भांगरभूंय | प्रतिनिधी
हो संघर्श कसो आनी केन्ना सोंपत तें सांगप कठीण आसा. पूण तो जितलो लांबतलो तितलेच ताचे दुश्परिणाम आनीक खर जातले हें निश्चीत.
अस्तंत आशियांतल्या झुजान चौथ्या सप्तकांत प्रवेश केला, आनी ह्या संघर्शाचो परिणाम आतां फक्त झुजा पुरतो मर्यादीत उरिल्लो ना. ह्या झुजाचे लोळ ल्हवू ल्हवू संवसारभर पातळत आसात. ताची खरताय भारतीयांच्या दीसपट्ट्या जिणेंतूय जाणवूंक लागल्या. कांय दिसां पयलीं मेरेन आमी फक्त हे घडणुकेची खबर म्हणूनच पळयताले. पूण आयज ताचे परिणाम आमचे रांदचेकुडी मेरेन येवन पावल्यात. ताका लागून हें झूज आतां फक्त ‘तांचें’ उरिल्लें नासून ‘आमचें’य जालां अशें म्हणत जाल्यार चुकीचें थारचें ना. तेलाची वाडटी दर, रांदचेकुडी खातीर लागपी गॅसाचो उणाव, तशेंच कृशी हंगामाच्या तोंडार साऱ्यांचे पुरवणे विशीं निर्माण जाल्ली अनिश्चीतताय. ह्या सगल्या गजालींनी सामान्य नागरिकांच्या मनांत हुस्क्याचें वातावरण निर्माण जालां. पेत्रोल, डिझल हांच्या दरवाडीचो परिणाम येरादारी खर्चाचेर जाता आनी तातूंतल्यान जिणेगरजेच्या वस्तुंची वाड जाता. परिणाम म्हारगायेचो फटको सर्वसामान्यांक बसता. पयलींच अर्थीक ताण सोंसपी मध्यमवर्गीय आनी गरीब कुटुंबा खातीर ही परिस्थिती आनीक कठीण थारूंक शकता.
ह्या संकश्टाचो परिणाम फक्त घरगुती जिणेचेरूच न्हय, जाल्यार उद्देग वेवसायांचेरूय व्हड प्रमाणांत जाता. चड करून हॉटेल आनी पर्यटन उद्देगाक हाचो सुमारा भायर फटको बसता. गॅस आनी इंधनाच्या वाडट्या मोलाक लागून वेवसायाचो खर्च वाडला. जाल्यार गिरायकांची संख्या उणी जावपाची शक्यताय निर्माण जाल्या. गोंया सारक्या पर्यटन राज्यांत ही परिस्थिती आनीक गंभीर भासता. कांय ल्हान, व्हड हॉटेलां तात्पुरतीं बंद करपाची वेळ आयल्या. जाल्यार कांय वेवसायीक फुडारा विशीं अनिश्चीत आसात.
झूज लांबत चलिल्ल्यान मुखार कितें जातलें, हाचो विचार दरेक नागरीक करूंक लागला. भारतीय अर्थवेवस्थेचेर हाचे गंभीर परिणाम जावपाची शक्यताय न्हयकारूं येना. म्हारगायेचो भस्मासूर परतून एकदां उबो रावतलो आनी सर्वसामान्यांचें भेंड मोडटले ही भिरांतूय उक्तायतात. अशे परिस्थितींत केंद्र सरकार कसलीं ठोस आनी दूरदिश्टीची पावलां उबारता हाचे कडेन सगल्यांचें लक्ष लागलां. हे फाटभुंयेर प्रधानमंत्री नरेंद्र मोदी हांणी आपल्या मंत्रीमंडळा सयत घेतिल्ली आपत्कालीन बसका सामकी म्हत्वाची थारता. देशभरांत पेत्रोल, डिझल, गॅस आनी हेर गरजेच्या इंधनाची पुरवण सुरळीत जावची हे खातीर खर नियोजन करप ही काळाची गरज आसा. हाचे बराबरच साऱ्यांचे उपलब्धतायेचेरूय चड लक्ष दिवप गरजेचें आसा. कारण कृशी मळार ताचो वायट परिणाम जाता. शेतकारांक वेळार सारें मेळ्ळें ना, जाल्यार उत्पादन उणें जावपाचो घात निर्माण जाता, आनी ताचो परिणाम फुडल्या अन्नसांखळीचेर जाता. सद्याचे परिस्थितींत फक्त पुरवण सुरळीत दवरप फावोशी ना, जाल्यार गरजेच्या वस्तूंचो काळोबाजार आनी सांठो आडावप तितलेंच म्हत्वाचें आसा. इतिहास साक्ष आसा की अशा संकश्टाच्या काळांत कांय घटक फायदो जावपाच्या उद्देशान बाजारांत उणाव निर्माण करतात. जर हे गजाली कडेन आडनदर जायत जाल्यार परिस्थिती आनीक गंभीर जावंक शकता. म्हणूनच प्रशासनान खर पावलां उबारून बाजारांतलें संतुलन राखप गरजेचें आसा.
अशा काळांत राज्य सरकारांची भुमिकाय हांगा तितलीच म्हत्वाची थारता. फक्त केंद्र सरकाराचेर निंबून रावनासतना राज्यांनी थळाव्या पांवड्यार प्रभावी उपाय येवजण करप गरजेची आसा. जिल्हो प्रशासन, पुरवण यंत्रणा आनी थळाव्यो स्वराज संस्था हांणी समन्वयान काम केल्यार परिस्थिती नियंत्रणांत दवरप शक्य आसा. नागरिकां मेरेन योग्य म्हायती पावोवप आनी वावड्यांक आळो घालप ही लेगीत प्रशासनाची व्हड जापसालदारकी आसा. ह्या झुजान आनीक एक म्हत्वाचो पैलू उक्तो केला, आनी तो म्हळ्यार संवसारीक राजकारणाची गुंतागूंत. अमेरिकेची भुमिका, इराणाचो पवित्रो आनी हेर राष्ट्रांचें धोरण हाका लागून हो संघर्श आनीक क्लिश्ट जाला. खूबशे जाण हे परिस्थिती खातीर अमेरिकेचे अध्यक्ष डोनाल्ड ट्रम्प हांकां दोश दितना दिसून येतात. पूण, संवसारीक राजकारण हें एका व्यक्तीच्या निर्णया पुरतें मर्यादीत नासता. ताचे फाटल्यान खूबशे अर्थीक, सामरीक आनी राजनैतीक हितसंबंद गुथिल्ले आसतात. ह्या संघर्शांत इराणा विशीं सहानुभुती निर्माण जातना दिसता. एखादे मॅचींत ती मागीर क्रिकेटीची, फुटबॉलाची आसूं वा हेर खंयचीय. जशे दुर्बल, कमजोर पंगडाक प्रेक्षकांचो हमखास तेंको मेळटा तेच प्रमाण हांगाय खूबशे देश आनी नागरीक इराणा कडेन सहानुभुतीन पळयतात. हालींच सोंपिल्ल्या संवसारीक करंड क्रिकेट सर्तींत इंग्लंड- नेपाळ, द. आफ्रिका- अफगाणिस्तान, भारत- अमेरिका अशा खूबशा मॅचींनी आमी हें अणभवलां. अमेरिका- इराण झुजांत सद्या संवसारीक पांवड्यार तेंच चित्र आमकां दिसत आसा.
पूण वास्तव अशें आसा की झुजांत कोणूच खऱ्या अर्थान जैतिवंत जायना. हो संघर्श कसो आनी केन्ना सोंपत तें सांगप कठीण आसा. पूण तो जितलो लांबतलो तितलेच ताचे दुश्परिणाम आनीक खर जातले हें निश्चीत. इराणचे जगाच्या नकाशा वेलें अस्तित्व मिटोवपाचो निश्चेव अमेरिका- इझ्रायलान केल्लो दिसून येता. जाल्यार अर्दें फुडारपण व्हगडावन लेगीत ट्रंप ज्या भ्रमांत आसात तें केन्नाच घडचें ना अशें इराण सांगता. ताका लागून लांबिल्लें झूज रोखडेच थांबतलें अशी अपेक्षा करूंक येवची ना. हे फाटभुंयेर सगल्यांत म्हत्वाची गजाल म्हणल्यार सामान्य नागरिकांची भुमिका. संकश्टाच्या काळांत संयम, शिस्त आनी जबाबदारीची जाणीव सामकी म्हत्वाची आसता. गरजेभायर साठेबाजी टाळप, वावड्यांचेर विस्वास न दवरप आनी प्रशासनाक सहकार्य करप ह्यो ल्हान गजाली खूब मोटो फरक घडोवंक शकतात. आयज गरज आसा ती भियेवपाची न्हय जाल्यार जागृत रावपाची. परिस्थिती कितलीय कठीण आसली तरी योग्य नियोजन, दूरदिश्टी आनी सामुहीक यत्नांच्या बळार कसलेंय संकश्ट हुपूं येता. सरकार, प्रशासन आनी नागरीक ह्या तिनूय घटकांनी एकठांय काम करीत जाल्यार ह्या आव्हानाकूय आमी समर्थपणान तोंड दिवंक शकतात. अस्तंत आशियांतलें झूज हें फक्त एका प्रदेशाचो प्रस्न न्हय. तो संवसारीक परिणाम घडोवपी संघर्श आसा. ताका लागून हे परिस्थिती कडेन गंभीरतायेन पळोवन गरजेचीं तीं पावलां उबारप हीच काळाची गरज आसा. नाजाल्यार ह्या झुजाचे लोळ फक्त शिमे मेरेन मर्यादीत उरनासतना पुराय संवसाराक हुलपावन उडयतले आनी ताचे परिणाम दरेकाचे जिणेंत जाणवतले, हातूंत मातूय दुबाव ना.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
