भांगरभूंय | प्रतिनिधी
आयज 22 मार्च, आयचो दीस संवसारीक जल दीस म्हूण पुराय संवसारांत मनयतात. उदक ही सजीव आशिल्ल्या सगल्या प्राण्यांची मुळावी गरज. उदका बगर खंयचोच सजीव प्राणी जगूंक शकना. उदकाची गरज ना अशें खंयचेंच मळ ना. पूण आयज संवसारभर उदकाचो भिरांकूळ उणाव निर्माण जाला. पयलीं थोड्या स्वरुपांत उपलब्ध आशिल्ल्या उदकाचो आयज व्हड प्रमाणांत उणाव जाणवत आसा. उदकाचें म्हत्व खूब व्हड आसा. उदकाचो सांबाळ करप ही काळाची गरज जावन आसा. हाका लागून उदकाच्या सांबाळा खातीर जागरुकताय निर्माण जावची हे खातीर संयुक्त राष्ट्रान 1992 वर्सा जाल्ल्या अधिवेशनांत 22 मार्च हो दीस संवसारीक जल दीस म्हूण जाहीर केलो.
उपरांत 22 मार्च 1993 दिसा पयले फावटी संवसारीक जल दीस मनयलो. ब्राझीलाची राजधानी रियो डी जिनोरियो हांगा पयलो जल दीस मनयलो. पूण बचती खातीर संवसारभरांत जागरुकताय निर्माण करप हो ह्या दिसाचो मुखेल उद्देश आसा. 22 मार्च होच दीस संवसारीक जल दीस म्हणून वेंचून काडपा फाटलें कारण लेगीत तशेंच आसा. 22 मार्चा सावन वातावरण बदलपाक सुरवात जाता. हाका लागून तात्वीक नदरेन पावसाची सुरवात जावपा खातीर हो दीस कारण थारता. हो तर्क वापरून हो दीस वेंचून काडलो. धर्तरेर उदकाचें प्रमाण 71 टक्के इतलें आसलें तरी पियेवपाचें उदक थोड्या प्रमाणांत आसा.
वाडटे लोकसंख्येची तान भागोवपा खातीर हें उदक उणें पडटा. उदक ही सजिवांची मुळावी गरज आसली तरी हेर सजीव उदकाचो इबाड करिनात. मनीस मात उदकाचो इबाड व्हड प्रमाणांत करता. गरजे परस चड उदक वापरता. उदक वापरपाचे नवे नवे मार्ग मनीस सोदीत आसता. ताका लागून उदकाची खरताय जाणवता. हवामान बदलाक लागून पावसाचे पद्दतींत गतीन बदल जायत आसा.
पयली नेमान पडपी पावस आतां बेभरवंशाचो जाला. पावसाचे दीस आनी पावसाचें प्रमाण लेगीत उणें जायत चल्लां. ताका लागून दुश्काळाचें प्रमाण लेगीत वाडलां. जाग्याजाग्यांनी बोरवेल घेवन जमनी पोंदचें उदकूय मनशान सोंपयलां. ताका लागून फुडारांत उदकाचो उणाव ही समस्या आनीक गंभीर जातली. ताका लागून घडये उदका खातीर तिसरे म्हाझूज जातलें असो अहवाल कांय दिसां पयलीं संयुक्त राष्ट्र संघान दिला. 2025 मेरेन संवसारांतल्या एक तृतियांश देशांनी उदकाचो उणाव जातलो अशे संकेत शास्त्रज्ञांनी दिल्यात.
आशिया खंडा विशीं सांगपाचें जाल्यार भारतांत उदकाचो उणाव व्हड प्रमाणांत आसा. दर वर्सा 40 टक्के गांवांनी दुश्काळ आसता. महाराष्ट्रांतल्या मराठवाडो सारक्या विभागांत दर वर्सा दुश्काळ आसता. लातूर सारक्या शाराक रेल्वेन उदका पुरवण करची पडटा. ग्रामीण वाठारांनी जाल्यार उदकाचो उणाव गंभीरपणान जाणवता. खूबशा गांवांनी टँकरांनी उदका पुरवण करची पडटा. एकदां आयिल्लो टँकर आठ दिसांनीच परतून येता. कांय गांवांनी तर एका म्हयन्यांत एकदांच उदक मेळटा. हांडोभर उदका खातीर बायलांक कितलेशेच किलोमिटर चलून उदक हाडचें पडटा. उदक ही सैमीक संपत्ती. कृत्रीम उदक तयार करपाक अजून लेगीत शास्त्रज्ञांक येस आयलें ना म्हणूनच आसा त्या उदकाचो सांबाळ करप हेंच आमच्या हातांत आसा.
उदकाचो सांबाळ हीच उदकाची निर्मिती आसा. उदकाचो सांबाळ करूनच आमी उदकाच्या उणावाचेर मात करूंक शकतात. ‘जल है तो कल है…’ हे उक्ती प्रमाण फुडारांतलो काळ सुखाचो करपाचो आसत जाल्यार उदकाचो सांबाळ करचोच पडटलो. आयच्या दिसा दरेकान उदक सांबाळपाचो संकल्प करून उदकाच्या सांबाळा खातीर यत्न केलो जाल्यारूच संवसारीक जल दिसाचें सार्थक जालें अशें म्हणचें पडटलें.
श्याम बसप्पा ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
