संविधान अपेक्षांचो दीपस्तंभ आनी आव्हांनांतल्यान वाटचाल करपाक मार्गदर्शन करता: राज्यपाल

भांगरभूंय | प्रतिनिधी

ताळगांवां मनयलो प्रजासत्ताक दीस: तिगां अधिकार्‍यांचो मुख्यमंत्री पुस्कारान भोवमान

पणजे: संविधान फकत एक कायदेशीर दस्तावेज न्हय. जाल्यार तें न्याय, स्वतंत्रताय, समानताय आनी भावपणाच्या तत्वांचो जिवो पुरावो आसा. अपेक्षांचो दीपस्तंभ आसा आनी आमकां आधुनीक आनी आव्हांनात्मक संवसारांत फुडें मार्गक्रमण करपाक मार्गदर्शन करता, अशें राज्यपाल पी. एस. श्रीधरन पिल्लई हांणी सांगलें. ते आयज ताळगांवां गोंय विद्यापिठाच्या मैदानाचेर (हॅलीपॅड वाठारांत) आयोजीत राज्य पांवड्यावेल्या प्रजासत्ताक दीस सुवाळ्याक उलयताले. तांणी ह्या वेळार राष्ट्रीय तिरंगो हुबोवन मानवंदना दिली आनी संचलनाची पळोवणी केली.
राज्यपालान म्हणलें, ह्या यादस्तीक वावराचो मुखेल शिल्पकार डॉ. बी. आर. आंबेडकर हांणी किर्तवंत राज्यघटनेच्या सभेच्या सहभागान विविधतायेंत एकता राखप आनी ह्या म्हान देशाच्या प्रत्येक नागरिकाक सक्षम करपा खातीर आमकां हे रचणूकेची भेट दिली.
आयच्या ह्या प्रजासत्ताक दिसाच्या प्रसंगार आमी आमच्या स्वातंत्र्य सैनिकांक आनी हुतात्म्यांक अभिवादन करूया. जांणी आमच्या देशाचे स्वातंत्र्य, एकवट आनी एकात्मते खातीर म्हान त्याग केलो. तशेंच आयज आमी आमच्या सुरक्षेची खात्री दिवपी आमचीं सैन्य दळा, पुलीस आनी नागरी सेवांतल्या शूर दादले आनी बायलांप्रती कृतज्ञताय उक्तावया. तांची समर्पितताय आनी त्याग आमकां देशाच्या उदरगतीक योगदान दिवपाक प्रेरणा दिता, अशें तांणी मुखार म्हणलें.
गोंयचे उदरगतीचो नियाळ घेतना राज्यपालान म्हणलें, परकी सत्तेंतल्यान मुक्त जावन १९६१ वर्सा गोंय भारतीय प्रजासत्ताक वेवस्थेंत आस्पावलें. तेन्ना सावन गोंयची प्रगतीशील राज्य म्हूण फुडें वाटचाल सुरू जाली. गोंय राज्य आपली सोबितकाय, संस्कृती आनी लोकांमदल्या एकवटा खातीर फामाद आसा. सध्याचें राज्य सरकार रस्ते, रेल्वे, विमानतळ, पूल अश्यो सुविधायो उपलब्ध करून गोंयचे उदरगती खातीर तोखणायेचो वावर करता. ह्या वर्सा पेडणें म्हालांतल्या मोपाच्या मनोहर पर्रिकर विमानतळाक उत्कृश्ट डॉमेस्टिक विमानतळ म्हूण पुरस्कार फावो जाला, अशें राज्यपालान सांगलें.

राज्य सरकाराची तोखणाय
राज्य सरकारची तोखणाय करतना राज्यपालान सांगलें, मुख्यमंत्री डॉ. प्रमोद सावंत हांच्या फुडारपणा खाला गोंय राज्य नेटान उदरगतीची कामां करता. उत्कृश्ट सेवा आनी प्रशासनांतल्यान गोंय हें स्वयंपूर्ण, आत्मनिर्भर राज्य करपाच्या उद्देशान गोंय सरकारान भारत सरकारच्या आत्मनिर्भर भारत, गरीब कल्याण कार्यावळीचे फाटभूंयेर स्वयंपूर्ण गोंय अभियान सुरू केलां. गांवांची उदरगत करून ग्रामीण अर्थ वेवस्था सुदारप ह्या कार्यावळींचो हेत. दरेका गोंयकारांचे जिणेंत परिवर्तन हाडून गोंय आत्मनिर्भर करपा खातीर सरकार अंत्योदय, सर्वोदय आनी ग्रामोदय तत्वाचेर काम करता. सरकारच्यो येवजणो/ सेवा प्रत्येक नागरिका मेरेन पावोवपा खातीर थळाव्यो संस्था, सरकारी विभाग आनी स्वयंपूर्ण मित्रांच्या सहकार्यान विशेश उपक्रम राबोवपात येता.
गोंय हें देशांतले नेटान उदरगत करपी राज्य. सगळ्या वर्गांनी देशांतल्या सगळ्या राज्यांमदीं गोंय उत्कृश्ट नंबरावेलें राज्य जावन आसा. देशांतल्या पयल्या तीन उत्कृश्ट राज्यांमदीं गोंयचो आस्पाव जाता. साधनसुविधायां बाबतीत इकराव्या वित्त आयोगान गोंयांक उत्कृश्ट राज्य म्हूण जाहीर केलां, अशेंय राज्यपालान सांगलें.

तिगां अधिकार्‍यांक भेटयलो मुख्यमंत्री पुरस्कार
ह्या वेळार उत्कृश्ट प्रशासकीय सेवे खातीर राज्यपाला हस्तुकीं उच्च शिक्षण सचीव आयएएस प्रसाद लोलयेंकार, पुलीस अधिक्षक (आयपीएस) अक्षत कौशल आनी प्रधान मुख्य रानपाल आयएफएस प्रविण कुमार राघव हांचो मुख्यमंत्री पुरस्कार भेटोवन भोवमान केलो.
प्रजासत्ताक दीस सुवाळ्याक मुख्यमंत्री डॉ. प्रमोद सावंत, राज्यसभा खासदार सदानंद तानावडे, एडव्होकेट जनरल देविदास पांगम, पुलीस म्हासंचालक आलोक कुमार, आमदार, सरकारी सचीव, अधिकारी, सुटके झुजारी, विद्यार्थी आनी हेर मानेस्त हजर आशिल्ले.