भांगरभूंय | प्रतिनिधी
कितेंय म्हायती सोदपाची आसल्यार गुगल डॉट कॉम (Google.com) हो पर्याय संवसारांतले सगळेच लोक वापरतात. आयज गुगलाचो 25 वो वाडदीस. ह्या सर्च इंजिनाक 25 वर्सां पुराय जाल्ल्यान एक खाशेलें डूडल तांणी तयार केलां. ताचेर क्लिक केल्यार गुगल सर्च इंजिना विशीं म्हायती मेळटा.
27 सप्टेंबर 1998 हो गुगलाचो जल्मदीस. इंटरनॅट सुरू जाले उपरांत ताका मुखार व्हरपाक आनी विंगड विंगड म्हायती दिवपाक गूगल ह्या सर्च इंजिनान मुखेल भुमिका साकारल्या. कॅलिफोर्नियांतल्या स्टॅनफर्ड विद्यापिठांतल्या लॅरी पेज आनी सर्जी ब्रिन ह्या दोन विद्यार्थ्यांनी 1998 त गुगलाची थापणूक केली. गुगल प्रत्यक्षांत रिचर्स प्रकल्प म्हणून सुरू जाल्लो. लॅरी आनी सर्जी हांणी Google.stanford.edu ह्या पत्त्याचेर इंटरनॅट सर्च इंजिन तयार केलें. तशेंच तांणी अधिकृतपणान सुरू जावचे पयलीं ताका ‘बॅकरब’ अशें नांव दिलें. जें उपरांत गुगल अशें नांव जाले. ह्या वेळार ह्या विद्यार्थ्यांनी आपल्या सिस्टमाक गुगल हें नांव दिलें आनी गूगल संवसारांतलें नंबर 1 सर्च इंजिन म्हणून फामाद जालें.
गुगल डॉट कॉम डोमेनाची नोंदणी 15 सप्टेंबर 1995 दिसा जाली. गुगलाची 4 सप्टेंबर 1998 दिसा कंपनी म्हणून नोंदणी जाली. 27 सप्टेंबर 1998 दिसा गुगल सर्च इंजिनाचेर सोदलें. तेन्नासावन होच गुगलाचो वाडदीस मानतात. गुगल हें आयज संवसारांतलें सगळ्यांत व्हडलें सर्च इंजिन. आयज तुमकां गूगला वरवीं शंबरां परस चड भाशांनी म्हायती मेळूं येता. सर्च इंजिन गुगल हे लॅपटॉप, संगणक, मोबायल फोनाचेर व्हड प्रमाणांत वापरतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
