भांगरभूंय | प्रतिनिधी
राज्यसभेंत तानावडे हांचे 133 जाल्यार लोकसभेंत विरियातो हांचे 36 प्रस्न
भांगरभूंय । समीप नार्वेंकार
पणजी : संसदेंत प्रस्न मांडपा संबंदांत राज्यसभा खासदार सदानंद शेट तानावडे हांणी दक्षीण गोंय खासदार विरियातो फर्नांडीस हांचे परस सरस कामगिरी केल्या. तानावडे हांणी राज्यसभेंत 100 परस चड प्रश्न मांडल्यात जाल्यार विरियातो हांणी फक्त 36 प्रश्न मांडल्यात. चर्चासत्रांनी वांटेकार जावपांत विरियातो हांची तानावडे परस बरी कामगिरी आसा.
संसंदेच्या 18 व्या अधिवेशनाचें चवथें सत्र 31 जानेवारी सुरू जावन 4 एप्रीलाक सोंपलें. वट्ट 27 दीस चलिल्लें राज्यसभा आनी लोकसभा अधिवेशनाच्या कार्यकाळांत गोंयच्या दोनूय खासदारांनी केल्ले कामागिरीचो नियाळ घेतला. तांणी संसंदेंत केल्ले कामगिरी विशींचो तपशील राज्यसभा आनी लोकसभेचे वॅबसायटीचेर उपलब्ध आसा.
18 व्या अधिवेशनांत दक्षीण गोंयचे खासदार विरियातो फर्नांडीस हांणी लोकसभेंत 36 तारांकीत आनी अतारांकीत प्रश्न मांडले. पूण राज्यसभा खासदार सदानंद शेट तानावडे हांणी राज्यसभेंत तारांकीत आनी अतारांकीत मेळून 133 प्रश्न मांडल्यात. जाल्यार विरियातो हांणी दोन विधेयकां, 1 आस्वासन, 3 विशेश उल्लेख मांडून 11 चर्चासत्रांनी वांटो घेतला. जाल्यार तानावडे हांणी शुन्य विधेयक आनी आस्वासन, 6 विशेश उल्लेख मांडून एकूय चर्चासत्रॆत वांटो घेवंक ना. मजगतीं, विरियातो हे एक समितीचे वांगडी आसात जाल्यार तानावडे हे 2 समित्यांचे वांगडी आसात.
ह्या 27 दीस चलिल्ल्या अधिवेशनाच्या सत्रांत तानावडे संसदेंत 25 दीस हजर आशिल्ले आऩी 2 दीस गैरहजर आशिल्ले. जाल्यार विरीयातो हे 1 दीस गैरहजर आऩी 26 दीस हजर आशिल्ले.
लोकसभा खासदार विरियातो फर्नांडीस हांणी बंदर, बोट आनी न्हंय येरादारी, रस्ते येरादारी आनी म्हामार्ग, शेतकी आनी शेतकार कल्याण, पर्यावरण, रान आनी हवामान बदल, संस्कृती, जल शक्ती, गृहनिर्माण आनी शार वेव्हार, रेल्वे, शिक्षण, कायदो आनी न्याय, संचार, नुस्तेमारी, गोरवां सांबाळ आनी डॅरी, पर्यटन, परराष्ट्र वेव्हार, आदिवासी वेव्हार, गिरायक वेव्हार, अन्न आनी नागरी पुरवण, नागरी उड्डाण, पृथ्वी विज्ञान आनी वित्त मंत्रालयांक प्रश्न विचारल्यात. राज्यसभा खासादार तानावडे हांणी अन्न प्रक्रिया उद्देग, कायदो आनी न्याय, कामगार आनी रोजगार, पर्यावरण, रान आनी हवामान बदल, आदिवासी वेव्हार, पंचायती राज, सहकार, वित्त, गिरायक वेव्हार, अन्न आनी नागरी पुरवण, आयुष, इलेक्ट्रॉनिक्स आनी म्हायती तंत्रगिन्यान, ग्रामीण उदरगत, जड उद्देग, वाणिज्य आनी उद्देग, विज्ञान आनी तंत्रगिन्यान, पंचायती राज, संचार, रस्ते येरादारी आनी म्हामार्ग, शिक्षण, वीज, लघू, ल्हान आनी मध्यम उद्देग, नागरी उड्डाण, गृह, नवीन आनी अक्षय उर्जा, रसायन आनी सारें, संसद वेव्हार, गृह निर्माण आनी शार वेव्हार, अन्न प्रक्रिया उद्देग, युवा वेव्हार आनी खेळ, पर्यटन, समाजीक न्याय आनी सक्षमीकरण, भलायकी आनी कुटूंब कल्याण, बोट आनी न्हंय येरादारी, अल्पसंख्याक वेव्हार, कार्मीक भौशीक गाराणीं आनी पेन्शन, कुशळटाय उदरगत आनी उद्देजकता, कॉर्पोरेट वेव्हार, पेट्रोलियम आनी गॅस, जल शक्ती, संस्कृती, परराष्ट्र वेव्हार, बायलां आनी भुरगीं उदरगत, सांख्यिकी आनी उपक्रम अंमलबजावणी मंत्रालयाक प्रश्न विचारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
