‘संविधानाचो खून’ फुडाराक अभ्यासक्रमांत आसपावपाचो विचार आसा : मुख्यमंत्री
भांगरभूंय | प्रतिनिधी
मडगांव : आतांच्या भुरग्यांक संविधानाचो खून कसो, केन्ना आनी कोणें केलो हाची म्हायती मेळप गरजेचें. अश्यो गजाली परत जावच्यो न्हय म्हणून आणिबाणी आनी संविधान खून दिसाची सगली म्हायती महाविद्यालयीन अभ्यासक्रमांत येवची. सध्या हाचेर निर्णय जरी जावंक ना तरी फुडाराक नक्कीच हाचेर विचार जातलो, अशी म्हायती मुख्यमंत्री डॉ. प्रमोद सावंत हांणी दिली.
मडगावच्या कारे कायदो महाविद्यालयांत संविधान खून दिसाचें आयोजन केल्लें. ह्या वेळार मुख्यमंत्री डॉ. प्रमोद सावंत, आमदार दिगंबर कामत, प्रधान सचिव डॉ. व्ही. कांदवेलू, उच्च शिक्षण संचालक भूषण सावयकार, नितीन कुंकळ्येंकार आनी हेर मानेस्त हजर आशिल्ले.
ह्या वेळार डॉ. सावंत हांणी सांगलें, देशांतल्या संविधान खुनाचे घडणुकेक ५० वर्सां पुराय जाल्यांत. हो खून कोणें आनी केन्ना केलो हाची म्हायती आतांचे पिळगेक जावपाची गरज आसा. अशे तरेची घडणूक ह्यान फुडें जावची न्हय हे खातीर हे यत्न चल्ल्यात. ज्या कुटुंबांतल्या लोकांनी संविधानाचो खून केलो तेच आतां बोल्सांत संविधानाची प्रत दवरून संविधान धोक्यांत आशिल्ल्याचें सांगतात. हो लोकांचो दिकाभूल करपाचो यत्न जावन आसा. आणीबाणी वेळार नागरिकांचे मुळावे हक्क काडून घेतले. लोकांक सत्ताधार्यां आड उलोवपाची मेकळीक नाशिल्ली. तांचे सयत विरोधी फुडार्यांकूय अटक करताले. प्रसारमाध्यमांचेर बंदी हाडिल्ली. ही आणीबाणी २१ म्हयन्यां मेरेन लागू आशिल्ली आनी ह्या काळांत कायद्या प्रमाण कांयच जायनाशिल्लें.
मुक्त जाले उपरांत कांय वर्सं जाल्ल्या गोंयांक ह्या आणीबाणीच्या काळाक तोंड दिवचें पडलें. राजेंद्र आर्लेकार हांचे सयत तांच्या बापायक अटक जाल्ली. दत्ता भिकाजी नायक, प्रभाकर सिनारी हांचे सयत सुटके झुजार्यांक अटक जाल्ली. विद्यार्थ्यां सयत कामगार फुडार्यांक अटक जाल्ली. राष्ट्रीय स्वयंसेवक संघाचे आनी तांच्या कार्याचें मडगांव हें तेन्नाचें केंद्रस्थान आशिल्लें. हाका लागून राज्यांत धा सुवातांचेर कार्यावळी जरी जाता तरी मुखेल कार्यावळी मडगांवां आयोजीत केल्या. त्या वेळार गोंयचे राष्ट्रीय स्वयंसेवक संघाचे, अभाविपच्या फुडार्यांनी हे आणीबाणी आड आवाज केल्ल्यान तांकांय अटक जाल्ली, अशें तांणी सांगलें.
बळयां नसबंदी
ब्रिटीश बरे अशें लोकांक दिसपाक लागलें, असो हो आणीबाणीचो कठीण काळ आशिल्लो. ह्या काळांत लोकसंख्या नियंत्रणाच्या नांवा खाला लोकांक जबरदस्ती नसबंदी करची पडली. सरकारान कर्मचार्यांक लक्ष्य दिवन नसबंदी करपाक सांगिल्ली आनी ते खातीर जबरदस्तीन नसबंदी करताले. तेन्ना लोकांची मानसीक स्थिती मारून उडोवपाचो प्रकार घडला. एके पुराय पिळगेचेर हाचो परिणाम जालो, अशें मुख्यमंत्री डॉ. सावंत हांणी सांगलें.
आपल्या बापायन, कुटुंबीयांनीय त्रास सोंसले
आणीबाणीच्या २१ म्हयन्यां उपरांत, देशांत वेंचणुको जाले उपरांत लोकांनी सरकारा आड मतदान करून जनता पार्टीच्या नेतृत्वा खाला सरकार वेंचून हाडलें. गोंयांत मडगांव, पणजी, वास्को आनी पाळी ह्यो चार सुवातांचेर वेंचणुको जाल्यो. पाळी मतदारसंघांतल्यान आपल्या बापायन वेंचणूक लढली आनी तांकां फकत चारशें मतां पडिल्लीं. मात फाटलीं चाळीस वर्सां तांकां ‘ए जनता पार्टी, ए जनता पार्टी’ म्हणून चाळयताले. हें सगलें तांणी भोगलां. आपूण आमदार जाले उपरांत हें सगलें बंद जालें, अशें सांगीत बापायनूय आणीबाणीच्या काळा उपरांत त्रास सोशिल्ल्याचें मुख्यमंत्री डॉ. सावंत हांणी म्हणलें.
नरेंद्र मोदी संविधानाक दिता धर्मीक ग्रंथां इतलो मान
डॉ. बाबासाहेब आंबेडकर हांणी संविधानांत सगल्या घटकांक सुवात दिल्या. गीतां, बायबल आनी कुराण हाकां धर्मांत जितलें म्हत्व आसा, तितलेंच म्हत्व प्रधानमंत्री मोदी हांणी संविधानाक दिलां. देशांत लोकाभिमुख सरकार आशिल्ल्यान लोकांक विस्वासांत घेवन ते लोकां खातीर निर्णय घेतात. वेंचणूक आयोग, लोकायुक्त, लोकपाल, सीएजी हांचें सक्षमीकरण केलें. निमाण्या घटकां मेरेन सगल्यो येवजण्यो पावचे खातीर जनभागीदारी वरवीं सरकार काम करता. ७० वर्सां उपरांत भाजप सरकारान कलम ३७० काडून जम्मू काश्मिराक भारताचो भाग करपाचें काम केलें आनी एक देश एक तिरंगो हेवूय केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
