भांगरभूंय | प्रतिनिधी
कोंकणी तियात्र पालका वयलें आपणाक व्हेलें ताचे परस खूब आगळें ताणें तियात्र पालकाक परतून दिलें. असल्या तियात्रिस्तांक लागूनच तियात्र पाल्क फुडें टांच मारून जैताचे पावंडे चडूंक लागिल्ल्यान तांच्या कश्टाचीं फळां आयचे तियात्रिस्त चाकतात. असलोच एक दिगदर्शक म्हळ्यार ‘ऐस डायरेक्टर’, किंग ऑफ डुएट्स’ आनी ‘एवरग्रीन हिरो’ म्हण बिरूद जोडिल्लो सर्गेस्त सी. आल्वारीस. तांणी रोयिल्ल्या रुखाचीं फळां फुडले पिळगेक चाकूंक मेळचे खातीर आयच्या तियात्रिस्तांनी ह्या रुखाची, म्हळ्यारूच तियात्र पालकाची, जतनाय घेवंक जाय.
आयज, गोंयांत तियात्राची दशा बेसुरवाणी जाल्या म्हणटकच हो चुटकुलो हांव आयच्या तियात्रिस्तांक भेटयतां आनी तातूंतल्यान आयचे तियात्रिस्त कितें तरी लिसांव शिकून घेतले अशी अपेक्षा बाळगितां. ही घडणी म्हाका तिगां तियात्रिस्तांनी -आल्फ्रेड रोज, कुस्तादियो रिबेलो आनी रिओ रोजा हांणी – तीन वेग- वेगळ्या प्रसंगांनी आनी तीन वेग – वेगळ्या सुवातांनी सांगलोली. तिचो सारांश म्हळ्यार आदल्या तियात्रिस्तांचो भाविकेचो एकचार. जरी जुआंव आगोस्तिनो फर्नांडिस जावन आसा. पाय तियात्रिस्त तरी एका काळार सी. आल्वारीस वर्तोलो रेस्पेतान मानिल्लो बापूय वा अपुरबायेचो इर्मांव तियात्र पालकाचो. ताचें उतर कोणूच खाला पडूंक दिनासले. विशेश करून ‘नोन अल्कोलीक’ गुणाक लागून, सोरो पिवून जिवीत इबाडटल्या जायत्यांक ताणें आपले दोळेच घुंवडावन सरळ रस्तो दाखोवन नीट मार्गान हाडिल्ले. उपरांत सोरो सोडून ते व्हड तियात्रिस्त वा व्हड व्यक्ती जावंक पावले. तातूंतलो एकलो म्हळ्यार सर्गेस्त टॉनी काब्राल (ऑपेलियाचो भाव) हाची गवाय दितलीं तियात्रिस्तां जशे परीं सिरीयाको डायस, बॅटी फेर्न्स, फेलिक्स-डॅरीक मेंडीस, जेस्सी, सी डि सिल्वा आदी. आयजूय आमचे मदीं आसात. सोरो पियेल्लो तियात्रिस्त सी. आल्वारीसाच्या फुड्यांत उबो रावंक नशीब जाय आसलें. देखून सोरो पियेतले तियात्रिस्त निमाणो पड्डो जायसर सोऱ्यांक हात लायनासले. सी. आल्वारीस एक कडक शिस्तीचो मनीस आसलो आनी सांगाती तियात्रिस्त ताच्या उतरा भायर चलूंक मुश्कील.
मिल्टन फर्नांडीस नांवाचो एक हौशी तियात्र दिगदर्शक आसलो. तो धोबीतलाव कुडांत रावतालो आनी उर्बेन तियात्र बरोवन वर्साक एकदां वा दोनदां आपले तियात्र पालकार हाडटालो. वेव्हारीक मळार तियात्र पालकार हाडटाना तो आपलो तियात्र दिग्दर्शीत करूंक प्रोफेशनलाक दितालो आनी आपल्या तियात्रांत थोडे भोव उमेदीच्या नव्या तियात्रिस्तां वांगडा चडावंत नांवादीक वेवसायीक तियात्रिस्तांक घालतालो. ताचें हें वेव्हारीक तियात्राचें गणीत अखंड आशिल्ल्यान ताचे तियात्र ‘हाउसफूल’ तशे ‘हिट’ जाताले. ताणें अशे तरेन मुंबयंत सुमार स – एक तियात्र दाखयल्यात.
अशेंच धोबीतलाव ताचो एक तियात्र आदीं फुडेंच हाउसफूल जाल्लो आनी ग्रीन रुमांत तियात्रिस्त ‘मॅक-अप’ करतना. आल्फ्रेड रोजान आपणाक ताच्या आदल्या एका तियात्राक शॅर मेळोवपांत खूब उठाबशी काडूंक पडिल्ल्यान मिल्टनाक कुशीक व्हरून लुहान सांगलें. डायरेक्टर सायब, तियात्र सुरू जावंचे पयलीं मात म्हजो ‘शॅर’ दी, मागीर कटकट नाका.’
रुबाबान भरून मिल्टनान कितें म्हणचें? “ इर्मांव, तूं तियात्र सोडून गेल्यार जाता.” आल्फ्रेड रोज थंड पडलो खंय. फुडें कितें म्हणचें तेंच ताका समजना जालें. कुशीक सी. आल्वारीस बसून आसलो. ताणें हें ‘कुचू- कुचू’ करून उलोवप जातालें तें आयकलें. त्या काळार सी. आल्वारीस आनी आल्फ्रेड रोज हांचें नातें तितलें बरेपणाचें वसनासलें. देखून आल्फ्रेड रोज ओगी पडलो. चिंतून सी. आल्वारीस आपल्या आदाराक येवंचो ना म्हण. पूण उठलो सी. आल्वारीस कदेली वयलो आनी मिल्टनाक फुडो करून विचारलें. “ तुवें कितें म्हणलें रे? परत म्हूण पळोवया …” मिल्टनान त्याच हाऊसफूल रुबाबान सांगलें. “इर्मांव तो म्हणटा आपणाक तियात्र सुरू करचे पयलीं शॅर दी म्हण. तियात्र सुरू करचे पयलीं ‘ शॅर ’ फारीक करचो म्हण खंयचो कायदो आसा? म्हणटकच हांवें सांगलें ताका तो गेल्यार जाता.”
“ हय?.. अशें?… तूं कितें तियात्रिस्तांचो सुमार करताय? ” उपरांत हेर सांगाती तियात्रिस्तांक फुडो करून सी आल्वारीसान म्हणलें, “ चलात सगळे. ‘ मॅक-अप काडात आनी ‘ पॅक-अप करात.’ आमी चल या. डायरेक्टराक, आमी गेल्यार जाता खंय !.. थंयच कडकडून मिल्टन बाबडो दिमयेर वचून सी. आल्वारीसाचे पांय धरून ‘गुन्यांव भोगोस इर्मांव’ म्हण पांय पडलो. खंय आनी रोखडोच आल्फ्रेड रोजाचेच न्हय पूण तियात्रांत भाग घेतिल्ल्या दर एका तियात्रिस्ताचे शॅर’ थंयचे थंय फारीक केले. तियात्रिस्तांचो सुमार करतलो फसलो !
ही घडणी आमकां कितें शिकयता?.. मनशां मदीं अंतरां उप्रासतात आनी वसतात. वो संदी ! पूण त्या अंतरांक लागून आमी आमच्या एकवटाक वेर येवंक दिवंक फावना. पेल्या कडेन आपलें जुळोना म्हणून ताचे असकताये वेळार ताचो फायदो घेवप सारकें ना. आसली वागणूक वा करणी भेंकऱ्यांची मनाचो बरो विकास जाल्लो मनीस तसो वागना. ‘संवसार सुदरलो’, म्हण एम. बॉयरान सांगलेलें. पूण सी. आल्वारीसान ते फुडें वचून ‘संवसार सुदरलो पूण मनीस सुदरूंक ना’ म्हुणलें सत आमकां पटोवन दिल्लें. आदल्या काळा वेल्या तियात्रिस्तांक वा लोकांक शिकप नासलें म्हण जो समज आसा तो साप्प चुकीचो. आदल्या तियात्रिस्तांचे चर्चेंक लेगीत उभारी आसताली. आनी देखूनच दिसता समाजीक माध्यमानूय वा ‘सॉशल मिडीया’न तांच्या काळार प्रवेस करपाचें धाडस केलें ना. शिक्षण आनी साक्षरताय हांचे मदलो फरक समजपाक जाय. शिक्षण म्हळ्यारूच साक्षरताय म्हण समजप चुकीचें, देखून आयज यूटूबाचेर दर दिसा कितलींय पदां पसरतात जाल्यारूय तियात्र प्रेक्षकांक आयजूय तींच आदलीं कांतारां आयकूंक आवडटात ते वरवीं ‘ऑल्ड ईड गोल्ड’ म्हण मानून घेतना मात्र आमकां दुखता.
आयज एक तियात्र येस मेळोवंक पावलो जाल्यार सांगाती तियात्रिस्त त्या येसस्वी दिग्दर्शप्यान ‘गोंडे’ केल्यात म्हण प्रचार करीत चल्ले. एक तियात्र गोंडे केले म्हण फुलना. ताका कला जाय, ताका प्रमाणीक तियात्रिस्तांचो एकवट एकचार. सहकार आनी अखंड वावरुय जाय. आपल्या मनशाक सांबाळूंक आमी गरज. एक तियात्र फुल्लो म्हळ्यारूच तियात्र आनी तियात्रिस्तपण फुल्लें म्हण मानून घेवपाची शक्ती आनी तांक आयच्या तियात्रिस्तां मदीं वसूंक जाय. एका तियात्रिस्ताक अकमान तो सगट तियात्रिस्तांक अकमान म्हण समजपाची बुध्द आमकां आसूंक जाय. तियात्रिस्ताचे ‘विकिपिडिया’- चेर जांव ‘डिरेक्टरी’ -चेर नांव आयलें म्हण वा मोट्टी फायल रचून तियात्रिस्तपणाचो पुरस्कार मेळयलो म्हण तियात्रिस्त जायना ! तियात्रिस्तपण म्हळयारूच ‘पाय तियात्रिस्त जुआंव आगोस्तीनो’ वा ‘इर्मांव’ सी. आल्वारीस आनी हेर असल्या तियात्रिस्ताचे सभाव – गूण तुज्यांत उपजूंक जाय. तेन्नाच मात्र तियात्रिस्तांचो सुमार करूंक कोणाक धाडस आसचें ना.
(लिपयांतर – विशाल खांडेपारकार, 8080622370)
फाऊस्तो वि दा कॉस्ता
9821228684
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
