भांगरभूंय | प्रतिनिधी
नवी दिल्ली, खबरां संस्था ः संवसारीक पांवड्यार मरण येवपाचें प्रमाण 67 टक्क्यांनी देंवलां. पूण तरणाट्यां मदीं मरण येवपाचें प्रमाण तितलेंशें उणें जावंक ना असो निश्कर्श ‘द लान्सेट जर्नल’त उजवाडाक आयिल्ल्या संशोधनांतल्यान दिसून काडला. आत्महत्या, ड्रग्साचें चड सेवन आनी सोरो चड पियेवप हीं तरणाट्यां मदीं मरण येवपाचीं मुखेल कारणां.
‘द लान्सेट’च्या अभ्यासा प्रमाण, 2023त चीनांत सगळ्यांत चड 1.07 कोटी लोकांक मरण आयलें. ताचे उपरांत भारतांत 98.5 लाख आनी अमेरिकेंत 30 लाखां परस चड लोकांक मरण आयलें. पूण लोकसंख्येच्या तुळेत मरण येवप्या मदीं भारताचो क्रमांक 73वो आसा. चीनाचो 166वो आनी अमेरिकेचो 160वो क्रमांक आशिल्लो. कोरोना महामारी संबंदीत मरण आयिल्ल्या मदीं भारत पयल्या पांच देशां मदीं आसा.
‘ग्लोबल बर्डन ऑफ डिसीज (जीबीडी) 2023’ ह्या संवसारीक पांवड्यार केल्ल्या संशोधनांत 3 लाख 10 हजारां परस चड सूत्रां कडल्यान मेळिल्ल्या म्हायतीचें विश्लेशण केलां. संवसारभरांतले 14 हजारां परस चड संशोधक आनी तज्ञांनी ह्या संशोधनांत वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
