भांगरभूंय | प्रतिनिधी
अठराव्या लोकसभेच्या वेंचणुकां वेळार काँग्रेस पक्षाक चडिल्लो ‘संविधान’ जोर वेंचणुके उपरांत प्रधानमंत्री नरेंद्र मोदी हांच्या फुडारपणा खालच्या राष्ट्रीय लोकशाय आघाडी सरकाराचो सेगीत तिसरो डाव सुरू जावन म्हयनो जालो, तरी हो जोर देंवपाची कसलीच लक्षणां दिसून येनात. नव्या लोकसभेच्या पयल्या सत्रांतूय काँग्रेस पक्षान ‘संविधान’ जोरांतल्यान आमी अजून भायर पडूंक नाशिल्ल्याचें आपले कृतींतल्यान दाखोवन दिलां. पूण दुर्दैव अशें की ‘इंडी’ आघाडेंतल्या आपल्या हेर कांय घटक पक्षांकूय आपले बरोबर फरफटत व्हरपाचो यत्न केला. वेंचणूक प्रचारा वेळार काँग्रेस आनी हेर कांय घटक पक्षांक ‘संविधान’ जोराचो तसो राजकी लाव जाला हें मान्य करचेंच पडटलें. ‘अबकी बार चारसौ पार’ च्या भाजपाच्या नाऱ्याक जाप दितना तांकां संविधान बदलपाचें आसा असो भ्रम निर्माण करून काँग्रेसीन मतदारांक कांय प्रमाणांत आपले कडेन ओडपाक येस मेळयलें. आनी ताचो परिणाम म्हणल्यार काँग्रेस पक्षान लोकसभेंत 52 वेल्यान 98 सुवातांचेर घेतिल्ली उडी. भाजपाक आपली चूक होलमली आनी कांट्यानूच कांटो काडपाचें थारावन लोकसभेच्या पयल्या सत्रांत सुरवातिकूच तांणी काँग्रेसीचेर 1975चें ‘आणिबाणी’ क्षेपणास्त्र सोडून तांकां नाका पुरो केलो. संविधानाचो केल्लो अतिरेक काँग्रेस पक्षाक मार पडलोच पूण तेच बरोबर तांच्या इश्ट पक्षांचीय कोंयडी करपाची संद भाजपान सादली. फाटलो फुडलो विचार करिनासतना काँग्रेसीचो ‘हात’ धरून फरफटत गेल्ल्या खूबशा पक्षांक हें सगलें कळ मेरेन कळाव जाल्लो आनी सरकारा आड अशी आक्रमकताय दाखोवन कांयच साध्य जावचें ना हाचीय प्रचिती तांकां आयली.
काँग्रेसीक चडिल्ल्या संविधान जोराचेर 1975 वर्सा तांच्याच इंदिरा गांधी हांणी लादिल्ल्या आणिबाणीचो कसाय दिवपाचो प्रधानमंत्री नरेंद्र मोदी हांच्या राष्ट्रीय लोकशाय आघाडेचो निर्णय हो तसो मास्टर स्ट्रोक थारला आनी काँग्रेसीक हो डोस संविधान जोरांतल्यान सुरक्षीत भायर पडपाक उपेगी थारुये अशी आस्त बाळगूं येता. लोकसभा वेंचणुकेच्या प्रचारांत काँग्रेस आनी तांच्या ‘इंडी’ आघाडीचे मजतीक संविधान धांवून आयलें हें मान्य करपाकूच जाय. पूण, तोच धागो धरून लोकसभेंत बोवाळ घालून कामकाज आडावपाची घेतिल्ली भुमिका मात राहूल गांधी आनी तांच्या ‘इंडी’ कंपनीच्या आंगार शेकलीच. पूण तेच बरोबर कांय घटक पक्षाच्या फुडाऱ्यांकूय नायलाजान प्रधानमंत्री नरेंद्र मोदी हांणी दिल्लो आणिबाणीचो डोस घेवचो पडलो. वास्तवीक विरोधीपक्ष फुडारीपद स्विकारले उपरांत राहूल गांधी मात्शें लेगीत जायना पूण जापसालदारकेन वागतले अशी देशाक आस्त आशिल्ली. पूण आपली अपरिपक्वता दाखोवन दिवपाचें काम तांणी पयल्या सत्रांतूच केलें आनी तें करतना आपल्या आघाडीतल्या हेर पक्षांकूय फरफटत व्हरत तांचो संभाव्य परिणाम कितें जातलो हाचो सादो विचार करपाचेंय ताळतंत्र दाखयलें ना. काँग्रेसीची ही भुमिका अपेक्षीत धरून प्रधानमंत्री नरेंद्र मोदी हांणी काँग्रेस आनी चड करून राहूल गांधी, सोनिया गांधी बी हांकां पन्नास वर्सां आदीं देशांत ज्या कलंक पर्वांतल्यान वच्चें पडलें त्या पर्वाची याद करून दिवप योग्य दिसलें.
स्वातंत्र्या उपरांतच्या काळांत देशाक मोडण दिवपी अश्यो ज्यो कांय विशेश घडणुको घडल्यात तातूंत आणिबाणीचो उल्लेख निश्चीतपणान करतात, आनी ताचोच कोडू डोस विरोधकांक नवे लोकसभेंत विरोधकांक ते निमतान तर मेळ्ळोच पूण तेच बरोबर काँग्रेसीन भारतीय लोकशायेचेर लायिल्लो पुसून न उडोवपा सारको काळ्या डागाचे बाबतींत नवे पिळगेकूय म्हायती मेळटली हाची दक्षता घेतली. राहूल गांधी आनी तांची ‘इंडी’ टीम आयजूय भाजपाक केंद्रांत सरकार घडोवपा खातीर भोवमत मेळ्ळें ना असोच कांयसो समज करून बसल्या. पूण विरोधी पक्ष फुडारीपद स्विकारले उपरांत निदान तांणी भानार येवपाची गरज आशिल्ली. पूण तशें कांय जालें ना. लोकसभेंत सोपूत घेतनाय संविधानाची प्रत हातांत घेवन राहूल गांधी आनी तांच्या वांगड्यांनी प्रधानमंत्री नरेंद्र मोदी आनी तांच्या सरकाराक एके तरेन चाळोवन घालपाचाे यत्न केला आनी तोच तांचेर शेकलो. ‘आणिबाणी’चो कसाय वा डोस होच ताचेर एकसुरो उपाय आशिल्लो आनी तोच नेमको सरकारान केलो. राहूल गांधी आनी तांचे काँग्रेसीक हो डोस जिवाक लागप अपरिहार्यच आशिल्लें. आणिबाणीचो विशय टाळूं येतालो अशी मखलाशी राहूल गांधी हांच्या फुडारपणा खाला विरोधी पक्षाच्या शिश्डमंडळान सभापती ओम बिर्ला हांची भेट घेवन केली ताचे वेल्यानूय आणिबाणीचो डोस विरोधकांक पचप कितलें जड गेलें हें कळून येता. संविधान हड्ड्या कडेन धरून लोकशायेचीं उलोवपां करपी राहूल गांधी हांणी कांय प्रमाणांत हे घडयेक सकारात्मक प्रतिसाद दिवन 49 वर्सां पयलीं आजी इंदिरा गांधी हांणी देशांत आणिबाणी हाडून केल्ली चूक मान्य केल्ली जाल्यार खूब फरक पडपाचो. पूण आपली चूक मान्य करीत जाल्यार ती काँग्रेस कसली?
प्रधानमंत्री नरेंद्र मोदी हांचें उलोवप आसूं वा सभापती ओम बिर्ला हांणी मांडिल्ल्या थारावांतले आणिबाणी विशींची तरतूद सरकार पक्षाक विरोधकांचेर तांचो ‘सविधान’ डाव उलटून उडोवपाचो आशिल्लो आनी तातूंत तांकां निश्चीतपणान येस आयलें. आतां विरोधी पक्ष फुडारी ह्या नात्यान राहूल गांधी हांणी सुरवातेकूच राष्ट्रपतींच्या अभिभाशणा वेली चर्चा थांबोवन ‘नीट’ परिक्षेंतल्या बोवाळाचेर चर्चा करची ही केल्ली मागणीय तांच्या अपरिपक्वतायेची गवाय दिवपी थारची. संविधान वाटावपा खातीर फालतू घोशणा दीत आयिल्ले राहूल गांधी हांणी हो पवित्र ग्रंथ एकदां तरी वाचचो अशें म्हणत जाल्यार ती चूक थारची न्हय. लोकशायेचे चलत आयिल्ले परंपरेक पाळो दिवचो अशें एके वटेन सांगप आनी दुसरे वटेन राष्ट्रपतीच्या अभिभाशणा वेले परंपरेन चलत आयिल्ली चर्चा स्थगीत करपाची मागणी करची हातूंत परिपक्वता ती खंयची? राहूल हांच्या सल्लागारांनी तांकां योग्य मार्गदर्शन करप अपेक्षीत आशिल्लें. पूण तें जाल्लें दिसून आयलें ना. राष्ट्रपतींच्या अभिभाशणांत नीट सयत सगलेच मुद्दे उपस्थीत केल्ल्यान उपकार प्रदर्शन थारावाचेर चर्चा करतना राहूल गांधी आनी सगल्याच विरोधी वांगड्यांक ‘नीट’ तशेंच हेर विशयांचेर ठोस मत सभाघरांत मांडूं येतालें. पूण ती संद तांणी व्हगडायली पूण तेच बरोबर बोवाळ घालून एका दिसाच्या कामकाजाचेर उदक रकयलें. विरोधी आघाडीक दिल्लें 233 वांगड्यांचें बळ हें फक्त सभाघरांत बोवाळ घालपा खातिरूच आशिल्ल्याचो समज करून घेवन राहूल गांधी मुखार वतात आसत जाल्यार तातूंतल्यांन कांयच साद्य जावचें ना होच तांचे खातीर धडो आसा. आयचे परिस्थितींत सकारात्मक राजकारणाची अपेक्षा सगलो देश तांचे कडल्यान करुन आसा. आणिबाणी कसायाचो थोडो जरी असर विरोधकांचेर जायत जाल्यार तो पुरोसो थारचो.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
