भांगरभूंय | प्रतिनिधी
वास्को : अंदूंचे लोकसभा वेंचणुकेंत भाजपान ४०४ पार केल्ले जाल्यार ते संविधानांत बदल घडोवन हाडपाचे. संविधानात बदल घडोवपाचो केंद्रीय भाजप सरकाराचो हेत आसा. फुडाराक भाजपाचे ४०४ खासदार लोकसभेंत निवडून आयल्यार ते संविधानांत नक्कीच बदल घडयतले. जर संविधानांत तांकां जाय तो बदल जालो तो लोकशायेचो खून केल्ले वरीं जातलें, अशी म्हायती ‘वंचित बहुजन आघाडी राष्ट्रीय पक्षा’चे अध्यक्ष प्रकाश आंबेडकार हांणी दिली.
श्री. आंबेडकार हांचो दोन दिसांचो गोंयचो दौरो आशिल्लो. सड्यार मुरगांव पन्तन प्राधिकरणाच्या वसतीगृहांत ते आपल्या कुटुंबा सयत राविल्ले. ह्या वेळार गोंयचे वंचित बहुजन आघाडी पक्षाचे पदाधिकारी प्रशांत पार्सेकार, बाबूराव चोपडेंकार, सुरज बेहरे, अप्रेश गडकार, संजय पारस हजर आशिल्ले.
केंद्र सरकार संविधाना विशीं गंभीर ना. म्हणूनच केंद्रीय भाजप प्रणित सरकार संविधानांत मोठे बदल करपाचें षडयंत्र रचता. हाचे खातीर तांकां केंद्रांत ४०४ खासदार जाय. संदी मेळ्ळ्यार ते नक्की संविधानांत बदल घडोवन हाडटले, अशें तांणी म्हणलें.
‘एक राष्ट्र एक वेंचणूक’ हे पुरायेन चुकीचें धोरण. भारतांत एकाच वेळार विधानसभा आनी लोकसभा वेंचणूक जावप शक्य ना. केंद्रीय भाजप सरकार खर्या अर्थान लोकशाय विरोधी पक्ष. जर यूपीए आघाडी पक्षान वंचित बहुजन आघाडी पक्षाक आपले सयत घेतिल्लें जाल्यार मोदी परत प्रधानमंत्री जावचे नासले अशें आंबेडकार हांणी सांगलें. महाराष्ट्रांतले विधानसभा वेंचणुकेंत महाविकास आघाडीन वंचीत बहुजन आघाडी पक्षाक आसपावन घेवंक नाशिल्ल्यान आघाडेचे धा उमेदवार हारिल्ल्याची म्हायती तांणी दिली.
गोंयांत फुडाराक विधानसभा वेंचणुकेंत मतदार संघ वाडपाची शक्यताय तांणी उक्तायली. फुडें जावपी लोकसभा वेंचणुकेंत मतदार वाडपाक शकता. हाची म्हायती तांणी गोंयचे जनगणनेच्या आधारार दिली. हातूंत अनुसूचीत जाती-जमाती खातीर सुवातो वाडपाची शक्यताय आंबेडकार हांणी उक्तायली. गोंयांत २०२७ वर्सा विधानसभा वेंचणूक जाल्यार मतदारसंघ वाडपाक शकतात. मात आतांच्या सरकारान २०२६ त सरकार बरखास्त केल्यार, गोंयांत चाळीसूच मतदार संघ उरपाची शक्यताय प्रकाश आंबेडकार हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
