भांगरभूंय | प्रतिनिधी
रेल्वे मंत्री अश्विनी वैष्णव हांणी व्हिडिओ केलो व्हायरल
नवी दिल्ली, खबरां संस्था : जम्मू- काश्मीरांतल्या देशांतल्या म्हत्वाच्या रेल्वे प्रकल्पाचें काम चालू आसा. तेन्नाचे प्रधानमंत्री अटलबिहारी वाजपेयी हांणी जम्मूक श्रीनगर जोडपा खातीर ह्या रेल्वे मार्गाची बुन्याद घाल्ली. उधमपूर- श्रीनगर- बारामुल्ला रेल्वे दुवो (यूएसबीआरएल) जोडपाचें काम झुंजा पांवड्यार चालू आसा. काश्मीरचे चेनाब न्हंयचेर संवसारांतलो सगळ्यांत ऊंच रेल्वे पूल बांदून पुराय जाला. ह्या मार्गाचेर बेगीनूच रेल्वे सेवा सुरू जातली. रेल्वे मंत्री अश्विनी वैष्णव हांणी चेनाब रेल्वे पुलाचेर चलपी तपासणी रेल्वेचो सोबीत व्हिडियो शेअर केला.
वैष्णव हांणी ‘एक्सा’चेर ट्रायल रनचो व्हिडियो घाला. ताचेर पोस्ट करून तांणी बरयलां, ‘संगलदान ते रियासी मेरेन आयज पयली ट्रायल ट्रेन येसस्वीपणान चलयली. हातूंत संवसारांतलो सगळ्यांत उंच पुल चिनाब ब्रिजाक पार करप हाचोय आसपाव आशिल्लो. यूएसबीआरएल मार्गाचीं सुमार सगळीं कामां पुराय जाल्यांत. फकत टनेल क्रमांक १ चीं कांय कामां उरल्यांत.
श्रीनगर ते जम्मू रेल्वेमार्गान वर्साचे निमाणे कडेन
उधमपुर- श्रीनगर- बारामुल्ला रेल्वे लिंक प्रकल्प ह्या वर्साचे निमाणे मेरेन पुराय जावपाची शक्यताय आसा. ह्या प्रकल्पाचें उक्तावण प्रधानमंत्री नरेंद्र मोदी हांणी २० फेब्रुवारी २०२४ दिसा केल्लें. चेनाब रेल्वे पूल चिनाब न्हंयचेर सुमार ३५९ मीटर उंचायेचेर बांदला. जम्मू-काश्मीरांत बांदिल्लो हो संवसारांतलो सगळ्यांत ऊंच रेल्वे पूल. पुल बांदपा खातीर वट्ट ३० हजार मेट्रीक टन तिख्याचो उपेग केला. हो पूल १४८६ कोटी रुपया खर्च करून बांदला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
