भांगरभूंय | प्रतिनिधी
देशांत अंदूं दिवाळेची खोस दुपेटीन वाडोवपाचें काम भारतीय क्रिकेट पंगडान केलां. पोरूं दिवाळेच्या आदल्या दिसा
टी-20 संवसारीक करंड सर्तींत मेलबर्न क्रिकेट स्टेडियमार विराट कोहलीन अक्षरशा पाकिस्तानाच्या तोंडांतलीं उणी काडून घेत भारताक मेळोवन दिल्ल्या थरारक जैताची रुच जाल्यार सामकी वेगळीच आशिल्ली. ताका लागून देशवासियांनी ती दिवाळी मनयतना कसलीच कसर दवरूंक नाशिल्ली. त्या थरारक जैताची याद हे दिवाळेक करपाचें काम रोहीत शर्माच्या भारतीय सेनेन देशवासियां सामकारूच केलां आनी दिवाळेचो जल्लोश चडूच बहरत गेलो. क्रिकेट होच आपलो धर्म मानपी भारतीयांक आमच्या पंगडान अंदूं जें भरभरून दिलां ताची कोणाच कडेन तुळा करपाक मेळची ना.
आयसीसी संवसारीक सर्तीचे सुरवेक सावन रोहीताचे शूर सेनेन ज्या निर्दयपणान वस्ताद इंग्लंडा सयत सगल्याच पंगडांक अक्षरशा कापून काडीत सांखळे फेरयेंत निर्विवादपणान सर्वोच्च सुवात मेळयली तें पळयल्यार क्रिकेटीचो झगझगपी संवसारीक करंड तिसरे फावटी आमकां कुले घालपाक लागला अशें म्हणपाक जाता. ताचेय मुखार वचून संवसारीक करंड आमचे खातीर फक्त दोन पावलां पयस आसा अशें म्हणलें जाल्यार ते अनुचीत थारचें ना. सांखळे फेरयेंतल्यो सगल्याच्यो सगल्यो म्हणल्यार णव मॅची सामक्यो एकहाती जिखून सर्तींत आतां मेरेन अजिंक्य राविल्ल्या भारतीय पंगडा खातीर तांच्या आतां मेरेनच्या दोळे दिपकावपी आनी लखलखते कामगिरीचो विचार केल्यार ताचे सामकार कोणूय व्हडलें आव्हान तयार करतलो अशें दिसना. तरीय निमाणें ‘हें क्रिकेट रे बाबा’ ह्या मंत्राचो विसर कोणाकूय पडचो ना अशी आस्त बाळगूनच ही दोन पावलां घालचीं पडटलीं.
संवसारीक करंडा खातीरचे क्रिकेट सर्तींत अशाय एका नेमाची आतां तजवीज करपाक जाय की सांखळे फेरयेंतल्यो सगल्यो मॅची जिखपी पंगडाक हाचे फुडें कसलीच मॅच खेळनासतना एक जर जैतिवंत म्हणून जाहीर करप वा निदान उपांत्य फेरयेची मॅच खेळप ना अशी सवलत दिवन थेट निमाणें फेरयेंत खेळपाची मेळकीक दिवप. रोहीत शर्माचे सेनेन सर्तींत आतां मेरेन केल्ल्या भव्यदिव्य अशे कामगिरी उपरांत कोणूय भारतीय अशा सपन रंजनांत रावल्यार ताचें अजाप दिसपाक नाका. ताचें कारण म्हणल्यार संवसारीक करंड सर्तीच्या फाटल्या 48 वर्सांच्या इतिहासांत अशी कामगिरी कोणे क्वचितूच केल्ली आसतली.
भारतीय पंगडान केल्ली कामगिरी हाचे पयलीं वेस्ट इंडीज आनी ऑस्ट्रेलियन पंगडानूय दोन फावटी केल्या हें मानून घेवन आयचे कठोर सर्तीच्या काळांत अशे कामगिरीची अपेक्षा कोणेय केल्यार कोणूच ताची गंभीरपणान दखल घेवचो ना. वस्ताद इंग्लंड धरून उपवस्ताद न्युझिलॅण्ड, चार फावटीचो वस्ताद आशिल्लो ऑस्ट्रेलिया, पाकिस्तान, दक्षीण आफ्रिका अशे एका परस सरस आनी बलाढ्य पंगड लडखडत आसतना आमची सेना ह्या पंगडाचो सामको फडशा उडयता अशें चित्र फाटल्या देड म्हयन्यांत आमी पळयतात. हाचे वेल्यान आमचें क्रिकेट हे मातयेंत कितले खोल मेरेन रिगलां हाची कल्पना संवसाराक आयल्या आसतली. 1983 वर्सा इंग्लंडांत दोन फावटी वस्ताद थारिल्ल्या वेस्ट इंडिजाक हारोवन आमी पयलेच फावटी संवसारीक वस्ताद थारले. तेन्नाच्यान भारतीय क्रिकेटीन घेतिल्ली उत्तूंग उडी आमकां सूख दिता, पूण तेच वांगडा वेस्ट इंडीजाचें क्रिकेट पुरायपणान रसातळाक गेल्ल्याचें वायट लेगीत दिसता. दुर्दैव अशें कीं सोबर्स, वॉरेल, क्लायव्ह लॉयड, ग्रिनीज, रिचर्ड हांचो वेस्ट इंडीज पंगड संवसारीक सर्ती खातीर पात्र लेगीत थारलो ना. हाचे वेल्यान संवसारांत क्रिकेटीचो जाल्लो प्रसार, नव्या बळिश्ठ पंगडांचो जाल्लो उदय हातूंतल्या सर्तीच्या क्रिकेटीचो वाडिल्लो दर्जो लेगीत अधोरेखीत जाता.
भारतीय क्रिकेट पंगडाची वाडिल्ली ताकद हे फाटभुंयेर आयज चडूच उठून दिसता आनी ताकाच लागून सांखळे फेरयेंत अपराजीत राविल्ल्या ह्या पंगडा खातीर कसलो तरी बोनस दिवपाची तजवीज सर्ती खातीर नेम तयार करतल्यांक विचारचें अशें भारतीय क्रिकेट मोगींक दिसल्यार ते खातीर तांकां दोश दिवपाक मेळचो ना. कोणेंय कल्पनाय केल्ली नासतली अशी दृश्ट लागपा सारकी कामगिरी केल्ल्यान कोणूय सपन रंजनांत आसत जाल्यार तें निश्चितूच समजवपा सारकें आसा. सांखळी फेरयेंतल्यो सगल्यो मॅची सुसेगाद जिखपी खंयच्याय पंगडाचे अतुलनीय कामगिरीची दखल खरें म्हणल्यार घेवपाकूच जाय, हें मानून घेवन सर्तीच्या नेमांत तसो बदल जावचो अशी अपेक्षा कोणूय करचो ना. एखादऱ्याचें फक्त सपन रंजन म्हूण ताचे कडेन आडनदर करची पडटली. हाचे उपरांतूय आयचे सामके सर्तींच्या जगांत अशे कामगिरीची अपेक्षा खंयच्याय पंगडा कडल्यान, मागीर तो पंगड जैतिवंत आसूं वा उपजैतिवंत, सहसा कोणूय करना वा करचो ना. पूण भारतीय सेनेन तें करून दाखयलां. भारतीयांक सगल्यांत चड समाधान दिवपी हे सर्तींतली खंयची घडणूक आसत जाल्यार पाकिस्तान आनी इंग्लंड ह्या दोन पंगडां मदीं जाल्ली सांखळे फेरयेंतली निमाणी लडत आनी ते उपरांत पॅक अप करून दोनूय पंगडांनी आपापल्या मायदेशांत केल्लें प्रयाण. इंग्लंड हो जाल्यार फाटले सर्तींतलो वस्ताद थारिल्लो पंगड. जाल्यार पाकिस्ताना कडेन हे खेपेचो वस्ताद म्हणून पळयताले. दोनूय पंगड एकाच वेळार मायदेशांत गेल्ल्यान ताका लागून जायत्या जाणांच्या 1947 चे यादींक उजाळो मेळ्ळो.
संवसारीक वन-डे सर्तींतल्या भारतीय पंगडाच्या आतां मेरेनच्या प्रवासाचो लेखाजोखा घेवपाचो जाल्यार सांघीक कामगिरी म्हणा वा संघ भावनेन एकाद्रो पंगड खेळ्ळो जाल्यार तातूंतल्यान नेमकें कितें घडपाक शकता हेच सगल्यांनी दाखोवन दिलां. ह्या पंगडांतलो कच्चो दुवो सोदून काडपाचें काम कोणेंय हातांत घेतल्यार तांच्या हाताक कांयच लागपाक शकचें ना अशें हड्ड्यारर हात मारून सांगपाक मेळटा. आमी म्हयनो देड म्हयनो पळयत आसात की मैदान खंयचेंय आसूं, प्रतिस्पर्धी पंगड खंयचोय आसूं, पयलीं बॅटींग करात वा बॉलींग, मॅचीचो निकाल थारिल्लो आसतालो. तो म्हणल्यार पुराय एकतर्फी आनी प्रतिस्पर्धी पंगडाक सामको मातयेभरवण. चेन्नयंत ऑस्ट्रेलियन पंगडाचें पानीपत. तीन गडे शुन्याचेर बाद जावन लेगीत आमी सुसेगादीन केलें. बळिश्ठ दक्षीण आफ्रिकेक हारोवपी नॅदरलॅण्डा आड बंगळुरूंत चारशेचो दोंगोर उबारून मॅचीक सरावाचें रुप दीत देडशेक धांवड्यांनी तांकां हारोवन सांखळे फेरयेची येसस्वी इतिश्री केली. मजगतींच्या सात मॅचींत वस्ताद इंग्लंडा सयत हवेंत उडपी पाकिस्ताना मेरेन उपवस्ताद न्युझिलॅण्डा सावन दक्षीण आफ्रिके मरेन सगल्या पंगडांक अशरक्षा लोळोवपाचेंच काम भारतीय पंगडान कशें केलें हें गूण तकट्यांतल्या भारताच्या निव्वळ धांवगती कडेन नदर घालीत जाल्यार लक्षांत येता.
हें करतना रोहीत सावन विराट, राहूल, श्रेयस मेरेन, बुमरा सावन शमी आनी जडेजा मेरेन सगल्यांनी वेगळेवेगळे विक्रम केले. प्रतिस्पर्धी पंगडांच्या काळजांत धडकी भरची अशी ही कामगिरी आशिल्ली. परां मुंबयंत न्युझिलॅण्डा आड अशेच धडाकेबाज कामगिरीची भारयीय पंगडा कडल्यान देशवासियांक अपेक्षा आसा. आमचे खातीर संवसारीक करंड आतां फक्त दोन पावलां पयस आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
