भांगरभूंय | प्रतिनिधी
नवी दिल्ली, खबरां संस्था ः संवसारांतल्या 20 प्रदुशीत शारां मदलीं 13 शारां भारतांत आसात. मेघालयांतलें बर्निहाट हें वळेरेंत पयल्या क्रमांकाचेर आसा. तेच बरोबर चड प्रदुशीत राजधानींच्या वळेरेंत दिल्ली पयल्या क्रमांकाचेर आसा. स्विस एअर क्वालिटी टेक्नॉलॉजी कंपनी आयक्यू एअराच्या 2024 वर्साच्या अहवालांतल्यान ही म्हायती मेळ्ळ्या.
ह्या अहवालांत संवसारांतल्या प्रदुशीत देशां मदीं भारत पांचवे सुवातेर आसा. 2023 वर्सा भारत तिसऱ्या क्रमांकाचेर आशिल्लो. भारतांत पीएम 2.5 पातळी 2025 मेरेन 7 टक्क्यांनी उणी जावपाची अपेक्षा आसा अशें अहवालांत म्हणलां.
2025 वर्सा पीएम 2.5 पातळी सरासरी 50.6 मायक्रोग्राम दर घन मिटराक आसतली, जाल्यार 2023 वर्सा दर घन मिटराक 54.4 मायक्रोग्राम आशिल्ली. तरी लेगीत संवसारांतल्या 10 प्रदुशीत शारां मदल्या 6 शारां भारतांत आसात. दिल्लींत प्रदुशणाची पातळी लेगीत वाडत आशिल्ली. हांगा पीएम 2.5 वर्सुकी सरासरी 91.6 मायक्रोग्राम दर घन मिटराक आशिल्ली.
ओशिनिया हो संवसारांतलो सगळ्यांत निवळ प्रदेश
2024 वर्सा ओशिनिया हो संवसारांतलो सगळ्यांत निवळ प्रदेश. थंयची 57% शारां डब्ल्यूएचओच्या मार्गदर्शक तत्वांक पाळो दितात.
अहवाला प्रमाण, आग्नेय आशियांतल्या दरेका देशांत पीएम 2.5 पातळी उणी जाली आसली तरी शिमेभायर धुकें आनी एल नीनोची परिस्थिती आजूनय मुखेल घटक आसात.
संयुक्त राश्ट्रांच्या मतान ओशिनियांत 14 देश आसात. तातूंत ऑस्ट्रेलिया, न्यूझीलंड, फिजी, पापुआ न्यू गिनी, नौरू, किरिबाती, मायक्रोनेशिया आनी मार्शल जुंवे हांचो आस्पाव आसा.
भारतांतल्या जायत्या शारांनी पीएम 2.5 पातळी 10 पटींनी चड…
भारतीय शारांनी हवेचो दर्जो इतलो वायट आसा की 35% शारांनी हवेंतल्या बारीक कणांचें (पीएम 2.5) प्रमाण संवसारीक भलायकी संघटनेन (डब्ल्यूएचओ) थारायिल्ल्या प्रमाणा परस 10 पटींनी चड आसा. हे वायट हवेक लागून भारतांतल्या लोकांची भलायकी धोक्यांत पडल्या. लोकांची सरासरी पिराय सुमार 5.2 वर्सां उणी जायत आसा.
एका अभ्यासा प्रमाण 2009 ते 2019 ह्या काळांत हवेंतल्या पीएम 2.5 कणांच्या प्रदुशणाक लागून भारतांत दर वर्सा सुमार 15 लाख लोकांक मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
