भांगरभूंय | प्रतिनिधी
संवसारांत विंगड विंगड संस्कृतायो, भासो, परंपरा आसात. मनशाच्या अभिव्यक्तीच्या ह्या गिरेस्त कॅनवासाचें एक आंग म्हणल्यार कुरवांभास. दरवर्सा हो दीस (आयडीएसएल) मनयतात. भेड््या समाजा खातीर संवाद साधन म्हणून कुरवां भाशेचें म्हत्व. तशेंच हो दीस समाज चड समावेशक आनी सुलभ संवसार घडोवपाक हे भाशेची भुमिका याद करून दिवपाचें काम करता.
दिसाचें म्हत्व
23 सप्टेंबर हो आंतरराष्ट्रीय कुरवां भाशेचो दीस दर वर्सा मनयतात. संयुक्त राश्ट्रांच्या भौशिक सभेन स्थापन केल्लो आयडीएसएल संवसारभरांतल्या आयकूंक- उलोवंक अक्षम लोकांक मानवी हक्क फावो करपाक कुरवां भाशेचें म्हत्व प्रस्तापित करता. भेड्ड्या समाजाच्या समस्यां विशीं आनी आव्हानां विशीं जागृताय करप, कुरवां भाशेच्या संस्कृतायेची गिरेस्तकाय मनवप आनी भाशीक विविधताय वाडोवप हो ह्या दिसाचो हेत.
शाश्वत उदरगती खातीर कुरवां भास
संयुक्त राश्ट्रांनी थारायिल्लें शाश्वत उदरगत ध्येय सगळ्यां खातीर बरो आनी चड टिकावू फुडार साध्य करपाचो एक नकासो. ह्या ध्येयां मदीं सगळ्यां खातीर समावेशक आनी दर्जेदार शिक्षण सुनिश्चीत करपाची आनी आजीवन शिकपाक चालना दिवपाची वचनबद्धताय आसा. हातूंत कुरवां भासांची म्हत्वाची भुमिका आसता.
जेन्ना भेड्डे आनी आयकुपाक उणें आशिल्ल्या समाजाक तांच्या मूळ कुरवां भाशेंतल्यान शिक्षण मेळूंक शकता तेन्ना तें तांचे मनीस हक्क सांबाळटाच, पूण चड समावेशक समाज तयार करपाकय योगदान दिता, जंय दरेकल्याक शिकपाची आनी फुलपाची समान संद मेळटा.
आयडीएसएल 2025 खातीर कार्यावळी
सांकेतिक भास कार्यशाळा : तज्ञ प्रशिक्षकां कडल्यान वेगवेगळ्या कुरवां भाशांची मुळावी गजाल शिकची. नवशिक्यां खातीर वा आपलें गिन्यान फुडें व्हरपाक सोदपी लोकां खातीर संद.
भेड्ड्या समाजांतल्या फुडाऱ्यां कडेन, शिक्षणतज्ञ आनी पुरस्कर्त्यां कडेन कुरवां भाशेचें म्हत्व आनी संवसारांतल्या वेगवेगळ्या वाठारांनी या समाजाक भेकडावपी आव्हानां विशीं चर्चा करपाक सामील जायात. जे मेरेन ही भास म्हणून आमी रासवळ समाज समजून घेता, ती शिक्षणाचे, शिकोवपाचे यत्न शिक्षणीक मळार जायनात ते मेरेन हो भेड्डो अल्पसंख्याक समाज समाजांत असून लेगित वेगळो उरता. तांका चाटयेपावलाक भायर दवरिल्याची भावना जाणवता. आमच्या गोंया़त 3000 वयर अशीं भुरगीं जावं वयस्क आसात.
परस्पर संवादात्मक कार्यावळी :
कुरवां भाशेचो इतिहास आनी उत्क्रांती दाखोवपी कार्यावळी करच्यो. ताचे वांगडाच संवसारभरांतल्या भेड्डया समाजांतल्या लोकांच्या काणयांच्यो कार्यावळी करून तांचे अणभव समजून घेवंचे.
ऑनलायन संसाधनां: कुरवां भाशेच्या संवसारांत खोलायेन बुडपा खातीर व्हिडियो ट्युटोरियल्स, लेख आनी हेर ऑनलायन संसाधनांची गिरेस्तकाय अणभवची.
गुंतवप आनी वांटो घेवप: कुरवां भाशेचो प्रसार करपाक आनी या समाजाक आदार दिवपाक दरेकल्याची भुमिका आसूं येता. तुमी कशे तरेन हातूंत वांटो घेवंक शकतात तें पळयात
शिकात: कुरवां भाशेचीं मुळावीं तत्वां शिकून पयलें पावल उखलचें. थोड्यो लेगीत कुरवो समजून घेतल्यार संवादांतलीं अंतरां पयस करपाक फरक पडूं येता.
पुरस्कर्तो जावंचो: या समाजाक आशिल्ल्या आव्हानां विशीं जागृताय करप. म्हायती वांटप, समाजीक कार्यावळींनी वांटो घेवप आनी भेडु्या मनशांचे मालकीच्या वेवसायांक आदार दिवप.
अर्थिक पालव: कुरवां भाशेचो प्रसार करपाक आनी भेड्डया समाजाक समान संदी सुनिश्चीत करपाक वावुरपी संघटनांक आदार दिवप.
लक्षांत घेयात. आमच्या देशांतली सांस्कृतिक आनी भाशिक विविधताय मतींत घेवन आमच्या देशान एएसएल हे
अमेरिकेच्या संवसारिक कुरवांभाशे वांगडाच आयएसएल ही भारतीय कुरवां भास केल्या आनी ती शिकयतात. समाज समावेशी करपाक कुरवां भास शाळा धरून सगळ्या पांवड्यार शिकोवपा आमी समाजान सातत्त्यान जागृताय आनी यत्न करपाक फावो…आवाज ना तांचो आवाज जावन!
सांवसारिक कुरवां भाशेचो दीस पंचांगाचेर फकत एक दीस न्हय. समावेशकता, सुलभताय आनी समजूत वाडोवपाक सांकेतिक भाशेचें म्हत्व वळखुपाचे दिकेन ही एक जागतीक चळवळ. हो दीस मनयतना संवादाची शक्त, विविधतायेंतली तांक आनी दरेकल्याक, तांची तांक पळोवन, आयकुपाची समान संद मेळची हाची खात्री करपाची गरज याद करुया.
आंतरराष्ट्रीय सांकेतिक भाशेचो दीस 2025 मनयतना आमचे वांगडा वांटो घेयात आनी चड समावेशक संवसाराक चालना दिवपाक फरक करात. कोणूच फाटीं उरचो न्हय हाची खात्री आमी सगळे मेळून करूं येता.
प्रकाश वामन कामत
94224 43093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
