भांगरभूंय | प्रतिनिधी
सध्या संवसारीक वन-डे क्रिकेट सर्ती निमतान देशांत क्रिकेटीचें वारें व्हांवपाक लागलां. संवसारांतल्या हेर
देशांतल्या लोकांक जसो हो खेळ आवडटा ताचे परस ताचें चड पिशें आशिया खंडांतल्या लोकां मदीं आसा! भारता सयत पाकिस्तान, श्रीलंका, बांगलादेश, अफगाणिस्तान आनी नेपाळांत क्रिकेट मॅच म्हणल्यार एक व्हड उत्सव कसो! जाण्टे, भुरगे, तरणाटे, चलयो आनी बायलो लेगीत क्रिकेट मॅच तातूंतले तातूंत भारतीय पंगड खेळटा जाल्यार टीव्ही सामकार बसून आसतात. क्रिकेट खेळांतले खीण चुकचे न्हय हे खातीर कांय जाण कामाचे सुवातेर मोबायल स्क्रिनीचेर हो खेळ पळयतात. वन-डे क्रिकेट सर्तीची पयली संवसारीक सर्त इंग्लंडांत जाल्ली. तेन्ना तिका प्रुन्डशीयल वर्ल्ड कप अशें म्हणटाले. आंतरराष्ट्रीय क्रिकेट परिशदेन तिचें आयोजन करपाक सुरवात केली. अंदूंचें तिचें हें 13वें वर्स आसा.
संवसारीक क्रिकेट सर्तीचें आयोजन भारत पयलेच फावट स्वंतत्रपणान करता. हाचें पयलीं भारत आनी पाकिस्तान क्रिकेट मंडळान ही सर्त आयोजीत केल्ली. 5 आक्टोबरच्यान हे सर्तीक सुरवात जाली. ती 19 नोव्हेंबर मेरेन चलतली. सध्या देशभर क्रिकेटीचे वारें भरला! 1983 आनी 2011 वर्सा भारत वन-डे क्रिकेटीचो संवसारीक वस्ताद थारिल्लो. अंदूं ही सर्त जिखपाचें सर्तींत भारत मुखेल दावेदार आसा. भारत, इंग्लंड आनी ऑस्ट्रेलिया हांचे मदीं वस्तादपणा खातीर कस लागतलो अशें दिसता. पूण क्रिकेट खेळांत केन्ना किदें जायत हें सांगपाक जायना देखून अमूकच पंगड जिखतलो अशें सांगपाक जायना. खंयच्याय देशांत दुसऱ्या देशांत वचून खेळचे पयलीं थंयचे परिस्थिती कडेन जुळोवन घेवचें पडटा. सर्त जशी फुडें वतली तशी विदेशी पंगड भारतांतले परिस्थिती कडेन जुळोवन घेवन आपली कमाल दाखोवपाक शकतात.
वन-डे (ओडीआय) क्रिकेट मर्यादीत ओवरींच्या क्रिकेटीचें एक रूप. तातूंत दरेका पंगडाक थारावन दिल्ल्यो ओव्हरी खेळच्यो पडटात. टॅस्ट मॅची पांच दिसांच्यो आसतात. पयलीं, टॅस्ट मॅचीं खेळचे पयलीं तीन दिसांच्यो मॅची खेळटाले. उपरांत दोन देशां मदीं टॅस्ट मॅची जातात्यो. दरेका गजालींत बदल जायत वतात. पयलीं स्टेडियमांत वचून पांच दीस मॅची पळोवपाचें पासियेंश क्रिकेट मोगीं मदीं आसतालें. आतां लोकां कडेन तितलो वेळ ना. संवसार गतिमान जाला. क्रिकेटीक ते प्रमाण आपलें रूप बदलचें पडलें. पांच, तीन दिसां उपरांत मर्यादीत ओव्हरींची मॅच जाली. 50-50 उपरांत आतां टी-20 हे क्रिकेटीचें रूप क्रिकेट मोगींचें आवडीचें जालां. इंडियन प्रिमीयम लीग (आयपीएल) सर्तींत क्रिकेटींत आतां पुरायपणान वेवसायीक रुप दिलां.
वन-डे मॅचींचो जनक हो ऑस्ट्रेलियेंतल्या चॅनल 9 ह्या टीव्ही चॅनलाचो कोट्याधीश धनी कॅरी पॅकर. ताणें संवसारांतल्या सगल्या देशांतल्या नामनेच्या खेळगड्यांक पयशांचें हांयस दाखोवन ऑस्टेलियेंत डे-नायट क्रिकेट मॅची सुरू केल्यो. संवसारांतल्या सगल्या क्रिकेट बोर्डांनी ताका खर विरोध केलो. हे क्रिकेटीक कॅरी पॅकर सर्कस म्हणून हिणसायलें. तातूंत वांटो घेतिल्ल्या खेळगड्यांक देशा वतीन क्रिकेट खेळपाक बंदी घातली. आमच्या सुनील गावस्काराक कॅरी पॅकरान इंग्लंडाचो तेन्नाचो कॅप्टन टोनी ग्रेग हाचे वरवीं हे सकर्शींत ओडपाचो यत्न केलो. पूण गावस्कारान देश पयलीं हें तत्व स्विकारून देशा खातीरूच खेळपाचो निर्णय घेतलो. कसल्याय बदलांत सुरवेक विरोध जाता. पूण मागीर ते लोकांच्या संवकळीचें जाता. कॅरी पॅकरान क्रिकेटींत केल्लो बदल आतां लोकप्रीय जाला आनी ताचें डे-नायट हें स्वरुप सर्वमान्य जालां.
दोन देशां मदली पयली अधिकृत वन-डे मॅच 5 जानेवारी 1971 दिसा ऑस्ट्रेलिया आनी इंग्लंड हांचें मदीं ऑस्ट्रेलियेंत मेलबर्न स्टेडियमाचेर जाल्ली. ताचें अशें जालें ऑस्ट्रेलिया आनी इंग्लंड हाचे मदीं अॅशेश माळेंतलीं टॅस्ट मॅच आशिल्ली. पावसाक लागून तीन दिसांचो खेळ जावपाक शकलो ना. तिकेटी काडून खेळ पळोवपाक आयिल्ल्या क्रिकेट मोगींचो विरस जावचो न्हय हे खातीर ऑस्ट्रेलियन क्रिकेट बोर्डान दरेकी 40 ओव्हरींची (दरेक ओव्हर आठ बॉलांची) मॅच खेळोवपाचें थारायलें. ही मॅच ऑस्ट्रेलियेन जिखली. क्रिकेटीचें हें वन-डे स्वरुप हांगच्यान सुरू जालें. उपरांत कॅरी पॅकरान मर्यादीत ओव्हरींच्यो डे-नायट क्रिकेट मॅची सुरू केल्यो.
क्रिकेट टीव्ही प्रसारणांत जायते बदल करपाचें स्रय लेगीत कॅरी पॅकराक दिवपाक जाय. तागेलें चॅलन-9 हें खेळां चॅनल. ताणें मेलबर्नच्या वीएफएल पार्कांत डब्ल्यूएससी ऑस्ट्रेलिया आड डब्ल्यूएससी वेस्ट इंडीज हांचें मदीं पयली डे-नायट क्रिकेट मॅच घडोवन हाडली. खेळगड्यांत धव्या कपड्यांत खेळोवपाच्या बदला ताणे रंगीत कपड्यांक खेळपाक सांगलें. ताका लागून टीव्ही प्रसारणांत रंग आयलो. टीव्ही प्रसारणा खातीर कितलेशेच कॅमेरो कोन, पिचीर विकेटकिपराचो आवाज कॅप्चर करपी प्रवाभी मायक्रोफोन आनी ऑन स्क्रीन ग्राफिक्साचो वापर करपाक पॅकराच्या चॅनल-9 सगल्यांत पयलीं सुरवात केली. क्रिकेट खेळाक वेवसायीक रूप दिवन खेळगड्यांचो अर्थीक फायदो करून दिवपाक कॅरी पॅकराचें व्हडलें योगदान आसा.
सुदिन वि. कुर्डीकर
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
