भांगरभूंय | प्रतिनिधी
नवी दिल्ली, खबरां संस्था ः संवसारांतल्या उत्कृश्ट सँडविचांत भारतीय ‘वडा पाव’ ह्या खाणान मानाची सुवात मेळयल्या. 50 उत्कृश्ट सँडविच प्रकारांत वडा-पावान 16 वो क्रमांक मेळयला.
‘वडा पाव’ हे एक नामनेचे भारतीय खाण, जाचो संवसारभरांतले लोक आस्वाद घेतात. बटाट भाजयेचे गुळे करुन बेसन पिठान बुडोवन ते तेलांत कुरकुरीत भाजतात. जे पावाच्या मदीं घालून ताचे वांगडा मिरसांग, वेगवेगळ्यो तरांच्यो चटणी आनी साॅस घालून खातात. देखूनच हो वडा पाव आतां संवसारांत लोकांचे आवडीचो थारला. TasteAtlas हें ऑनलायन प्रवास आनी खाणां मार्गदर्शक संस्थेन वडा पावाक संवसारांतल्या पयल्या 50 उत्कृश्ट सँडविचांत क्रमांक दिला. तशेंच ही संस्था संवसारभरांतल्यान थळाव्या रेसिपी आनी खाणां-जेवणाचे नियाळ एकठांय करतात.
Taste Atlas हांणी आपल्या संकेतथळार ‘तुमचें आवडीचें खाण निवडात’ असो पर्याय दिल्लो. हांतूत वडा पाव 16 व्या क्रमांकाचेर आसा. व्हिएतनामांतले बान्ह मी, तुर्कस्तानांतलें टॉम्बिक डोनर, लेबनॉनांतलें शोर्मा, मेक्सिकोचे टॉर्टास आनी अमेरिकेंतले लॉबस्टर रोल हें पयले पांच पदार्थ आसात. जाल्यार जर्मनींतलो मेटब्रोचेन, स्पेनांतलो बोकाडिलो डी सेर्दो, सेंगुचे डी मिलानेसा, अर्जेंटिनाचो बीफ ऑन वेक आनी अमेरिकेंतलो पोर्चेटा सँडविच हें निमाणे पांच पदार्थ आसात.
Taste Atlas हांणी दिल्ल्या इतिहासा प्रमाण, वडा पाव हें आयकॉनिक स्ट्रीट फूड अशोक वैद्य नांवाच्या एका विक्रेत्यान तयार केल्लें. जे 1960 आनी 1970 च्या दशकांत दादर रेल्वे स्टेशना लागीं मेळटालें. उपाशी कामगारांक तृप्त करपाचो एक मार्ग ताणें सोदून काडिल्लो. हे पद्धतीचो विचार करून ताणें निश्कर्श काडलो की वडा पाव तयार करपाक सोंपें, गिरायकांक परवडपी आनी पोट भरपी आसा. वैद्यान हो नाश्तो तयार केल्या उपरांत ताची लोकप्रियता संवसारभर पाताळ्ळी.
अशें तरेन रुचीक वडा- पावाचो सोद लागलो. आयज रस्त्या वयल्या स्टॉल ते जेवणाच्या रेस्टॉरंट मेरेन सगळे कडेन वडा पावचो आस्वाद घेवपाक मेळटा. देखूनच भारतीय ‘वडा पाव’ ह्या खाणाक मानाची सुवात मेळ्ळ्यां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
