भांगरभूंय | प्रतिनिधी
न्यूयाॅर्क, खबरां संस्थाः हालींच जाल्ल्या एका अभ्यासांत मनोरंजक आनी अजापीत करपी गजाल दिसून आयलां. धर्तरे परस चंद्राचेर वेळ चड नेटान वता. अल्बर्ट आयन्स्टायनाच्या सामान्य सापेक्षता (General Relativity) सिद्धांताचेर आदारिल्ल्या ह्या सोदाचो फुडल्या अंतराळ मिशनांचेर मुखेल परिणाम जावंक शकतात, खास करून नासाच्या आर्टेमिस कार्यावळी खाला अंतराळवीरांक परतून चंद्राचेर धाडपाची तयारीचेर हाचो व्हड परिणाम जावपाची शक्यताय आसा.
चंद्राचेर वेळ चड नेटान कित्याक वता?
एका नव्या अभ्यासा प्रमाण, चंद्राचेर वेळ गतीन वचपाचें मुखेल कारण म्हणल्यार चंद्राचेर आशिल्लें गुरुत्वाकर्शण. चंद्राचेर आशिल्लें गुरुत्वाकर्शण धर्तरे वयल्या गुरुत्वाकर्शणा परस उणें आसता. आयनस्टायनाच्या सिद्धांता प्रमाण मजबूत गुरुत्वाकर्शण क्षेत्रांत वेळ ल्हव ल्हव फुडें वता. जंय दुबळ्या गुरुत्वाकर्शण क्षेत्रांत वेळ चड नेटान फुडें वता. चंद्राचें गुरुत्वाकर्शण धर्तरेच्या फकत सव्या वांट्याचें आशिल्ल्यान चंद्राचेर वेळ मात्सो चड नेटान फुडें वता. हो फरक खूब ल्हान आसा. दर दिसा फकत सुमार ५६ मायक्रोसेकंद वा ०.००००५६ सेकंद इतलें ताचे प्रमाण आसता. पूण फुडल्या अंतराळ मिशनांची येवजण करतना शास्त्रज्ञांक हाचो विचार करचो पडटलो हें निश्चीत.
शास्त्रज्ञांनी हें कशें सोदून काडलें?
हें संशोधन अॅस्ट्रोनॉमिक जर्नलांत (Astronomical Journal) उजवाडाक आयिल्ल्या ह्या संशोधनाचे श्रेय नॅशनल इन्स्टिट्यूट ऑफ स्टँडर्ड्स अँड टेक्नॉलॉजीच्या (NIST)’ बिजुनाथ पाटला आनी नील अॅशdबी हांकां वता. वेगवेगळ्या ऑनलायन माध्यमांनी सादर केल्ले म्हायती प्रमाण तांणी आयनस्टायन हांच्या सामान्य सापेक्षता सिद्धांताचो उपेग करून गुरुत्वाकर्शणाचो वेळाचेर कसो परिणाम जाता हाचो हिशोब केलो. धर्तरी आनी चंद्र अंतराळांतल्यान कशे घुंवतात, तांचो एकमेकांच्या गुरुत्वाकर्शणाचेर कसो परिणाम जाता अशा म्हत्वाच्या घटकांचो तांणी विचार केलो. ह्या सगळ्या गजालींचो विचार करून चंद्राचेर आशिल्लें घडयाळ धर्तरे वयल्या घडयाळा परस धर्तरेच्या एका दिसा उपरांत 56 मायक्रोसेकंद फुडें वता असो निश्कर्श तांणी काडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
