भांगरभूंय | प्रतिनिधी
संसदेचें अधिवेशन सुरू जालां. 18 वे लोकसभेच्या अध्यक्षपदार परतून एकदां ओम बिर्ला हांची निवड केल्या. संसदीय कामकाज मंत्री किरेन रिजिजू हांणी हे विशींची घोशणा केली. आवाजी मतदानान ही निवड केली. ह्या वेळेचें लोकसभेचें वैशिश्ट्य म्हणल्यार सत्ताधारी पक्ष म्हणल्यार भारतीय जनता पक्ष पूर्ण भोवमतांत ना. तांकां राष्ट्रीय लोकशाय आघाडेंतल्या खूबश्या घटक पक्षांच्या तेंक्यार रावचें पडटलें. भाजपाचे 240 वांगडी आसात, आनी एकूण घटक पक्षांचे संख्येक लागून ही संख्या 294 आसा. ही परिस्थिती पयलेच फावटी फाटल्या 10 वर्सांत निर्माण जाल्या. फाटलीं धा वर्सां भाजप स्वताच्या बळग्यार सत्तेंत आशिल्लो. आतां परिस्थिती बदल्ल्या. विरोधी पक्षाचो विचार करीत जाल्यार काँग्रेस पक्षाचे शंबर खासदार आसात. आनी तांच्या इश्ट पक्षांचें मेळून 234 खासदार आसात. काँग्रेस पक्षाक फाटल्या धा वर्सांत पयलेच फावटी लोकसभेचें विरोधी पक्षफुडारीपद मेळ्ळां. सांगपाची गजाल म्हणल्यार सत्ताधारी पक्षाची शक्त उणी जाल्या आनी विरोधी पक्षाची शक्त वाडल्या.
विरोधक सरकाराक खूबश्या प्रस्नांचेर धारेर धरूंक शकतात. तातूंत नीट परिक्षेंतलो देशांत जाल्लो गोंदळ आनी ते निमतान उप्राशिल्ले खूबशे प्रस्न आसात. तशेंच म्हारगायेचेर विरोधी पक्ष बोट दवरूंक शकता. देशांत बेरोजगारी व्हड प्रमाणांत वाडल्या. ताचेर लेगीत सरकाराक कोंयडेंत धरप शक्य आसा. देशांत फाटले खूबशे दीस जाले गाजत आशिल्लो आनीक एक प्रस्न म्हणल्यार मणिपूर राज्यांतलो हिंसाचार आनी ते निमतान उप्राशिल्ली परिस्थिती. तशेंच बिहार आनी खूबश्या राज्यांनी चालू आशिल्लो आरक्षणाचो प्रस्न. तेचबरोबर जातीय जनगणना. देशांत कांय राज्यांनी सुरू आशिल्लो उटंगाराचो पावस हो प्रस्न लेगीत चर्चेक येवंक शकता. सरकाराक ह्या सगल्या प्रस्नांक जाप दितना खरस काडची पडटली. कारण हे फावटी विरोधी पक्षांचें संख्याबळ चड आसा. विरोधी पक्ष एकवटान सरकार पक्षाक कोंयडेंत धरूंक शकतात. संसदीय मार्गान हें करूंक शकतात. पूण सभात्याग वा कामकाज बंद उडोवप अश्यो असंसदीय गजाली करच्यो न्हय. विचारांची लडाय विचारांनीच खेळूंक जाय. ह्या 18 वे लोकसभेचें वैशिश्ट्य म्हणल्यार सत्ताधारी पक्षाचेर अंकूश दवरपाक घटमूट विरोधी पक्ष आसा. सत्ताधारी पक्षांतूय खूबशे अणभवी आनी अभ्यासू मनीस आसात. ते विरोधकांक कशे सामकार वतात हें आतां येता त्या कांय दिसांनी दिसून येतलें.
वायू प्रदुशण
हेल्थ इफेक्ट इन्स्टिटयुटान हालींच एक अहवाल वायू प्रदुशणा विशीं उजवाडायला. संवसारांत वायू प्रदुशणान खवदळ घाला. 2021 वर्सा सुमार 81 लाख लोकांक मरण आयिल्ल्याची खबर मुखार आयल्या. भारत आनी चीन ह्या दोन देशांनी मरण येवपाचें प्रमाण सगल्यांत चड आसून वट्ट मरणाचें तें 54 टक्के इतलें आसा. 2021 वर्स आदल्या खंयच्याय वर्सा परस वायू प्रदुशणांत चड मरण येवप्यां मदीं आशिल्लें थारलां. 2021 वर्सा पांच वर्सा पिराये खालच्या सुमार 169000 भुरग्यांक मरण हें फक्त वायू प्रदुशणाक लागून भारतांत जालां. भारता उपरांत नायजेरिया, पाकिस्तान आनी इथिओपिया ह्या देशांचो नंबर लागता. खूबश्या मरण आयिल्ल्या घटकां मदीं उच्च रक्तदाब, चुकीचो आहार, तंबाकू उपरांत चौथो घटक म्हणल्यार वायू प्रदुशण आसा. ही खबर हालींच वाचली. हवेंत जे ल्हान कण आसतात ताका लागून मरण येता. हें वायू प्रदुशण नश्ट वा उणें अशें करूं येतलें? हे खातीर वाहनांचो धुंवर उणो करूंक जाय. तेचबरोबर झाडांची व्हड प्रमाणांत लागवड आनी संगोपन करूंक जाय. नितळ उदक हो लेगीत म्हत्वाचो घटक आसा. पेत्रोल, डिझल हांचेर चलपी वाहनां उणी करून ताचे बदला बॅटरीचेर चलपी वाहनां कार्यान्वीत करप फायद्याचें थारतलें.
प्लास्टीक कोयर लेगीत उणो कसो करूं येतलो वा तो नानपयत कसो जातलो हाचेरूय विचार करूंक जाय. हे खातीर सरकारी पांवड्यार व्हड प्रमाणांत यत्न जावप गरजेचें आसा, जाल्यारूच वायू प्रदुशणांत उणाव जातलो. लोकांक दुशीत हवेचें म्हत्व कळूंक जाय. आयज दिल्ली, बंगळुरू तशेंच मुंबय ह्या शारांनी हवेचें प्रदुशण व्हड प्रमाणांत आसा. दिल्लींत जाल्यार कितलेशेच दीस शाळा बंद दवरिल्ल्यो. शाळेंतल्या खूबश्या भुरग्यांक स्वासाचो विकार उप्रासूंक लागलो. रस्त्या वेलीं वाहनां एका दिसा आड चलोवची पडटात. जेन्ना कोरोनाची धाम आशिल्ली आनी त्या वेळार सगली येरादारी बंद आशिल्ली. त्या वेळार हवेचें प्रदुशण सामकें उणें आशिल्लें. नितळ मळब हें ताचें निदर्शक आशिल्लें.
नीट परिक्षा: विद्यार्थ्यां मदीं निरशेणी वाडली
नीट परिक्षेंतल्या कथीत गूण गोंदळाचे फाटभुंयेर विद्यार्थ्यां मदीं एका प्रकारची निरशेणी दिसून येता. खूबश्या विद्यार्थ्यांक आपल्या फुडाराचो हुस्को लागला. कितल्याश्याच विद्यार्थ्यांक निरशेणेन पिडल्यात. हें सगलें पळोवन पालकांची लेगीत न्हीद खळ्ळ्या. खूबशे कडेन विद्यार्थी निदर्शनां करतात. खूबशे पालक आपली अर्थीक परिस्थिती जेमतेम आशिल्ल्यान रीण काडून विद्यार्थ्यांक शिक्षण दितात. हाचो चड त्रास प्रामाणीकपणान अभ्यास करपी खूबश्या विद्यार्थ्यांक जाता.
हालींच दरेक परिक्षेंत घोटाळो, अनियमीतताय दिसून येता. हाचो विद्यार्थ्यांचे मानसीकतायेचेर परिणाम जाता. पांच मे दिसा जाल्ले नीट परिक्षेचो निकाल 4 जूनाक जाहीर जालो. परिक्षेचो पेपर दिवपाक कळाव जाल्ल्याचे भरपाये खातीर 1563 विद्यार्थ्यांक चड गूण दिले. पैकींचे पैकीं म्हणल्यार 720 गूण मेळिल्ले 67 विद्यार्थी सांपडले. तातूंतले स विद्यार्थी एकाच केंद्रार सांपडले. हें सगलें प्रकरण न्यायालयांत गेले उपरांत चड गूण रद्द करून ते मेळिल्ल्या विद्यार्थ्यांक परतून परिक्षा दिवपाची संद दिवपाचो निर्णय घेतलो. हे परिक्षेंत 13 विद्यार्थ्यांक अटक जाल्या. तशेंच ह्या प्रकरणाची खोलायेन चवकशी सुरू आसा. एकूणच शिक्षणा सारक्या पवित्र मळार कितें जल्लां हें पळोवन पालक आपल्या भुरग्याच्या फुडारा विशीं सतर्क जाल्यात. हाचेर कितेंय तरी उपाय येवजून पालकांक परिक्षा पारदर्शकपणान घेवन थाकाय दिवपाची गरज आसा. भुरग्यांच्या फुडाराचो हो प्रस्न आशिल्ल्यान ह्या प्रस्ना कडेन सरकारान गंभीरतायेन पळोवपाची गरज आसा.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
