भांगरभूंय | प्रतिनिधी
मानसिक भलायकी हो विषय आयच्या ताणतणावाच्या जगांत गंभीर रूप घेता. हाचे आड समाजात आशिल्लो गैरसमज आनी कलंक ना करपा पासत व्हड जागृती जाय.
आयज 7 एप्रील. आज संवसारीक भलायकी दीस मनयतात. ह्या निमतान संवसारिक भलायकी संघटनेन आयज साबार लोकांक विज्ञानाच्या आदारान उबे रावपाचो उलो मारला. “भलायके खातीर एकठांय. विज्ञाना सयत उबे रावचें” हो आयचो विषय. या विशयांतल्यान ह्या वर्सा लोक, मोनजात, वनस्पत आनी या पृथ्वीची भलायकी राखपा खातीर शास्त्रीय सहकार्याच्या बळग्याची वर्सभर चलपी मोहीम सुरू जाता. ती विज्ञानीक कृती आनी पुराव्यांक कृतींत रुपांतरीत करपाक जाय आशिल्ल्या बहुपक्षीय सहकार्याचेर भर दिता. हें एक भलायकी पद्दतीचेर खर लक्ष केंद्रीत करून करप हो हेत आसा.
2026 वर्साच्या मोहिमेक आसतले दोन मुखेल जागतीक खीण: फ्रेंच जी-7 अध्यक्षपदा खाला फ्रांन्स सरकारान आयोजीत केल्ली आंतरराष्ट्रीय भलायकी शिखर परिशद (7 एप्रिल), आनी संवसारिक भलायकी संघटनेच्या सहकार केंद्रांचो उक्तावण जावपी जागतीक मंच (7-9 एप्रिल), 80 परस चड देशांतल्या सुमार 800 शास्त्रीय संस्थांक एकठांय हाडटलो. हे सगळे मेळून संयुक्त राष्ट्र संघटनेच्या भोंवतणी आतां मेरेन आपयिल्लें सगळ्यांत व्हडलें शास्त्रीय जाळें.
ही विज्ञानान चालीक लायिल्ली भागीदारी सगळ्यां खातीर भलायकेन भरिल्लो, सुरक्षीत फुडार कसो तयार करूंक शकता हाचेर भर दिता. ही मोहीम सगळ्या वाठारांनी लोकांक वांटो घेवपाक आपयता. विज्ञान जिवीत कशें सुदारता हाचेर सांगतां भर आसतलो.
मोहिमेचे ध्येय
सरकारांक, शास्त्रज्ञांक, भलायकी सेवकांक, भागीदारांक आनी भौसाक हे मोहिमेंत उलो मारला की,
भलायकेची राखण करपा खातीर पुरावे, तथ्य आनी विज्ञान आदारीत मार्गदर्शना कडेन गुंतून रावन विज्ञान वांगडा उबे रावप; विज्ञान आनी भौशीक भलायकेचेर विस्वास परतून निर्माण करप; आनी
भलायकेन भरिल्ल्या फुडारा खातीर विज्ञानाच्या फुडारपणा खाला उपायांक आदार दिवप.
तशेंच भलायकी हो दरेक व्यक्तीचो मुळावो मनीस हक्क आसा हाचीय याद करून दिवपी हो संवसारीक भलायकी दीस. भलायकी जतनाय वेवस्था घटमूट करप, दर्जेदार सेवांचो वापर आधी उपलब्धी सुदारप, आनी लोकांचेर भलायकेन आनी गरिबीचें जिवीत जगपाची पाळी हाडपी असमानताय हाताळपाचें म्हत्व तातूंत उजवाडाक हाडटले.
भलायकी जागृताय आनी सामुहीक जापसालदारकेक चालना दिवन, हो दीस समुदाय आनी धोरण निर्मात्यांक सार्वत्रिक भलायकी सेवा निर्मणी आनी सगळ्यां खातीर एकंदर बरेपण पावोवपा खातीर एकठांय काम करपाक प्रोत्साहन दिता.
दिव्यांग मनशां पासत भलायकी सेवा दिसाचें खेरित म्हत्व आसा. दिव्यांग आशिल्ल्या व्यक्तीं खातीर संवसारीक भलायकी दीस समावेशक आनी सुलभ भलायकी जतनाय घेवपाची बेगोबेग गरज हाचेर भर दिता. जायत्या अशा व्यक्तींक मुळाव्या साधनसुविधांचो उणाव, मर्यादीत जागृताय, कलंक आनी फावो ती आदार सेवा सोपेपणान मेळप ना अशा आडमेळ्यांक दिसपट्टें तोंड दिवचें पडटा. सुलभ सुविधा, प्रशिक्षीत भलायकी जतनाय वेवसायीक, परवडपी उपचार आनी समुदाय आदारीत काळजी सुनिश्चीत करप गरजेचें आसा. खऱ्या अर्थान भलायकेन भरिल्लो समाज म्हणल्यार कोणूच फाटीं उरना, आनी अक्षम व्यक्तींक भलायकेन, स्वतंत्र आनी पूर्ण जिवीत जगपाक सशक्त करप.
खास करून हेमोफिलिया सारक्या रक्त बादित दिव्यांग घटकाक सरकारान ‘एक समाज, एक वैजकी उपचार’ ही मोहीम देशभर चालीक लावप अपेक्षित आसा. जाण्टे, दुर्बळ घटक हांचे पासत सोपेपणान आधी सवलतीन भलायकी सेवा मेळपाची तजवीज सरकारांनी करची हाची आज याद दिवंया.
मानसिक भलायकी हो विषय आयच्या ताणतणावाच्या जगांत गंभीर रूप घेता. हाचे आड समाजात आशिल्लो गैरसमज आनी कलंक ना करपा पासत व्हड जागृती जाय. ही सरकार तशेंच शिक्षित समाजाचीही जापसालदारकी हाची तांकां याद दिवंया.
– प्रकाश वा. कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
