भांगरभूंय | प्रतिनिधी
नालंदा विद्यापिठाच्या नव्या कॅम्पसाचें उक्तावण
नालंदा, खबरां संस्था ः देशांतली उच्च शिक्षण वेवस्था चड प्रगत आनी संशोधन प्रधान करपा खातीर केंद्र सरकार वावुरता अशें प्रधानमंत्री नरेंद्र मोदी हांणी काल स्पश्ट केलें. इतिहासीक नालंदा विद्यापिठाच्या नव्या कॅम्पसाचें उक्तावण केले उपरांत ते उलयताले. विद्यार्थ्यांक सदांच जिज्ञासू आनी निर्भय रावपाचें उलो प्रधानमंत्र्यान मारला.
भारताक गिन्यानाचें आनी शिक्षणाचें संवसारीक केंद्र जावपाची इत्सा आसा. फाटल्या धा वर्सांत देशांत दर सप्तकांत सरासरी एक विद्यापीठ स्थापन जाला अशें मोदी हांणी सांगलें. शिक्षणांत बरीच उदरगत केले उपरांतच अर्थीक तशेंच संस्कृतीक मळार बरी कामगिरी करप हो विकसीत राश्ट्रांचो इतिहास. 21 जूनाक जावपी आंतरराष्ट्रीय योग दिसाचो उल्लेख करतना भारत संवसारीक पांवड्यार सांस्कृतीक दिवप- घेवप करता असो उल्लेख प्रधानमंत्र्यान केलो. विक्रमी संख्येन तरणाटे संशोधन करपा खातीर मुखार येतात आनी ताचे खातीर सरकारान एक लाख कोटी रुपयांची तरतूद केल्या. कुशळ आनी अत्याधुनीक उच्च शिक्षण वेवस्था तयार करप हो आमचो हेत, अशेंय तांणी सांगलें. सध्या देशांत 23 आयआयटी आनी 21 आयआयएम आसात. धा वर्सां आदीं हो आंकडो फक्त 13 आशिल्लो. तशेंच एम्स 22 आसा आनी धा वर्सांत वैजकी म्हाविद्यालयांचो आंकडो दुपेटीन वाडला अशें प्रधानमंत्री हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
