भांगरभूंय | प्रतिनिधी
नवी दिल्ली, खबरां संस्था ः भारतांत सोरोप चाबप ही एक गंभीर स्मस्या. दर वर्सा सुमार 58 हजार लोकांक सोरप चाबून मरण येता. एक लाख 40 हजार लोक दिव्यांग जातात. संवसारांतलो हो सगळ्यांत चड आंकडो आसा.
उंटांतल्यान तयार केल्ल्या अँटीबॉडीजाक लागून आतां सोरपाच्या विखाचेर उण्या खर्चाचो, सुरक्षीत उपचार मेळूंक शकतात अशें एका संशोधनांतल्यान दिसून आयलां. गांवगिऱ्या वाठारांतल्या दुयेंती खातीर हो एक बरो पर्याय थारुंक शकता. कारण ह्या वाठारांत सोरोप चाबप आनी वेळार वैजकी सेवा ना मेळप ही एक गंभीर समस्या आसा.
संशोधन कोणें केलें?
बीकानेरच्या नॅशनल रिसर्च सेंटर ऑफ कॅमल (NRCC) शास्त्रज्ञांनी उंटाच्या दुकां विशीं संशोधन केलां. हातूंत उंटाच्या दुकां पसून मेळपी प्रतिपिंड वा अँटीबॉडीज आनी तांची रोगप्रतिकार शक्त वापरून सोरपाच्या विखा आड झुजपा खातीर एक बरो पर्याय जाव येता अशें दिसून आयलें. फकत एनआरसीसीन न्हय तर जायत्या संस्थांनी हाचे पयलीं अशें संशोधन केलां. लिव्हरपूल स्कूल ऑफ ट्रॉपिकल मेडिसीनांतल्या सोरपाच्या चाबपाचेर केल्ल्या संशोधनांत उंटाच्या दुकांचो उपेग करून सोरपाच्या विखाचेर वखद तयार करूं येता अशें म्हणलां. हीं उंटांचीं दुकां 26 प्रकारच्या सोरपांचे विख निश्क्रीय करपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
