भांगरभूंय | प्रतिनिधी
पणजीः भारतीय जनता पार्टी संविधान हत्या दीस शाळांनी मनोवन विद्यार्थ्यांच्या मनांत वीख पातळायता. गोंयांक पिडपी विशय लिपोवपा खातीर भाजपा ह्या सारिकिल्ले दीस पाळटात. सद्दां भारतांतले लोक अघोशीत आपतकाळांत जगतात असो थोमणो काँग्रेसीन भाजपाक मारलाे.
25 जून हो संविधान दीस हत्या दीस पाळून हे विशींच्यो कार्यावळी शाळेंत मनोवपा विशीं शिक्षण खात्यान काडिल्ल्या परिपत्रकाचो गोंय प्रदेश काँग्रेसीन निशेध केलो. ह्या वेळार विरोधी पक्ष फुडारी युरी आलेमांव, गोंय प्रदेश काँग्रेसीचे अध्यक्ष अमीत पाटकार आनी हेर फुडारी हजर आशिल्ले.
ह्या वेळार उलयतना विरोधी पक्ष फुडारी युरी आलेमांव हांणी सांगलें, संविधान विरोधी परिपत्रक शिक्षण संचालकान काडून सरकार कितलें घाण राजकारण करता हें दाखोवन दिता.
जी पत्रकारिता आमच्या सवंधिनाचो चौथो स्तंभ आसा तांचो आवाज दामपाचो यत्न चल्ला आनी आपल्या वेवसायीक इश्टां कडल्यान तांकां विकत्यो घेवन तांच्या अभिव्यक्तीचें स्वातंत्र्य बळकायलां. इडी, सीबीआय, आयकर हांचे हांशे करून तांचो वापर देशभर विरोधकांचो आवाज दामपा खातीर वापर जाता. भाजपान भारतीय वेंचणूक आयोगांत मध्यस्ती केल्या. तशेंच विधानसभा अधिवेशानचे दीस उणे करून आमचो संविधानीक हक्क काडून घेतला असो आरोप आलेमांव हांणी केलो.
गोंयची लिबरल राज्य म्हूण वळख आसा. पूण जाती धर्माच्या नांवान सांप्रदायीक दुस्वास पातळावपाचो यत्न चल्ला. आमी कितलींशींच वर्सां जालीं अघोशीत आपतकाळांत जगतात. जे कोण मुखार सरतात तांकां उलोवपाक दिनात. तांकां व्यक्त जावपाक दिनात. महात्मा गांधीचे जे हत्यारे आसात तांची विचारसरणी यंत्रणा वापरून शिक्षण मळार आस्पावन घेवपाचो यत्न चल्ला. आमी ह्या घाणयाऱ्या राजकारणाचो निशेध करतात अशें आलेमांव हांणी म्हणलें.
भाजपाचे खासदार अरूण सिंह हांणी गोंयांत पत्रकार परिशदेंत काँग्रेसीन माफी मागपाची मागणी केली. पूण ह्या लोकांचें देशाच्या स्वातंत्र्या खातीर कसलेंच योगदान ना हो इतिहास दरेक गोंयकारांक खबर आसपाक जाय, अशें अमीत पाटकार हांणी सांगलें.
देशांतल्या शिक्षणीक संस्थांनी आपल्यो कार्यावळी घडोवन हाडून भाजप शाळा आनी म्हाविद्यालयांनी वीख पातळावपाचें काम करता. आपातकाल विशयाचेर विद्यार्थ्यांक निबंध बरोवपाक लावपी सरकारान गांधी हत्या, गोध्रा कांड, नोकरी घोटाळो, जमीन घोटाळ्याचेर निंबध बरोवपाक सांगचो. खरे विशय लिपोवन दवरपा खातीर भाजप लोकांची दिशाभूल करता आनी हाचो आमी निशेध करतात अशें पाटकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
