भांगरभूंय | प्रतिनिधी
तानावडेः काँग्रेसीन केल्यो 77 जाल्यार भाजपान फक्त 12 दुरुस्त्यो
भांगरभूंय । प्रतिनिधी
पणजीः केंद्रांत सत्तेंत आसतना काँग्रेसीन भारतीय संविधानांत 77 खेपे दुरुस्त्यो केल्या. तातूंतल्यो खूबश्यो दुरुस्त्यो गरज नासतना केल्यात. भाजपाच्या फुडारपणा खालचें सरकार केंद्रांत स्थापन जाले उपरांत 10 वर्सांच्या कालांत लोकांचे नदरेन गरजेच्यो आशिल्ल्यो फक्त 12 दुरुस्त्यो संविधानांत केल्यात. हाचे वयल्यान संविधानाचे खरे दुस्मान कोण ते लोकांनी सोदचें, असो उलो राज्यसभा खासदार तशेंच भाजप प्रदेशाध्यक्ष सदानंद शेट तानावडे हांणी शेनवारा मारलो.
पणजे भाजप कार्यालयांत घेतिल्ले पत्रकार परिशदेंत तानावडे उलयताले. ह्या वेळार आदले आमदार दयानंद सोपटे हाजीर आशिल्ले. केंद्रांत सत्तेंत आसतना काँग्रेसीन संविधानांत परतून परतून बदल करून संविधानाचो अपमान केला. तीच काँग्रेस आतां भाजपाक दोश दिता. संसद अधिवेशनांतल्यान देशभरांतल्या लोकांचे साबार प्रस्न, समस्या सुटाव्यो जातात. ताका लागून अधिवेशन निश्चीत काळा मेरेन सुरू उरप म्हत्वाचें आसता. पूण काँग्रेस आनी हेर विरोधी पक्षांनी कांय विशयां वयल्यान संसदेंत बोवाळ घातिल्ल्यान खूबश्या प्रस्नांचेर चर्चा जावपाक शकली ना. गोंयचे नदरेन आपणे साबार लेखी प्रस्न राज्यसभेंत उपस्थीत केले. तातूंतल्या खूबश्या प्रस्नांच्यो जापो संबंदीत खात्या कडल्यान मेळ्ळ्यो, अशेंय तानावडे हांणी सांगलें.
‘एसटी आरक्षणाचेर अर्थसंकल्पीय अधिवेशनांत चर्चा’
गोंयांतल्या एसटी आरक्षण विधेयक संसदेच्या ह्याच अधिवेशनांत संमत जातलें आशिल्लें. पूण विरोधी काँग्रेसीन कांय विशयां वयल्यान सभाघरांत बोवाळ घातलो आनी ताका लागून सभाघराचें कामाकाज बंद पडलें. ते खातीर ह्या विधेयकाचेर लोकसभेंत फुडली चर्चा जावंक ना. येता त्या अर्थसंकल्पीय अधिवेशनांत ह्या विधेयकाचेर चर्चा जावन संसदेच्या दोनूय सभाघरांनी ह्या विशेयकाक मंजुरी मेळटली, अशें सदानंद शेट तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
