भांगरभूंय | प्रतिनिधी
हरमल: सांखळेच्या संवेदन केंद्र आनी गणपत पार्सेकर कॉलेज ऑफ एज्युकेशन हांच्या मदीं काल एका म्हत्वाच्या कबलातीचेर (MoU) सय जाली. गोंय राज्याच्या कातकरी समाजाच्या शिक्षणिक मळार संशोधन करपाच्या हेतान ही कबलात केल्ल्या.
गोवा स्टेट रिसर्च फाऊंडेशनच्या ‘आयआरआयएस-एलडी’ (IRIS-LD) प्रकल्पांत खाला हो सहकार वावर चलता. समाजांतल्या वंचितांक, विशेश करून कातकरी समाजाक शिक्षणाच्या प्रवाहात हाडप हें ह्या प्रकल्पाचें मुखेल ध्येय आसा.
ही कबलात तीन वर्सांखातीर केल्ली आसा. हरमला जाल्ले हे कार्यावळीक संस्थेचे अध्यक्ष आनी गोंयचे आदले मुख्यमंत्री लक्ष्मीकांत पार्सेकार हे खासा हाजीर आशिल्ले. तशेंच संवेदन केंद्राचे प्रकल्प संचालक नमन सावंत, उपाध्यक्ष दिनेश सावंत, प्रकल्प वेवस्थापक दशरथ मोरजकार, प्रकल्प शिक्षणतज्ञ बाबनी मापारी, अध्यक्ष माधवी राणे हाजीर आशिल्ले.
संवेदन केंद्राच्या वावराची दखल गोंयांतल्या नामनेच्या शिक्षणिक संस्थेन घेवप ही सगळ्यां खातीर अभिमानाची गजाल आसा. समाजांतल्या उपेक्षित घटकांच्या उदरगती खातीर आनी संशोधना वरवीं तांकां बळकट करपा खातीर, ही संस्था बांदील आसा, अशें संवेदन केंद्राच्या वांगड्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
