भांगरभूंय | प्रतिनिधी
खबरां संस्था
नवी दिल्लीः. अंदूच्या वन-डे संवसारीक क्रिकेट सर्ती खतीर पाकिस्तान बीसीसीआय खातीर तकली फोड जावपाक लागला. ही सर्ती सुरू जावपाक दोन म्हयन्यां परस उणो वेळ आसा. पाकिस्तान बीसीसीआयच्या आडमेळ्यांत भर घालता अशें चित्र सद्या तरी दिसता. भारतांत जावपी हे सर्तीचें वेळापत्रक बीसीसीआय आनीी आयसीसीन उसरां जाहीर केलें. तशेंच सुरक्षा आनी हेर कारणांक लागून वेळापत्रकांत उपरांत बदल केलो. आता हैदराबाद क्रिकेट असोसिएशनान सुरक्षेचें कारण दिवंन बीसीसीआय वेळापत्रकांत बदल करपाची विनवणी केल्या.
कांय मॅचींच्यो तारखो हालींच बदलिल्ल्यो. अहमदाबाद आनी कोलकाता हांगा जावपी मॅचींच्या तारखो सणाच्या निमतान बदल्ल्यात. आतां हैदराबाद हांगा जावपी मॅचींची तारीक बदलपाक शकतात. 9 आनी 10 ऑक्टोबराक हैदराबादा सेगीत दोन मॅची जातल्यो. हैदराबाद क्रिकेट असोसिएशनान हे विशीं बीसीसीआय कडेन चर्चा केल्या. सेगीत दोन दीस मॅची आयोजीत करप आमचे खातीर कुस्तार जावपाक शकता अशें असोसिएशनान बीसीसाआय कळीत केलां.
9 ऑक्टोबराक राजीव गांधी स्टेडियमाचेर न्यूझिलंड आनी नेदरलंड हांचे मदीं मॅच जातली. दुसऱ्या दिसा ह्याच स्टेडियमाचेर श्रीलंका- पाकिस्तान मॅच जातली. दोन मॅचीं मदीं वेळ दिवपाची मागणी असोसिएशनान केल्या. सुरक्षा वेवस्था मतींत दवोरून तारीख बदलून दिवपाची मागणी ताणी केल्या. पाकिस्तान- श्रीलंका ही मॅच अधिकाऱ्यां खातीर सुरक्षेच्या प्रश्ना वयल्यान हुस्क्याची थारल्या. ही मॅच पयलीं 12 ऑक्टोबराक जावपाची आशिल्ली. मात अहमदाबादच्या नरेंद्र मोदी स्टेडियमाचेर 14 ऑक्टोबराक जावपी भारत- पाकिस्तान मॅच परत नियोजन केल्या उपरांत फुडें धुकल्ली. पाकिस्तान पंगडाक तयारी करपा खातीर वेळ मेळचो म्हणून ही वेवस्था करची पडली. भारतीय पंगड 8 ऑक्टोबराक चेन्नयत ऑस्ट्रेलिये आड आपले मोहिमेक सुरवात करतलो. हैदराबाद संवसारीक करंड सर्तींतल्या 45तल्या 3 मॅची जातल्यो.
कांय दिसां पयलीं भारत- पाकिस्तान मॅची सयत सर्तींत 9 बदल केल्यात. भारत- पाकिस्तान मॅच पयलीं 15 ऑक्टोबराक जावपाची आशिल्ली. मात तो नवरात्रीचो पयलो दीस आशिल्ल्यान गुजरात पुलीस अधिकारी सुरक्षा वेवस्थे विशीं हुस्क्यांत आशिल्ले. ताका लागून ही मॅच 14 ऑक्टोबराक दवोरल्या. कोलकातांत 13 नोव्हेंबराक पाकिस्तान- इंग्लंड मॅच जावपाची आशिल्ली. मात त्या दिसा काली पूजा आशिल्ल्यान हे मॅच 11 नोव्हेंबराक दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
