भांगरभूंय | प्रतिनिधी
नवी दिल्ली, खबरां संस्था ः संवसारांतल्या सगळ्यांत बळिश्ट पासपोर्टांच्या क्रमवारींत भारताची पांच क्रमांकान सुवात देंवल्या. हेन्ली पासपोर्ट इंडेक्स 2025 प्रमाण भारताचो क्रमांक 85वे वयल्यान 80वे सुवातेर पावलां. हेन्ली पासपोर्ट इंडेक्सांत 199 देशांच्या पासपोर्ट्सांक तें व्हिसा नासतना कितल्या देशांक भेट दिवंक शकता ताचे प्रमाण ही क्रमवारी थारायल्या. हालींच जाहीर केल्ल्या हे क्रमवारी प्रमाण भारतीय पासपोर्ट आशिल्ले व्हिसा नासतना 57 देशांक भेट दिवंक शकता. भारता वांगडाच इक्वेटोरीयल गिनी आनी नाजर हेय देश हे क्रमवारींत आसात.
सिंगापूरचो पासपोर्ट हो सगळ्यांत बळिश्ट पासपोर्ट म्हूण हे वळेरेंत पयलें सुवातेर आसा. अंदूय 2025 वर्साचे वळेरेंतूय सिंगापूरचो पयलो क्रमांक आसा. हेन्ली पासपोर्ट इंडेक्साच्या मतान सिंगापूरच्या पासपोर्ट धारकांक व्हिसा नासतना संवसारांतल्या 195 देशांनी प्रवास करुंक मेळटा. हाचे उपरांत जपान पासपोर्ट धारकाक 193 देशांनी प्रवेश करपाक मेळटा, तशेंच फिनलँड, फ्रांस, जर्मनी, इटली, दक्षीण कोरिया, स्पेन आनी ऑस्ट्रिया दरेकी 192 देश आनी डेन्मार्क पासपोर्ट धारकांक 191 देशांनी व्हिसा नासतना प्रवास करपाक मेळटा.
2015 वर्सांचे तुळेंत युएई पासपोर्ट धारकांक व्हिसा नासतना आनीक 72 देशांनी प्रवेश मेळूंक शकता. युएई पासपोर्ट धारकांक संवसारांतल्या 185 देशांनी व्हिसा मुक्त प्रवेश मेळटा. युएई ह्या निर्देशांकांत 32 क्रमांकावेल्यान धावे सुवातेर पावलां. अमेररका 2015 ते 2025 ह्या काळांत दुसऱया क्रमांकांवेल्यान धाव्या क्रमांकाचेर पावलां.
हेन्ली पासपोर्ट निर्देशांकांत 2025 वर्सा पाकिस्तान आनी येमेन हांचो क्रमांक 103वो आसा आनी ह्या दोन देशांतल्या पासपोर्ट धारकांक व्हिसा नासतना फकत 33 देशांनी प्रवेश मेळटा. ताचे उपरांत इराकांतल्या पासपोर्ट धारकांक 31 देश, सिरिया 27 देश आनी अफगाणिस्तानांतल्या पासपोर्ट धारकांक 26 देशांनी प्रवेश करपाक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
