भांगरभूंय | प्रतिनिधी
विरियातो फर्नांडीस : . घटने प्रमाण समित्यांची बसका नेमान जावप गरजेचें
भांगरभूंय । प्रतिनिधी
पणजी : खासदारांनी लोकांचें प्रस्न संसदेंत उपस्थीत करप अपेक्षीत आसता. संसदेंत विवीध विरोधी पक्षांचे फुडारी ते मांडपाचो यत्न करतात. मात सध्या चालू आशिल्ल्या लोकसभा आनी रज्यसभा अधिवेशनांत विरोधी पक्षांचो आवाज चेपपाचो यत्न करतात, असो आरोप खासदार विरियातो फर्नांडीस हांणी केला. शेनवारा पणजे जाल्ले पत्रकार परिशदेंत ते उलयताले. ह्या वेळार सावियो डिसिल्वा आनी श्रीनिवास खलप हाजीर आशिल्ले.
संसदेच्या अधिवेशनांत विरोधी फुडाऱ्यांक उलोवपाक दिनात. लोकांचे नदरेन म्हत्वाच्या प्रस्नाचेर उलोवपाक उबे रावल्यार तांचे मायक बंद करतात. तशेंच तांचे वयले कॅमेरे दुसरे कडेन घुंवडायतात. घटने प्रमाण समित्यांची बसका नेमान जावप गरजेचें आसता, मात सध्या त्यो बसका लेगीत वेळार जायनात. लोकसभेंत दुसऱ्या दिसा खंयचे विशय येतले हाची म्हायती आदल्या दिसा दिवचे बदला आयत्या वेळार दितात, अशें फर्नांडीस हांणी सांगलें. लोकसभेंत 2019 उपरांत उपाध्यक्षाची निवड लेगीत करूंक ना. अर्थसंकल्पीय मागण्यां मदीं म्हत्वाच्या खात्यांचेर चर्चा जावंक ना. शुन्य वरांत देशांतल्या म्हत्वाच्या प्रस्नांचेर चर्चा जावपाक दिनात. संसदीय समित्यांचे अध्यक्ष वेंचतना विरोधी पक्षांक विस्वासांत घेनात. ह्यो सगळ्यो गजाली संसदीय लोकशाये खातीर घातक थारतात. ह्या गजालीं कडेन लक्ष दिवन संसद नेमां प्रमाण चलोवप, कामकाजांत पारदर्शकताय हाडप, अश्यो मागण्यो लोकसभा अध्यक्षां कडेन केल्यात, अशें फर्नांडीस हांणी सांगलें.
‘पक्ष म्हत्वाचो न्हय, गोंय म्हत्वाचें’
गोंयांत राजकी आरक्षणाच्या विधेयकाचेर फाटल्या अधिवेशनांत चर्चा जाल्ली. मात त्या वेळार तें मंजूर जावंक ना. सध्याच्या अधिवेशनांत तें मंजूर जातलें, अशी आमची आस्त आसा. मात तें लेगीत कामकाजांत अजून येवंक ना. संसदेंत गोंयचे तीन खासदार आसात. तातूंतलो एक मंत्री आसा. तिगांनी मेळून गोंयचे प्रस्न संसदेंत उपस्थीत करप गरजेचें आसा. पक्ष खंयचो हें म्हत्वाचें ना, गोंय म्हत्वाचें आसा, अशें विरियातो फर्नांडीस हांणी सांगलें.
तियात्राचेर खाजगी विधेयक
तियात्र समाजीक संदेश दितात. एप्रीलांत ह्या कला प्रकाराक 133 वर्सां पुराय जातलीं. तियात्राक युनेस्को दर्जो मेळचो, कलाकारांक निवृत्ती वेतन दिवचें, देशा भायर प्रयोग करपाक अनुदान मेळचें, हे खातीर लोकसभेंत खाजगी विधेयक मांडटले, अशें विरियातो फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
