संवेदनशील सीएए

भांगरभूंय | प्रतिनिधी

केंद्र आनी राज्य सरकारांक हो सीएए, नागरिकत्व प्रस्न… समाजाच्या हिता खातीर, शांती खातीर संवेदनशीलपणान, जापसालदारकेन हाताळचो पडटलो.

खंयच्याय देशांत अन्याय, अत्याचार जाता त्या नागरिकांक रेड क्राॅस वा मानवाधिकार संघटणां आलाशिरो दितात. वर्साचीं वर्सां तंबूंत रावन परावलंबी जीण जखमी कोट्यांनी लोक संवसारभर आसात. दोन देशां मदलो, दोन विचारसरणेच्या सत्ताधीश, राजकी पक्षां मदलो संघर्श हाचे फाटल्यान आसा. कांय कडेन पोट भरपा खातीर लोकांनी देशांतर्गत स्थलांतर केल्लें दिसता. तर तातूंतले कांय जाण धर्मांध शक्तींच्या चपक्यांत सांपडिल्ल्यान संबंदीत देशाक बाधक थारल्यात. कांय लोकांचेर ओगीच तशे आरोप करून तांकां वर्साचीं वर्सां बंदखणींत घालपाचेय प्रकार संवसारांत घडल्यात. मुळांत सत्ता संघर्शांत देश अस्थीर जाल्ल्यान वा महासत्तांनी सुवार्था खातीर तो केल्ल्यान लाखांनी निश्पाप लोक भिकेक लागल्यात. तांकां देश सोडचो पडला. कांय देशानी धर्मांध सत्ता, संघटणां अल्पसंख्यांकांचेर अत्याचार, अन्याय करतना दिसतात. हाकाच लागून भारतान सीएए (नागरिकत्व दुरुस्ती विधेयक) अधिसुचोवणी तयार केल्या. दोन दिसां पयलीं ती चालीक लागल्या. ताचे वरवीं पाकिस्तान, बांगलादेश आनी अफगाणिस्तान ह्या तीन देशांतल्या धर्मीक अल्पसंख्यांकांक (हिंदू, बौद्ध, जैन, शीख, पारशी आनी क्रिस्तांव) भारतीय नागरिकत्व दिवपाची तजवीज आसा. सध्या ते खातीर 11 वर्सां भारतांत रावन कायदेशीर सोपस्कार पुराय करचे पडटाले. पूण आतां सीएएक लागून स वर्सां भितर सोंपेपणी तांकां भारतीय नागरीक जावपाक मेळटलें.
चार वर्सां पयलीं ह्या सीएए वयल्यान रान पेटिल्लें. ताकाच लागून तें इतलीं वर्सां आडकून उरिल्लें. डिसेंबर 2019 ताका संसदेंत मान्यताय मेळिल्ली. अल्पसंख्यांकांक भारतांतल्यान धांवडावन घालतले, अशें बरेच जाण म्हणटाले. मात आतां, सरकारान भारतीय नागरिकांक हाचो कसलोच त्रास जावचो ना, अशें स्पश्ट केलां. पूण, पयलींच्या आपल्या मताचेर बरेच विरोधक ठाम आसात. केरळ, तामीळनाडू, अस्तंत बंगालांत हो कायदो लागू करचे नात, अशें म्हणलां. ईशान्ये कडल्या राज्यांनीय आदिवासीं सयत कांय समाजांचो ताका विरोध आसा. पूण लोकसभा वेंचणुको जाहीर जावपाच्यो आसात. राममंदीर, सीएए, 370 कलम, तलाक रद्द करप… अशे साबार मुद्दे, धोरणांचो प्रचार भाजपा वतीन हे वेंचणुकेंत जातलो. ताचो फायदो पक्षाक जातलो काय ना, हें अर्थांत निकाला दीस कळटलें.
31 डिसेंबर 2014 पयलीं शेजराच्या तीन देशांतल्यान कोण आयिल्ले तांकां सीएए वरवीं भारतीय जावपाक मेळटलें. हे खातीर सरकारान खाशेली वॅबसायट तयार केल्या. सगले वेव्हार आॅनलायन. कारण थंयच्यान बरेच हिंदू हांगा आयल्यात आनी ते निर्वासीत म्हूण हांगा जगतात. हातूंत आनीक एक गजाल आसा. ती म्हणल्यार 1970 च्या दसकांत बरेच बांगलादेशी अस्तंत बंगाल आनी ईशान्ये कडल्या राज्यांनी आयल्यात. तांचे कडेन रेशनकार्ड आनी हेर कागदां आसात. आसामा सारक्या राज्यांनी तर थंयचे अर्थवेवस्थेचो ते वांटो जाल्यात. हातूंत मुस्लीम आसात, तशेच हिंदूय. ह्या आदल्या घुसखोरांक सीएएक लागून काम- धंद्या वांगडा देशूय सोडचो पडटलो, अशें दिसपाक लागलां. संबंदीत राज्यांनी तांचे कांय लोकां कडेन हिंसक संघर्शूय जाल्यात. तांचो प्रस्न राज्य सरकारांक योग्य पद्दतीन हाताळचे पडटले. कारण सगल्यांक सरसकट आतंकवादी हें लेबल लावंक मेळचे ना. तशे कोण आसात, जाल्यार तपास यंत्रणेक तें पुराव्यान सिद्ध करचें पडटलें. कारण आरोप जावप वेगळें आनी ते सिद्ध जावप वेगळें!
हालींच्या वर्सांनी भारतांत घुशिल्ल्यांचें कितें? देशांत रोहिंग्या मुस्लीमूय आसात. आमच्या गोंयांतूय लाखांनी रोहिंग्या आसात, असो आरोप फाटीं जाल्लो. पूण तपास यंत्रणांनी ते नदरेन नेटाचो तपास करूंक ना. एक -दोन कडेन ते सांपडिल्लेय, पूण उपरांत तांकां परत देशा भायर धाडले काय नात, तें कळूंक ना. पाकिस्तान, अफगाणिस्तानांतल्यान हिंदू, क्रिस्तांव चड प्रमाणांत येवंक शकतात, पूण बांगलादेशांतल्यान ते येतलेच अशें म्हणपाक मेळचे ना. कारण पयल्या दोन देशांनी सारकी थंय परिस्थिती ना. धर्मीक तणाव आसा, ना अशें न्हय. हेर देशांनीय लाखांनी हिंदू, बौद्ध, जैन, शीख आसात, तेय तो देश सोडून येत अशें दिसना. सीएएक लागून नेमके कितले अल्पसंख्यांक भारतांत येतले. तांकां घरां, नोकरी, साधनसुविधा खंयच्यान दितले, थळाव्यांक तो आपणाचेर अन्याय कसो दिसचो ना, हाचेरूय लक्ष दिवचें पडटलें. सध्या कश्मीरांत पंडितांचें पुनर्वसन जावपाक जाय, मागीर भायल्यांचें पळोवया, अशी टिका कांय विरोधक करतात. येवपी दिसांनी सीएए विरोध खर जावं येता. ताका धर्मीक रंग येवपाचीय भिरांत आसा. केंद्र आनी राज्य सरकारांक हो सीएए, नागरिकत्व प्रस्न… समाजाच्या हिता खातीर, शांती खातीर संवेदनशीलपणान, जापसालदारकेन हाताळचो पडटलो.