भांगरभूंय | प्रतिनिधी
आंतरराष्ट्रीय योग दीस
पुराय संवसार आंतरराष्ट्रीय योग दीस 2026 मनयतना, मनीस आयज एका अशा खिणाच्या उंबरठ्यार उबो आसा जो मनशाचे संस्कृताये खातीर निर्णायक थारूंक शकता. आयज आमी खूब प्रगत तंत्रगिन्यान आनी भौतीक सुखसोयींच्या युगांत रावतात, पूण त्याच वेळार चुकीची जिणे पद्दतीक लागून जावपी दुयेंस, मानसीक ताण, सैमाची नाशाडी, अस्थीर आनी असंतुलीत जिणे पद्दत ह्या सारक्या गंभीर आव्हानांक आमकां तोंड दिवचें पडटा. ह्या साबार संकश्टांच्या मुळाक एक सामान्य समस्या आसा – अनियंत्रीत आनी अविचारी उपभोग.
सैमीक साधन-संपत्तीचो अतिवापर, डिजिटल उपकरणांचें व्यसन परावलंबित्वाच्या पांवड्यार लागप, अस्थीर जिणेशैली – ह्या सगळ्या गजालींक लागून आधुनीक समाज ल्हव ल्हव दर एका मळार तोल वगडावपाक लागला. ह्या संदर्भांत, योग फकत एक पुर्विल्ली भलायकी परंपरा म्हणून न्हय, तर एक जापसालदार जिवीत जगपा खातीर एक तिगून उरपी जिणे पद्दत म्हणून मुखार येता. योग मनीस जातीक स्व-नियमन, आधुनिकीकरण आनी जाणीवपूर्वक निवड करपाचो एक बळिश्ट मार्ग दाखयता. स्वता भितर आनी आमच्या भोंवतणच्या संवसारांत सुसंवाद आनी शांतताय कशीं स्थापन करची हें तें आमकां शिकयता.
आत्मभानपूर्वक उपभोग: काळाची गरज
प्रधानमंत्री नरेंद्र मोदी हांच्या दूरदर्शी फुडारपणा खाला खंयच्याय गजालींचो अतिरेक करपाची प्रवृत्ती ह्या संवसारीक आव्हाना विशीं उलयतना, पर्यावरणाक अनुकूल जिणेचो मंत्र आशिल्ल्या ‘मिशन लायफ’ वरवीं आमकां सगळ्यांक एक बळिश्ट दिशा दिल्या. कोप-26 हातूंत प्रधानमंत्र्यान योगाच्या तत्वगिन्यानांत सुसंगत अशी एक म्हत्वाची कल्पना मांडली: ‘धर्तरेक आयज गरज आसा ती विवेकी आनी मनान वापराची. विवेकशून्य आनी विध्वंसक उपभोगाची न्हय.’
हालींच संवसारीक अर्थीक अस्थिरताय आनी पुरवण सांखळे विस्कळीत जायत आसतना प्रधानमंत्र्यान आपल्या आवाहनाची व्याप्ती वाडयतना दरेकल्याक तांच्या भौशीक नागरी जापसालदारकेची याद करून दिली. ताणें नागरिकांक टाळूंक शकता अशा गजालींचो वापर उणो करपाचो उलो मारलो – जातूंत इंधन वाटावपा पसून ते चड उर्जेचो वापर उणो करप, गरजे भायर जावपी खर्च टाळप आनी अपव्यय करप ह्या सुचोवण्यो आसपावीत आसात. ह्या आवाहना फाटलें कारण म्हळ्यार ह्या वस्तूंचो उणाव न्हय, तर एक समाज म्हूण चड लवचिकपणान आनी तिगून उरपी विचार करपाची प्रवृत्ती वाडोवपाची आनी राष्ट्रीय जापसालदारकेची भावना निर्माण करपाची रणनिती आनी नैतीक उलो आशिल्लो. कारण ताणें आमकां याद करून दिली, ‘उदकाचो दर एक थेंब एकठांय येवन एक मडको भरता, तसो दरेक ल्हान वा व्हडलो यत्न म्हत्वाचो आसता’.
ह्यो कल्पना योगाच्या मुळाव्या तत्वां कडेन खोलायेन संबंदीत आसात. योगीक तत्वगिन्यानांत अपरिग्रह – गरजे भायर आनी चड संचय टाळप – आनी संतोष – आमकां खरेंच जाय आशिल्ल्या गजालींनी समाधान मेळोवप ह्या विशयाचेर उलयलां. हीं तत्वां मेळून मनशाक सक्तीच्या उपभोगा पसून पयस करून जागरूक जिणे कडेन व्हरपी मानसिकता तयार करतात. योग आमकां निश्क्रीय गिरायकां परस ह्या धर्तरेची जापसालदार काळजी घेवपी करता.
योग – पर्यावरणीय सुसंवादाचें एक साधन
मनशाच्यो गरजो भागोवपाक ह्या धर्तरेचेर फावो ती संसाधनां आसात, पूण अमर्यादीत हांयस भागोवपाक तीं फावोशी नात. सैमा कडेन संबंदीत रावपाची आमची भावना घटमूट करून, योग जागृताय परतून हाडपाक मदत करता. आमी स्वास घेतात ती हवा, आमी खातात तें अन्न आनी आमी सोदपी स्थिरताय हे सगळे एका समान पर्यावरण वेवस्थेचो भाग आसात.
योगाभ्यासाक लागून ल्हव ल्हव वागणुकेचें रुपांतर आंतरिक स्वरुपांत जाता. ताका लागून मानसीक अस्वस्थताय शांत जाता, आवेग उणो जाता आनी आत्मशिस्त घटमूट जाता. इन्स्टंट समाधान आनी चड उपभोगवादाच्या आदारान चलिल्ल्या संवसारांत, योग खऱ्यो गरजो आनी अनंत इत्सा हांचे मदीं फरक करपाक जाय आशिल्ली भितरली स्पश्टताय दिता.
भलायकी आनी कुटुंब कल्याण आनी आयुष ह्या दोनूय खात्यां कडेन संबंदीत मंत्री ह्या नात्यान हांव दर दिसा पळयतां की असंसर्गजन्य दुयेंसां आड एक प्रतिबंधात्मक भौशीक भलायकी साधन म्हणून योग कशें काम करता. शारिरीक हालचाल, मानसीक समतोल आनी शिस्तबद्ध जिणेशैलीक चालना दिवन योग हानीकारक संवयो आनी गरजे भायर वैजकी उपचारां वयलें अवलंबन उणें करता. योगीक जिणे पद्दतींत सैमीक रितीन सादेपण, संयम, समतोल पोशण, उणो अपव्यय आनी संसाधनांचो विचारपूर्वक वापर करपाक प्रोत्साहन मेळटा. पर्यावरणीय तिगोवन दवरपा खातीर गरजेचे आशिल्ले हे वर्तनात्मक बदल.
अशे तरेन योग हो फकत वैयक्तीक कल्याणाचो मार्ग न्हय; तशेंच पर्यावरणीय जापसालदारकेची ती एक वेव्हारीक मांडावळ आसा.
भारताचे संवसारीक
भलायकी फुडारपण
आयज योग हें भारतान संवसाराक दिल्लें सगळ्यांत प्रभावी योगदान जावन आसा. भलायकी, सुसंवाद आनी सामुहीक कल्याणाची ती एक बळिश्ट अभिव्यक्ती आसा. एक पुर्विल्ली सांस्कृतीक प्रथा म्हणून सुरू जाल्ली ही चळवळ आतां भुगोल, राजकारण, भास आनी संस्कृतायेच्यो शिमो हुंपून वचपी संवसारीक चळवळ जाल्या.
दर वर्सा संवसारभरांतले लाखांनी लोक योग उत्सवांत वांटेकार जातात. ते फकत आसनां करिनात, तर भलायकी, चड समतोल आनी तिगून उरपी जिणेची एक सामायिक आकांक्षा लेगीत आपणायतात. प्रतिबंधात्मक भलायकी, मानसीक भलायकेची आनी मनान जगपाची संवसारीक भास म्हणून योग ही एक संवसारीक भास म्हूण मुखार आयल्या. योगाच्या माध्यमांतल्यान भारतान संवसाराक कालातीत गिन्यानाच्या आदारान आधुनीक हुस्को सोडोवन समग्र भलायकेखातीर एक अहिंसक आनी समावेशक मांडावळ उपलब्ध करून दिल्या. आंतरराष्ट्रीय योग दीस 2026 चें हें खूब म्हत्व आसा. योग संवसारभरांतल्या लाखांनी लोकांच्या जिविताक स्पर्श करता, देखून तो व्हड प्रमाणांत वागणुकींत बदल घडोवन हाडपाक एक अपूर्व व्यासपीठ उपलब्ध करून दिता. शाश्वतता, शिस्त आनी जागरूक जिणेशैलीचो संदेश योगाच्या सामुहीक भावनेंतल्यान फुडें वचूंक शकता आनी लोकांच्या मनाचेर खोल प्रभाव सोडूंक शकता.
आंतरराश्ट्रीय योग दीस
2026 खातीर सामुहीक प्रतिज्ञा
खरें कल्याण वेगळें आसूंक शकना. मनशाची भलायकी, सामुदायीक कल्याण आनी धर्तरेची भलायकी हांचो लागींच्यान संबंद आसा. हवामान बदल, जिणे पद्दती संबंदीत दुयेंसां आनी पर्यावरणाचो ऱ्हास ह्या सारक्या आव्हानांक तोंड दिवपा खातीर फकत रणनितीक हस्तक्षेप करपाची गरज ना, तर वागणुकेंत बदल करपाची गरज आसा.
ह्या आंतरराष्ट्रीय योग दिसा फकत योगासनांची आसनां करपा परस आमचो सोपूत घेवया. आमी योगाभ्यास फकत दिसपट्टो नित्यक्रम म्हणून न्हय, तर मनान उपभोग, भितरली शिस्त आनी पर्यावरणीय जापसालदारकी वाडोवपी जिणे पद्दती म्हणून आपणावया. आमी थारोवन जियेवपाच्या प्रधानमंत्र्याच्या आवाहनाक प्रतिसाद दिवया आनी एक फुडार घडोवया, जंय प्रगती फकत आमी कितें वापरतात ताचेर न्हय, तर आमी कितले जबाबदारीन जगतात हाचेर मेजतात.
स्वता भितर अंतर्गत बदल घडोवन हाडून आमी सामुहीकपणान आमच्या धर्तरेच्या भायल्या वातावरणांत सुदारणा करुया.
(आयुष मंत्रालय, तशेंच भलायकी आनी कुटुंब कल्याण (स्वतंत्र प्रभार) राज्यमंत्री)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
