भांगरभूंय | प्रतिनिधी
चार दिसांनी 2710 गाडयांची नोंदणी
भांगरभूंय । प्रतिनिधी
पणजी : संवसार पाडवो, ईद अशा सणांक लागून गोंयांत फाटल्या सप्तकांत गाडयांची नेटान खरेदी जाली. येरादारी खात्या कडेन 16 ते 21 मार्च ह्या कालांत गोंयांत 3181 गाडयांची नोंद जाली. हातूंतल्यो 2710 गाडयांची नोंदणी 16 ते 19 मार्च ह्या चार दिसांतूच जाली. जाल्यार 20 आनी 21 ह्या दोन दिसांनी 374 गाडयांची नोंदणी जाल्या. अंदूं 19 मार्चाक संवसार पाडवो जाल्यार 21 मार्चाक ईद मनयली. येरादारी खात्या कडल्यान ही म्हायती मेळ्ळ्या.
मेळिल्ले म्हायती प्रमाण, 16 ते 21 मार्च ह्या काळांत नोंदणी जाल्ल्या वट्ट गाडयांतल्यो सगल्यांत चड 2174 दुचाकी आशिल्ल्यो. जाल्यार ह्याच काळांत 755 चार चाकी गाडयांची नोंद जाली. तशेंच 83 प्रवासी गाडयो, 76 प्रवासी दुचाकी, 11 तीन चाकी, 9 अवजड गाडयो आनी 11 हेर तरांच्या गाडयांची नोंदणी जाली.
आरटीओ कार्यालया प्रमाण पळयत जाल्यार म्हापशेंच्या आरटीओंत सगल्यांत चड 623 गाडयांची नोंदणी जाल्या. मडगांव आरटीओंत 487, दिवचले 439 गाडयांची नोंदणी जाली.
वयल्या काळांत पणजी आरटीओंत 426, फोंड्यां 376, वास्को 257, केप्यां 198, काणकोणां 103, पेडण्यां 189 गाडयांची नोंदणी जाली. सगल्यांत उण्या गाडयांची नोंदणी धारबांदेडें आरटीओ कार्यालयांत जाली.
गोंयांत 1 जानेवारी ते 21 मार्च 2026 ह्या काळांत वट्ट 21 हजार 856 गाडयांची नोंदणी जाल्या. तातूंत 14 हजार 742 दुचाकी, 5107 चारचाकी, 627 प्रवासी जाल्यार 560 माल येरादारी, 141 अवजड, 77 मध्यम स्वरुपाची माल येरादारी करपी गाडयो जाल्यार 51 तीन चाकी गाडयांचो आस्पाव आसा.
पेत्रोलाच्या गाडयांक चड पसंती
गोंयांत 1 जानेवारी ते 21 मार्च 2026 ह्या काळांत वट्ट नोंदणी जाल्ल्या गाडयांतल्यो सगल्यांत चड 16 हजार 899 गाडयो पेत्रोला वयल्यो आसात. ह्याच कालांत 2542 ईव्ही गाडयो, 1349 डिझॅल जाल्यार 318 सीएनजी गाडयांचो आस्पाव आसा. वयल्या काळांत येरादारी खात्याक कर आनी परवानन्यांच्या स्वरुपांत 106 कोटी रुपयांचो महसूल मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
