाडोवपाचो संकल्प पुराय जावपाच्या मार्गार आसा. नव्या संसद भवनांत महिला आरक्षण मंजूर जाल्लें. तेन्ना सगल्या पक्षांनी हाका तेंको दिल्लो. येता त्या अधिवेशनांत लेगीत सगल्या पक्षां बराबर चर्चा करून हे विशीं एकमत करपा खातीर यत्न करतले अशें ओम बिर्ला हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
