भांगरभूंय | प्रतिनिधी
संसदेच्या शिंयाळ्या अधिवेशनांतल्या कामकाजाचेर अमेरिकन अब्जाधीश जॉर्ज सोरोस आनी भारतीय अब्जाधीश गौतम
अदानी हांची मुखेलपणान पयले कांय दीस बरीच चर्चा जाली आनी ते चर्चेंत सत्ताधारी भारतीय जनता पक्ष आनी विरोधी काँग्रेस पक्षां मदलो जबरदस्त संघर्श देशान पळयलो. उपरांत दोन दीस भारतीय संविधानाच्या पावूणशें वर्सांच्या गौरवशाली प्रवासा निमतान जाल्ले चर्चेक लागून तातूंत खंड पडलो. लोकसभेंत दोन दीस संविधानाच्या ‘गौरवशाली प्रवासाचेर’ जी विस्तारान चर्चा जाली तातूंतल्यान खरोच भारतीय संविधानाचो पावूणशे वर्सांचो गौरवशाली प्रवास देशा मुखार आयलो काय संविधानाची दुसरी बाजू आयचे तरणाटे पिळगे मुखार आयली हो चर्चेचो विशय थारूंक शकता. लोकसभेंत दोन दीस ह्या म्हत्वपूर्ण विशयाचेर चर्चा करतना विरोधक आसूं वा सत्ताधीश पक्षांच्या वांगड्यांनी संविधानाच्या गौरवशाली प्रवासा विशीं तरणाटे पिळगेक सादूर करपाची चड गरज आसतना एकामेकांची उणीदुणी काडपांतूच सभाघराचो मोलादीक वेळ घालयलो. संविधानाच्या गौरवशाली प्रवासा वयल्या चर्चे वेळार सदचे प्रमाण फक्त आरोप प्रत्यारोपच जाल्ल्यान हे चर्चेंतल्यान नेमकें कितें साद्य जालें हें कळपाक मार्ग ना. प्रधानमंत्री नरेंद्र मोदी हेवूय हे चर्चेक जाप दितना संविधानाच्या गौरवशाली प्रवासा विशीं कांय गजाली निश्चीतच उलयले आसले तरी प्रधानमंत्री जवाहरलाल नेहरू हांचें सावन इंदिरा गांधी, राजीव गांधी आनी मनमोहन सिंग हांचे मेरेन सगल्यांचेरूच घसरले आनी राहूल गांधी हांचेंय कान पिळपाची संद तांणी सोडली ना.
भारतीय संविधानाच्या 75 वर्सांच्या गौरवशाली प्रवासाचेर उलयतना हाची खरेंच गरज आशिल्ली काय ह्या प्रस्नाक अर्थांतूच तशी गरज नाशिल्लीच हेंच उत्तर आसा, पूण तशें जालें ना. काँग्रेस पक्षा कडल्यान संविधानाची हत्या जाली हाचेर फाटल्या धा वर्सांत भाजप वांगड्यांनी आनी स्वता प्रधानमंत्री नरेंद्र मोदी आसूं वा गृह मंत्री अमीत शाह हांणी सभाघरांत वा सभाघरा भायरूय खूबशे फावटी विरोधकांक चिमटो काडिल्लो आसतनाय तोच केंद्रबिंदू थारावन चर्चेचो सगलो रोख काँग्रेस पक्षाचेर हल्लो करपा कडेनूच केंद्रीत करप मुळांतूच अपेक्षीत नाशिल्लें. ताका लागूनच संविधानाच्या गौरवशाली प्रवासा वयली सभाघरांतली चर्चा भरकटतच गेली आनी सहाजिकूच ही चर्चा अपेक्षीत पांवडो गांठूंक शकली ना अशें म्हणत जाल्यार चुकीचें थारचें न्हय. राहूल गांधी हांच्या फुडारपणा खाला काँग्रेस पक्ष आसूं वा हेर विरोधी पक्षांच्या वांगड्यां कडल्यान अशा म्हत्वाच्या विशयाचेर कोणेय विशेश अपेक्षा करप तशें चुकीचेंच आशिल्लें. ताका लागून तांणी हे चर्चेचो उपेग प्रधानमंत्री नरेंद्र मोदी आनी तांच्या भारतीय जनता पक्षाचेर हल्लो चडोवपाक करप अपेक्षितूच आशिल्लें आनी राहूल- प्रियांका पसून सगल्यांनीच तेंच केलें. वीर सावकर संविधान विरोधी आशिल्ले असो आरोपूय करपाक राहूल गांधी फाटीं रावले नात. संविधानाच्या रक्षणा खातीर आपली ‘इंडी’ आघाडी व्हड लडाय लडत आशिल्ल्याचेंय राहूल गांधी हांणी सांगप हेंच अजापाचें दिसता. राज्यघटनेच्या गौरवशाली प्रवासाचेर आपूण उलयता हाचें भान राहूल- प्रियांका सयत कोणाकूच नाशिल्लें आनी चर्चा भरकटत वचपा फाटलें तेंवूय एक कारण आशिल्लें.
राहूल गांधी आनी तांचे शिलेदार आयज काल संविधानाच्यो प्रती बोल्सांत घालून भोंवतात, आनी ताचे वेल्यानूय संरक्षण मंत्री राजनाथ सिंह आनी अनुराग ठाकूर हांचे सावन खूबशा जाणांनी तांकां लक्ष्य केलां. भारतीय संविधान काँग्रेसीन सदांच आपल्या बोल्सांत दवरूनच कारभार केला आनी आयज राहूल आनी कंपनी कितेंय वेगळे करिनात असो ठोमणोय तांणी मारला. हे आरोप-प्रत्यारोप हेर खंयच्याय संबंदीत विशया वेल्या चर्चे वेार जाल्ले आसत जाल्यार तें एकवेळ समर्थनीय थारपाचें. कांय जाणांचो आडवाद सोडल्यार सत्ताधीश पक्षानूय नेमक्या विशयाक धरून चर्चा मुखार व्हेल्ल्याचें दिसले ना आनी राहूलबाबांच्या विरोधी पक्षा कडल्यान तर तशी अपेक्षाच कोणे करूंक नाशिल्ली. प्रधानमंत्री नरेंद्र मोदी हांणी दोन दीस चलिल्ले चर्चेक जाप दितना काँग्रेसीक धारेर धरून तांणी भारताच्या राज्यघटनेक राजकारणाचें हत्यार कशें केलें आनी सत्तेच्या सुखसना खातीर भुकेल्ल्या ह्या पक्षान 75 फावटी संविधानांत कशे बदल केले हाची माळूच वाचली. राजघटनेक पांया कडेन माड्डून देशाचेर आणिबाणी लादिल्ल्या काँग्रेसीच्या कपला वेलो कलंक सदांच उरतलो आनी तो केन्नाच पुसून वच्चो ना अशा उतरांनी प्रधानंमंत्र्यांनी, विरोधकांनी केल्ल्या आरोपांचे खंडन करून तांकां धारेर धरले, हें खरें आसलें तरी तांणीय हाचे आदीं सभाघरांत केल्ल्या खूबशा विधानांची पुनरुक्ती करपाची गरज नाशिल्ली. भाजप राजवटीत ज्यो कितें घटना दुरुस्त केल्यो त्यो देशाच्या बऱ्या फुडारा खातीर गरजेच्यो आशिल्ल्यो आनी तातूंतल्यान देशाचो एकवट आनीक घटमूट करपाक आमकां येस आयलां हो दावोय विरोधकांच्या वर्माचेर बोट दवरपी आशिल्लो.
लोकसभा वेंचणुकेच्या प्रचारांत भाजपाक संविधान बदलपाचें आसा असो नारो लावन थोडेभोव येस मेळोवन घेवपाक येसस्वी थारिल्ल्या काँग्रेस आनी विरोधकांक वर्सभरांतूच कांय व्हड राज्यां जिखून भाजपान परती जाप दिली. संविधाना वेले चर्चे मजगतींय विरोधकांचो पवित्रो तोच दिसलो आनी संविधान धोक्यांत आसा होच नारो तांणी मुखार व्हरपाचो यत्न केलो. पूण संविधान धोक्यांत अशें आसा हें मात राहूल वा प्रियांका सयत कोणाकूच स्पश्टपणान सांगूंक आयलें ना. तांचो हो नारो हाचे मुखार तांकां कितलो मेरेन उपेगी थारतलो होच दुबाव आसा. जातीय जनगणना हें राहूल आनी कंपनीचें नवें अस्त्र आसून संविधाना वेले चर्चे मजगतींय त्या मुद्याक हात लावपाची संद राहूल गांधी हांणी सोडली ना. संविधानान आमी नेमकें कितें साद्य केलें आनी अजून आमी कितें साद्य करूंक शकता अशा स्वरुपांत ही चर्चा जावप अपेक्षीत आसतनाय विरोधकांनी सावरकरा पसून मनुस्मृती मेरेन खूबशा असंबद्ध मुद्यांचेर ही चर्चा व्हरत ताचे पसून नेमकें कितें साद्य जातलें हाचोय विचार केलो ना. ताका लागूनच संविधानाच्या गौरवशाली प्रवासाचेर लोकसभेंत जाल्ली चर्चा सदांच जावपी आरोप- प्रत्यारोपांचोच एक भाग म्हूण लोकांनी ताचे कडेन पळयिल्लें आसत जाल्यार ताचे अजाप दिसचें न्हय. चर्चेक जाप दितना निमाणें प्रधानमंत्री नरेंद्र मोदी हांणी जें कितें संकल्प सोडल्यात ते म्हत्वाचे आसात. राज्यसभेंतूय संविधानाचेर चर्चा जावपाची आशिल्ल्यान ज्येश्ठांच्या सभाघरांतली चर्चा निदान सार्थकी लागची अशी सगल्यांचीच अपेक्षा आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
